ភ្នំពេញៈ ក្រសួងអប់រំ យុវជន និងកីឡា សហការជាមួយភ្នាក់ងារសហប្រតិបត្តិការអន្តរជាតិកូរ៉េ (KOICA) នៃសាធារណរដ្ឋកូរ៉េ ធ្វើការលើកកម្ពស់ការកសាងសមត្ថភាពបច្ចេកវិទ្យាព័ត៌មានសម្រាប់ការអប់រំនៅមធ្យមសិក្សាបឋមភូមិនៅកម្ពុជា។ នេះបើតាមលោក រស់ សុវាចា អ្នកនាំពាក្យក្រសួងអប់រំ។
តាមរយៈកិច្ចសហការនេះ លោកហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា និងលោក Rho Hyunjun តំណាងទីភ្នាក់ងារ KOICA ប្រចាំនៅកម្ពុជា និងប្រធានអង្គភាពពាក់ព័ន្ធ កាលពីថ្ងៃទី ១៥ ខែធ្នូនេះ បានដឹកនាំកិច្ចប្រជុំជាលើកដំបូងលើការកសាងសមត្ថភាពបច្ចេកវិទ្យាព័ត៌មានសម្រាប់ការអប់រំនៅមធ្យមសិក្សាបឋមភូមិនៅកម្ពុជានេះ។ ក្រសួងអប់រំ យុវជន និងកីឡា ក៏បានបង្កើតគណៈកម្មការអនុវត្តគម្រោងកិច្ចសហប្រតិបត្ដិការនេះក្រោមជំនួយពីសំណាក់ KOICA ដើម្បីសហការទទួលខុសត្រូវ និងអនុវត្តគម្រោងប្រកបដោយប្រសិទ្ធភាព ដើម្បីចូលរួមលើកកម្ពស់ការកសាងសមត្ថភាពបច្ចេកវិទ្យាសម្រាប់ការអប់រំនៅកម្ពុជា ស្របតាមចក្ខុវិស័យនៃរាជរដ្ឋាភិបាលកម្ពុជា។
លោករស់ សុវាចា ប្រាប់ភ្នំពេញប៉ុស្ដិ៍នៅថ្ងៃទី១៦ ធ្នូថា តាមរយៈកិច្ចសហប្រតិបត្ដិការនេះ KOICA ចូលរួមលើកកម្ពស់ការកសាងសមត្ថភាពបច្ចេកវិទ្យាព័ត៌មានសម្រាប់ការអប់រំកម្រិតមធ្យមសិក្សាបឋមភូមិនៅកម្ពុជា។
លោថ្លែងថា កិច្ចសហប្រតិបត្តិការនេះផ្តោតលើទី១កែលម្អកម្មវិធីបណ្តុះបណ្តាលមុខវិជ្ជា ICT និងខ្លឹមសារ ICT ទី ២ លើកកម្ពស់សមត្ថភាពគ្រូឧទ្ទេសមជ្ឈមណ្ឌលគរុកោសល្យនិងគ្រូមធ្យមសិក្សាបឋមភូមិក្នុងគម្រោងមុខវិជ្ជា ICT។ ទី ៣ កែលម្អបរិស្ថានសិក្សាផ្នែក ICT តាមមជ្ឈមណ្ឌលគរុកោសល្យ និងគ្រូមធ្យមសិក្សាបឋមភូមិក្នុងគម្រោង។ ទី ៤ រៀបចំសម្ភារ ICT តាមសាលារៀន និងទី ៥ ការពិនិត្យលើការអនុវត្តគម្រោង។ សមត្ថភាពបច្ចេកវិទ្យាព័ត៌មានសម្រាប់ការអប់រំនៅមធ្យមសិក្សាបឋមភូមិនៅកម្ពុជានឹងមានការផ្លាស់ប្តូរវិជ្ជមាន។
