.jpg)
ទីតាំងដាក់ពាក្យស្លោក «ខ្មែរធ្វើបាន» ជាកន្លែងពុះភ្នំធ្វើផ្លូវក្នុងខេត្តព្រះសីហនុ។ រូបថត យូសុះ អាប់ឌុលរ៉ាស់ហ៊ីម
ព្រះសីហនុៈ ស្ថានីយប្រព្រឹត្តិកម្មទឹកកខ្វក់កម្រិតស្ដង់ដានៅខេត្ដព្រះសីហនុគឺជាសមិទ្ធផលមួយក្នុងចំណោមសមិទ្ធផលជាច្រើនដូចជា ហេដ្ឋារចនាសម្ព័ន្ធផ្លូវថ្នល់ចំនួន ៣៧ ខ្សែ អគារខ្ពស់រាប់ពាន់ និងហេដ្ឋារចនាសម្ព័ន្ធថ្មីៗជាច្រើនទៀតដែលរាជរដ្ឋាភិបាលកម្ពុជាបានចំណាយថវិការដ្ឋ និងធនធានក្នុងប្រទេស ប្រែក្លាយខេត្ដនេះជាតំបន់សេដ្ឋកិច្ចពិសេសគំរូពហុបំណងដ៏សំខាន់នៅក្នុងប្រទេស។
ស្ថានីយប្រព្រឹត្ដិកម្មទឹកកខ្វក់ចំនួន ៣ ត្រូវបានសាងសង់ឡើងនៅក្នុងខេត្ដនេះ។ ស្ថានីយនេះធ្វើឡើងដោយបំពាក់បច្ចេកវិទ្យាចុងក្រោយ MABR ដែលជាបច្ចេកវិទ្យានវានុវត្ដន៍របស់អ៊ីស្រាអែល។ ស្ថានីយនេះគឺជាផ្នែកសំខាន់មួយដើម្បីឱ្យក្រុងព្រះសីហនុក្លាយជាទីក្រុងទំនើប (Smart- City) នៅក្នុងប្រទេសផងដែរ។
ស្ថានីយប្រព្រឹត្តិកម្មទឹកកខ្វក់ទី ១ មានសមត្ថភាពប្រព្រឹត្តិកម្មទឹកកខ្វក់ក្នុងបរិមាណ ៥ ២០០ ម៉ែត្រគុបក្នុង ១ ថ្ងៃទទួលរងទឹកកខ្វក់ពីតំបន់ទី ៣ ដែលមានផ្ទៃដី ៣៦៤ ហិកតាស្ថិតក្នុងសង្កាត់លេខ ៣។ ស្ថានីយប្រព្រឹត្តិកម្មទឹកកខ្វក់ទី ២ មានសមត្ថភាពប្រព្រឹត្តិកម្មទឹកកខ្វក់ក្នុងបរិមាណ ៧ ២០០ ម៉ែត្រគុបក្នុង ១ ថ្ងៃទទួលរងទឹកកខ្វក់ពីតំបន់ទី ៤ ដែលមានផ្ទៃដី ៤៨៦ ហិកតាស្ថិតក្នុងសង្កាត់លេខ ៣។ ចំណែកឯស្ថានីយប្រព្រឹត្តិកម្មទឹកកខ្វក់ទី ៣ ដែលកំពុងបើកការដ្ឋានសាងសង់នោះមានសមត្ថភាពប្រព្រឹត្តិកម្មទឹកកខ្វក់ក្នុងបរិមាណ ២០ ០០០ ម៉ែត្រគុបក្នុង ១ ថ្ងៃទទួលរងទឹកកខ្វក់ពីតំបន់ទី ៥ និងតំបន់ទី ៦ ដែលមានផ្ទៃដី ២ ៦៩០ ហិកតា ស្ថិតក្នុងសង្កាត់លេខ ៤ ដែលសាងសង់ដោយក្រុមហ៊ុន X-WATER TECHNOLOGY CO.,LTD។
ស្ថានីយប្រព្រឹត្តិកម្មទឹកកខ្វក់នេះគឺជាផ្នែកមួយនៃពាក្យស្លោក «ខ្មែរធ្វើបាន» ដោយសារតែកូនខ្មែរមួយរូប គឺលោក លី រិទ្ធ វ័យ ៤១ ឆ្នាំ អតីតនិស្សិតបរិញ្ញាបត្រវិស្វករ នៅវិទ្យាស្ថានបច្ចេកវិទ្យាកម្ពុជាកាលពីឆ្នាំ ២០០៣ និងបានបញ្ចប់ការសិក្សាថ្នាក់បណ្ឌិតវិស្វករពីសាលា ENSAM នៅ Metz នៃប្រទេសបារាំងកាលពីឆ្នាំ ២០០៩ ជាអ្នកទទួលបានឱកាសពីរាជរដ្ឋាភិបាលកម្ពុជា ដើម្បីដឹកនាំក្រុមការងាររួមមានយុវជនខ្មែរ និងបុគ្គលិកកូនខ្មែរ រាប់រយនាក់ទៀតរួមគ្នាស្ថាបនាស្ថានីយប្រព្រឹត្ដិកម្មទឹកកខ្វក់ទាំង ៣ នេះឡើង។
មានដើមកំណើតនៅភូមិប្រាល ឃុំតានី ស្រុកអង្គរជ័យ ខេត្ដកំពត ហើយបច្ចុប្បន្នជាប្រធានក្រុមប្រឹក្សាភិបាល និងជានាយកប្រតិបត្ដិក្រុមហ៊ុន X-WATER TECHNOLOGY CO.,LTD លោក រិទ្ធ បានអះអាងថា ទម្រាំលោក និងក្រុមការងារទទួលបានឱកាសនេះ គឺលោកបានប្រឹងប្រែងតស៊ូរៀនសូត្រ ប្រឡូកក្នុងការងារ ប្រមូលផ្ដុំដៃគូ យុវជនជាច្រើនឆ្នាំ ទើបអាចមានឱកាសចូលរួមស្ថាបនាស្ថានីយប្រព្រឹត្ដិកម្មទឹកកខ្វក់នេះដែលជាស្នាដៃ« ខ្មែរអាចធ្វើបាន»។
អាងប្រព្រឹត្តិកម្មទឹកកខ្វក់ក្នុងខេត្តព្រះសីហនុស្ថាបនាឡើងដោយវិស្វករខ្មែរ ក្រុមលោក លី រិទ្ធ។ រូបថត យូសុះ អាប់ឌុលរ៉ាស់ហ៊ីម
លោកបានលើកឡើងថា ទន្ទឹមនឹងការអភិវឌ្ឍឥតឈប់ឈរក្នុងខេត្តព្រះសីហនុ នៅក្នុងនោះក៏បានជួបនូវបញ្ហាប្រឈមជាច្រើនជាពិសេសការបញ្ចេញកាកសំណល់ប្រើប្រាស់ដែលមានចំនួនច្រើន និងមានសារធាតុពុលអាចបង្កផលប៉ះពាល់ដល់បរិស្ថានជុំវិញដូចជាមនុស្សសត្វ រុក្ខជាតិជីវចម្រុះ និងឆ្នេរសមុទ្រ ខេត្តព្រះសីហនុជាដើម។
ក្រោយពិនិត្យឃើញពីបញ្ហាប្រឈមទាំងនេះគណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា បានសហការជាមួយរដ្ឋបាលខេត្តព្រះសីហនុបានសម្រេចផ្ដល់ឱកាសដល់ក្រុមការងាររបស់លោក សាងសង់ស្ថានីយប្រព្រឹត្តិកម្មទឹកកខ្វក់ទាំងនេះឡើងក្នុងគោលបំណង ដើម្បីបន្សុទ្ធទឹកកខ្វក់ទឹកស្អុយឱ្យក្លាយជាទឹកដែលស្អាតស្របតាមស្តង់ដាបរិស្ថានមុននឹងបញ្ចេញចោលទៅក្នុងសមុទ្រដោយប្រើបចេ្ចកវិទ្យា MABR និងត្រូវបានទទួលស្គាល់ថាជាបច្ចេកវិទ្យាដែលមានស្ថិរភាពប្រសិទ្ធភាពខ្ពស់សន្សំសំចៃថាមពលគ្មានសំឡេងរំខាន និងគ្មានក្លិនប៉ះពាល់ដល់ប្រជាពលរដ្ឋរស់នៅជុំវិញតំបន់នោះផងដែរ។