លោកបញ្ជាក់ថា៖«ក្រសួងអប់រំសូមស្វាគមន៍ និងថ្លែងអំណរគុណក្រសួង-ស្ថាប័ន ដៃគូអភិវឌ្ឍន៍ដូចជា KOICA និងគ្រប់ភាគីពាក់ព័ន្ធដែលបាននិងបន្តគាំទ្រការអនុវត្តផែនការយុទ្ធសាស្ត្រឆ្នាំ ២០១៩-២០២៣ របស់ក្រសួងអប់រំ។ ជាពិសេសចំពោះការចូលរួមជំរុញការអប់រំ បែបឌីជីថល តាមរយៈការកសាងសមត្ថភាពបច្ចេកវិទ្យាព័ត៌មានដើម្បីឆ្លើយតបនឹងគោលនយោបាយនិងទិសដៅនៃសេដ្ឋកិច្ចឌីជីថលរបស់កម្ពុជា»។
បើតាមលោកសុវាចា ជារួមយុទ្ធសាស្រ្តរបស់ក្រសួងអប់រំ សម្រាប់លើកកម្ពស់ការអប់រំឌីជីថល គឺបញ្ជ្រាបបច្ចេកវិទ្យាព័ត៌មាន និងសារគមនាគមន៍ (ប.ព.ស.) ឱ្យក្លាយជាឧបករណ៍សម្រាប់បង្រៀន និងរៀន និងចែករំលែកចំណេះដឹងក្នុងវិស័យអប់រំទាំងមូលសំដៅឱ្យសិស្សនិស្សិតទទួលបាននូវចំណេះដឹងនិងបំណិនប.ព.ស. ដើម្បីធ្វើអន្តរកាលទៅរកពិភពការងារក្នុងសតវត្សរ៍ទី ២១។
លោកបន្តថា យុទ្ធសាស្រ្ដក្រសួង គឺប្រើប្រាស់ដំណើរការគ្រប់គ្រង និងបែបបទការងារថ្មី ដើម្បីធ្វើទំនើបកម្មការអនុវត្តការងារ និងបង្កើនប្រសិទ្ធភាព តម្លាភាព និងភាពស័ក្តិសិទ្ធិនៃអភិបាលកិច្ច និងការពិនិត្យតាមដានលទ្ធផលការងារក្នុងវិស័យអប់រំនិងធានាឱ្យសិស្សនិស្សិតកម្ពុជាគ្រប់រូប បញ្ចប់ការសិក្សាក្នុងប្រព័ន្ធមានចំណេះដឹង និងបំណិន ប.ព.ស. ដើម្បីមានលទ្ធភាពបន្តការសិក្សា និងបំពេញការងារវិជ្ជាជីវៈ។
លោកសុវាចា លើកឡើងថា តាមយុទ្ធសាស្រ្ដក្រសួងអប់រំនេះ ក៏បង្កើនប្រសិទ្ធភាព និងភាពស័ក្តិសិទ្ធិនៃការបង្រៀន និងរៀននៅតាមសាលាគរុកោសល្យ សាលារៀន និងគ្រឹះស្ថានសិក្សាដទៃទៀត តាមរយៈការប្រើប្រាស់ឧបករណ៍ ប.ព.ស. និងធនធានអប់រំអេឡិចត្រូនិក។ ប្រើប្រាស់ការរៀនសូត្រតាមប្រព័ន្ធអេឡិចត្រូនិក ដើម្បីគាំទ្រឱ្យមានការផ្តល់សេវាអប់រំដល់គ្រប់អនុវិស័យ (រួមទាំងអនុវិស័យឧត្តមសិក្សា) នៃវិស័យអប់រំសម្រាប់សិស្ស និស្សិត និងការអភិវឌ្ឍសមត្ថភាពស្ថាប័ន ក៏ដូចជាការរៀនពេញមួយជីវិត។
តាមយុទ្ធសាស្រ្ដនេះ ក៏បង្កើនប្រសិទ្ធភាពក៏ដូចជាសមត្ថភាពរបស់ខ្លួន ក្នុងការធ្វើសេចក្ដីសម្រេចចិត្តផ្អែកតាមភ័ស្តុតាង និងការចែករំលែកចំណេះដឹង តាមរយៈការប្រើប្រាស់ព័ត៌មានក្នុងលក្ខណៈជាប្រព័ន្ធ ក្នុងពេលតែមួយជាមួយគ្នាដើម្បីបង្កើនសមត្ថភាពរបស់ខ្លួនក្នុងការងាររដ្ឋបាលអប់រំ ប្រតិបត្តិការ និងការប្រមូលទិន្នន័យតាមប្រព័ន្ធឌីជីថល។ បង្កើតស្តង់ដាសម្រាប់ហេដ្ឋារចនាសម្ព័ន្ធ ការភ្ជាប់ទំនាក់ទំនងបណ្ដាញអង្គភាពនៅថ្នាក់ជាតិ និងថ្នាក់ក្រោមជាតិទាំងអស់ទៅក្នុងប្រព័ន្ធតភ្ជាប់ផ្ទៃក្នុង។ ផ្ដល់ធនធានហិរញ្ញវត្ថុចាំបាច់ ដើម្បីគាំទ្រដល់ការប្រើប្រាស់ ប.ព.ស. ក្នុងវិស័យអប់រំ ដោយប្រើប្រាស់ថវិការបស់រដ្ឋាភិបាល និងធ្វើការសម្របសម្រួលភាពជាដៃគូ រវាងវិស័យឯកជន និងវិស័យសាធារណៈ និងការគាំទ្ររបស់ដៃគូអភិវឌ្ឍនានាសម្រាប់រ៉ាប់រងចំណាយមូលធន និងចំណាយចរន្ត។
រដ្ឋមន្រ្តីក្រសួងអប់រំ លោកហង់ជួន ណារ៉ុន ថ្លែងបាឋកថា ក្រោមប្រធានបទ «យុវជនត្រូវមានជំនាញសតវត្សរ៍ទី ២១ ដើម្បីជោគជ័យក្នុងអាជីព»កាលពីថ្ងៃទី ៥ ខែធ្នូ ថា យុវជនត្រូវមានជំនាញសតវត្សរ៍ទី ២១ ដើម្បីជោគជ័យក្នុងអាជីពរបស់ខ្លួន។ ប៉ុន្តែដើម្បីទទួលបានជំនាញទាំងនេះក្រសួងអប់រំ សាលារៀនគ្រឹះស្ថានឧត្ដមសិក្សាត្រូវផ្លាស់ប្ដូរវិធីសាស្រ្ដបង្រៀនហើយយុវជនត្រូវចូលអនុវត្ដកម្មវិធីសិក្សា និងធ្វើសកម្មភាពសង្គមជាដើម។
លោកថ្លែងថា បច្ចេកវិទ្យាដើរលឿន ហើយបើតាមការវិភាគរបស់វេទិកាសេដ្ឋកិច្ចពិភពលោក ក្នុងរយៈពេល ១០ ទៅ ២០ ឆ្នាំខាងមុខ បច្ចេកវិទ្យានឹងដើរលឿនយ៉ាងខ្លាំង។ ក្នុងនោះជំនាញមួយចំនួនដែលមនុស្សកំពុងប្រើប្រាស់នាបច្ចុប្បន្ន តាមការធ្វើស្វ័យប្រវត្ដិភាវូបនីយកម្ម មុខវិជ្ជាមួយចំនួន គឺទីផ្សារការងារលែងត្រូវការ ហើយជំនាញថ្មីៗនឹងលេចឡើងដែលទាមទារឱ្យយុវជនត្រូវតែចេះចាប់យកនិងរៀននូវជំនាញថ្មីដើម្បីទទួលបានការងារ។
បើតាមលោកណារ៉ុន បំណិនសតវត្សរ៍ទី២១ គឺផ្ដោតទៅលើ ១-បំណិនត្រិះរិះពិចារណា ២- បំណិននវានុវត្ដន៍និងដោះស្រាយបញ្ហា ៣-បំណិនសហការ ៤-បំណិនជាអ្នកដឹកនាំនិងប្រាស្រ័យទាក់ទង ៥-បំណិនអក្ខរកម្មព័ត៌មាន ៦-បំណិនអក្ខរកម្មប្រព័ន្ធផ្សព្វផ្សាយ ៧-បំណិនអក្ខរកម្មបច្ចេកវិទ្យា ៨-បំណិននៃភាពទន់ភ្លន់ ៩-ភាពជាអ្នកដឹកនាំ ១០-ត្រូវមានការចេះផ្គួចផ្ដើមគំនិត ១១-ត្រូវមានផលិតភាព និង ១២-បំណិនសង្គម៕