លោក រិទ្ធ ថ្លែងថា ពាក្យ «ខ្មែរធ្វើបាន» មិនមែនមានន័យថា ឥឡូវខ្មែរគ្មានសមត្ថភាពផលិតម៉ូទ័រ ខ្មែរធ្វើមិនបានទេ។ ខ្មែរធ្វើបាន គឺខ្មែរមានសមត្ថភាពរចនាឡើងនូវប្រព័ន្ធមួយដែលមានចង្វាក់ផលិតកម្មដោយខ្លួនឯង ដោយជ្រើសរើសនូវផលិតផលណាមួយដែលជាបច្ចេកវិទ្យាចុងក្រោយ យកមកប្រើមកផ្គុំចូលគ្នាបង្កើតបានជាចង្វាក់ប្រព័ន្ធផលិតកម្មមួយបាន។
លោកបញ្ជាក់ថា៖ «ខ្ញុំផ្ដាំផ្ញើដល់វិស្វករខ្មែរយើង យុវជនខ្មែរយើងថា យើងជាវិស្វករ គឺយើងមានសមត្ថភាពគ្រប់គ្រាន់ក្នុងការប្រើប្រាស់របស់ដែលគេផលិតឱ្យវិស្វករប្រើ ហើយបើយើងវិស្វករប្រើមិនបានទេ គឺមានន័យថារោងចក្រផលិតរបស់មកនោះ គឺបរាជ័យហើយ។ ក្នុងនាមជាវិស្វករទើបចេញមកពីសាលាថ្មីៗក៏ដោយ កុំរួញរា កុំភ័យ កុំបារម្ភខ្លាចធ្វើមិនបាន គឺអត់មានអីថាយើងធ្វើមិនបានទេ។ យើងរៀនដល់វិស្វករហើយគេផលិត ផលិតផលមករឿងអីយើងធ្វើមិនបាន»។
ការរចនាប្រព័ន្ធស្ថានីយប្រព្រឹត្តិកម្មទឹកកខ្វក់នេះ គឺមានការលំបាកជាងការរៀបចំប្រព័ន្ធស្ថានីយប្រព្រឹត្តិកម្មទឹកស្អាតសម្រាប់ប្រើប្រាស់ទៅទៀត។ ប៉ុន្ដែក្រុមការងាររបស់លោក នៅតែមានមហិច្ឆតាធ្វើការងារនេះ ដោយមិនភ័យខ្លាច ដោយសារតែមានភាពជឿជាក់ថា ធ្វើការងារនេះបាន។ លោកបានឱ្យដឹងថា ក្នុងចំណោមប្រភេទផលិតផលរាប់រយមុខ រាប់រយកុងតឺន័រ ដែលយកមកស្ថាបនាស្ថានីយប្រព្រឹត្តិកម្មទឹកកខ្វក់នេះ គឺមានកំហុសដែលកើតមានឡើងមិនដល់មួយភាគរយទេ។
លោក រិទ្ធ អះអាងថា ការអនុវត្ដការងារជាក់ស្ដែងរបស់ក្រុមការងារ X-WATER ការងារវិស្វករកូនខ្មែរ ១ នាក់ អាចធ្វើការស្មើនឹងការងារវិស្វករបរទេស ២ នាក់ហើយវិស្វករខ្មែរមានតម្លៃសេវាតិចជាងបរទេសទៅទៀត។ តាមរយៈមហិច្ឆតាការងារដែលកូនខ្មែរធ្វើបាននេះ លោក រិទ្ធ បានប្ដេជ្ញាចិត្ដបន្តធ្វើការងារជាមួយរដ្ឋាភិបាលកម្ពុជា ដើម្បីរួមគ្នាស្ថាបនាស្ថានីយប្រព្រឹត្តិកម្មទឹកកខ្វក់នៅតាមរាជធានីខេត្ដផ្សេងទៀត ក្នុងការចូលរួមថែរក្សាបរិស្ថាន សមុទ្រ ទន្លេនៅក្នុងប្រទេសកម្ពុជា។
បើតាមលោក គួច ចំរើន អភិបាលខេត្ដ ព្រះសីហនុ ខេត្តព្រះសីហនុជាខេត្តដែលសម្បូរទៅដោយធនធានធម្មជាតិដ៏សម្បូរបែប គ្របដណ្តប់លើផ្ទៃដីសរុប ២ ៦៥៩ គីឡូម៉ែត្រការ៉េ ដែល ២/៣ ជាដីព្រៃភ្នំ និងខ្ពង់រាប។ ខេត្តមានកោះធំ-តូចចំនួន ៣២ និងឆ្នេរសមុទ្រប្រវែង ១៧៥,៨១ គីឡូម៉ែត្រ មានប្រជាជនសរុប ៣១០ ០៧២ នាក់ ដង់ស៊ីតេប្រជាជន ១១៦ នាក់ ក្នុង ១ គីឡូម៉ែត្រការ៉េ។
វិស័យដែលមានសក្តានុពល រួមចំណែកក្នុងការអភិវឌ្ឍសេដ្ឋកិច្ច ជាតិរួមមាន វិស័យសំណង់ អចលនទ្រព្យ ឧស្សាហកម្ម ពាណិជ្ជកម្ម ទេសចរណ៍ កសិឧស្សាហកម្ម និងមានកំពង់ផែសមុទ្រទឹកជ្រៅជាងគេក្នុងប្រទេសកម្ពុជា។ ខេត្តព្រះសីហនុមានអត្រាកំណើនសេដ្ឋកិច្ច ៦,៨% និងចំណូលជាមធ្យមសម្រាប់មនុស្សម្នាក់ (GDP) នៅឆ្នាំ ២០២០ មានចំនួន ៤ ៣៧៨ ដុល្លារអាមេរិកក្នុង ១ ឆ្នាំ ដោយបានកាត់បន្ថយអត្រាភាពក្រីក្រធ្លាក់ចុះមកនៅត្រឹម ២,៦៨% នៅដើមឆ្នាំ ២០២១។
ខេត្តព្រះសីហនុបានចូលជាសមាជិកក្លិបឆ្នេរសមុទ្រដ៏ស្រស់ស្អាតបំផុតលើសកលលោកក្នុងចំណោមខេត្តតំបន់ឆ្នេរចំនួន ៣ ទៀតក្នុងប្រទេសកម្ពុជាមានខេត្តកែប ខេត្តកំពត និងខេត្តកោះកុង។
រាជរដ្ឋាភិបាលបានបង្កើតក្រុមប្រឹក្សារៀបចំផែនការដើម្បីអភិវឌ្ឍខេត្តព្រះសីហនុទៅជាតំបន់សេដ្ឋកិច្ចពិសេសគំរូពហុបំណងដែលមានលោក ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាជាប្រធាន និងគណៈកម្មាធិការចំនួន ២ គឺគណៈកម្មាធិការសម្របសម្រួលអន្តរក្រសួងរៀបចំផែនការមេ ដឹកនាំដោយ លោក អូន ព័ន្ធមុនីរត្ន័ ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងគណៈកម្មាធិការបច្ចេកទេសអន្តរក្រសួងរៀបចំគោលនយោបាយគ្រប់គ្រង និងប្រើប្រាស់ដីធ្លី ដឹកនាំដោយ លោក ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់រួមជាមួយនឹងការបង្កើតក្រុមការងារបច្ចេកទេសមួយចំនួនទៀត។
ការបង្កើតគណៈកម្មាធិការទាំងនេះគឺដើម្បីដឹកនាំសម្របសម្រួលការរៀបចំផែនការមេ ដើម្បីអភិវឌ្ឍ ខេត្តព្រះសីហនុជាតំបន់សេដ្ឋកិច្ចពិសេសគំរូពហុបំណងស្របតាមគោលនយោបាយអភិវឌ្ឍន៍វិស័យឧស្សាហកម្មកម្ពុជា ឆ្នាំ ២០១៥-២០២៥ សំដៅជំរុញកំណើនសេដ្ឋកិច្ចជាតិឈានទៅសម្រេចបានជាប្រទេសមានចំណូលមធ្យមកម្រិតខ្ពស់នៅឆ្នាំ ២០៣០ និងជាប្រទេសមានចំណូលខ្ពស់ក្នុងឆ្នាំ ២០៥០។
ក្រោយពេលហេរដ្ឋារចនាសម្ព័ន្ធជាច្រើនបានរីកឡើងតាមរយៈស្នាដៃ និងថវិកាខ្មែរទាំងស្រុងដោយគ្មានបរទេសចូលរួម ដែលមានពាក្យស្លោកមួយ «ខ្មែរធ្វើបាន» ត្រូវបានលោកនាយករដ្ឋមន្ដ្រីបកស្រាយនៅក្នុងពិធីសំណេះសំណាលនៃដំណើរចុះត្រួតពិនិត្យវឌ្ឍនភាពគម្រោងសាងសង់ផ្លូវ ៣៤ ខ្សែក្នុងខេត្តព្រះសីហនុត្រង់ចំណុចកន្លែងពុះភ្នំធ្វើផ្លូវកាលពីថ្ងៃទី ១ ខែមិថុនាឆ្នាំ ២០២០។
លោកនាយករដ្ឋមន្ដ្រីថ្លែងពេលនោះថា៖ «វាមិនមែនតែបច្ចេកទេសពុះភ្នំដើម្បីកសាងផ្លូវទេ វាមានន័យទៅឆ្ងាយពីនេះនៅត្រង់ថា ការគិតក៏ខ្មែរ ការសាងសង់ក៏ខ្មែរ។ បច្ចេកទេសគូសប្លង់ និងការសាងសង់ទាំងអស់គឺបាតដៃកូនខ្មែរ។ ប្រាក់ទាំងអស់ គឺខ្មែរចេញទាំងអស់គ្មានបរទេសចូលរួមតែបន្តិច»។
លោកនាយករដ្ឋមន្ដ្រីបានបញ្ជាក់លើអត្ថន័យពាក្យនេះទៀតកាលពីថ្ងៃទី ១ ធ្នូ ២០២១ពេលចុះពិនិត្យសមិទ្ធផល ហេដ្ឋារចនាសម្ព័ន្ធនានានៅខេត្តព្រះសីហនុនេះថា ពាក្យ «ខ្មែរធ្វើបាន» គឺជាការបង្ហាញពីមោទនភាពជាតិដែលខ្មែរគ្រប់ជំនាន់ធ្វើបាន។ ខ្មែរធ្វើអង្គរវត្ត និងប្រាសាទដទៃទៀតហើយពាក្យ «ខ្មែរធ្វើបាន» នៅខេត្តព្រះសីហនុនេះគ្រាន់ជាការបញ្ជាក់ពីសមិទ្ធផលជាតិដែលខ្មែរជំនាន់ក្រោយធ្វើបានប៉ុណ្ណោះហើយទៅថ្ងៃអនាគតក៏ខ្មែរនៅតែធ្វើបានជានិច្ច៕
វីដេអូ៖
