ភ្នំពេញៈ មន្ទីរប្រឆាំងគ្រឿងញៀននៃក្រសួងមហាផ្ទៃ គ្រោងបញ្ជូនជនសង្ស័យជាមេខ្លោង និងបក្ខពួក ក្នុងបទល្មើសគ្រឿងញៀនជាង ២ តោន ទៅតុលាការរាជធានីភ្នំពេញនៅថ្ងៃទី ១៧ ធ្នូ នេះ ដើម្បីចាត់វិធានការបន្តទៅតាមនីតិវិធីច្បាប់។
លោក អ៊ិន សុង អ្នកនាំពាក្យមន្ទីរប្រឆាំងគ្រឿងញៀនក្រសួងមហាផ្ទៃប្រាប់ភ្នំពេញប៉ុស្តិ៍ថា នៅពេលនេះ ក្រុមមន្ត្រីនគរបាលជំនាញកំពុងបន្តនីតិវិធីស៊ើបសួរជនសង្ស័យនៅឡើយ ដោយសារសំណុំរឿងគ្រឿងញៀនដ៏ធំនេះមានជនសង្ស័យរហូតដល់ ១៣ នាក់។
លោកថ្លែងថា៖ «ករណីនេះជាករណីព្រហ្មទណ្ឌកម្រិតធ្ងន់ ដូច្នេះយើងមិនអាចសួរនាំជនសង្ស័យច្បោលៗបានទេ គឺត្រូវសួរដោយលម្អិត ដើម្បីស្រាវជ្រាវរកមុខសញ្ញាជនពាក់ព័ន្ធមួយចំនួនទៀត»។
កាលពីថ្ងៃទី ១៥ ធ្នូ មន្ទីរប្រឆាំងគ្រឿងញៀនបានធ្វើសំណើ ទៅស្ថាប័នអយ្យការអមសាលាដំបូងរាជធានីភ្នំពេញ ដើម្បីសុំពន្យារពេល ១ ថ្ងៃបន្ថែមទៀត សម្រាប់ដំណើរការនីតិវិធីនៃការស៊ើបសួរក្រុមជនសង្ស័យក្នុងសំណុំរឿងគ្រឿងញៀនដ៏ធំមួយនេះឱ្យបានលម្អិត។ ព្រោះយោងតាមនីតិវិធីក្រមព្រហ្មទណ្ឌ សមត្ថកិច្ចនគរបាលយុត្តិធម៌មានសិទ្ធិឃុំខ្លួនជនសង្ស័យក្នុងបទល្មើសព្រហ្មទណ្ឌ កម្រិតធ្ងន់បានដល់ ៧២ ម៉ោង។ លោក អ៊ិន សុង និយាយថាសំណើនោះត្រូវបានស្ថាប័នអយ្យការអនុញ្ញាតឱ្យហើយ។
លោកបញ្ជាក់ថា៖ «ទោះយ៉ាងណាយើងនឹងខិតខំពន្លឿនការស៊ើបសួរ ដើម្បីធ្វើយ៉ាងណារៀបចំ កសាងសំណុំរឿងជនសង្ស័យទាំងនោះ បញ្ជូនទៅតុលាការរាជធានីភ្នំពេញនៅក្នុងថ្ងៃសុក្រ [ទី ១៧ ធ្នូ] នេះ»។
បើតាមមន្ត្រីនាំពាក្យរូបនេះ ជនពាក់ព័ន្ធធំក្នុងសំណុំរឿងគ្រឿងញៀនដ៏ធំនេះ គឺមានតែ ៤ នាក់ប៉ុណ្ណោះ រួមមាន ឈ្មោះ Lee Tsung Han អាយុ ៣២ ឆ្នាំ ជនជាតិចិនតៃវ៉ាន់ បានស្លាប់ក្នុងពេលប៉ះទង្គិចដោយអាវុធជាមួយសមត្ថកិច្ចលើកំណាត់ផ្លូវជាតិលេខ ៤ ក្នុងភូមិសាស្ត្រស្រុកកំពង់សិលា ខេត្តព្រះសីហនុ។ ឈ្មោះ LY Po Han អ្នកបើកបររថយន្តដឹកគ្រឿងញៀន ១ ៤៨០ គីឡូក្រាម។
ឈ្មោះ YE YONG អាយុ ៤៨ ឆ្នាំ ជនជាតិចិនតៃវ៉ាន់ជាមេការគ្រប់គ្រងទីតាំងកែច្នៃគ្រឿងញៀនក្នុងរោងចក្រផលិតអាល់កុល ក្នុងភូមិដំបងវេញ ឃុំសង្កែសាទប ស្រុកឱរ៉ាល់ ខេត្តកំពង់ស្ពឺ។ រោងចក្រនេះជាកម្មសិទ្ធិរបស់មេខ្លោងធំ ឈ្មោះ Ye Yan Shou អាយុ ៥៨ ឆ្នាំ ជនជាតិចិនមានសញ្ជាតិខ្មែរជាប្រធានក្រុមប្រឹក្សាភិបាលនៃក្រុមហ៊ុន XIN YINFENG (CAMBODIA) INDUSTRY CO., LTD មានទីតាំង ស្ថិតនៅភូមិព្រៃទា សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។
លោក អ៊ិន សុង បន្ថែមថា រីឯជនសង្ស័យ ៩ នាក់ផ្សេងទៀត គឺជាកម្មករជាសន្តិសុខ និងជាចុងភៅ។ ក្នុងចំណោមពួកគេទាំងនេះមានអ្នកខ្លះអាចនឹងមិនដឹងរឿងអំពីរោងចក្រ ដែលពួកគេកំពុងបម្រើការងារនេះមានលួចលាក់ផលិតគ្រឿងញៀននោះទេ។ រីឯមួយចំនួនទៀតអាចដឹងរឿងខ្លះពីការនិយាយខ្សឹបខ្សៀវរបស់ជនសង្ស័យធំទាំង ៤ នាក់ខាងលើ។
លោកបញ្ជាក់ថា៖ «យើងនឹងសុំគោលការណ៍ពីព្រះរាជអាជ្ញា ដើម្បីពិចារណាទៅលើភាពសង្ស័យរបស់ពួកគេមុនពេលមានចំណាត់ការនីតិវិធី បញ្ជូនសំណុំរឿងទៅតុលាការនៅថ្ងៃសុក្រនេះ»។
គួររំឭកថា កម្លាំងសមត្ថកិច្ចមន្ទីរប្រឆាំងគ្រឿងញៀនកាលពីថ្ងៃទី ១២ ធ្នូ ឆ្នាំ ២០២១ សហការជាមួយកម្លាំងនគរបាលនៃស្នងការដ្ឋាននគរបាលរាជធានី-ខេត្តចំនួន ៤ រួមមាន រាជធានីភ្នំពេញ ខេត្តកំពង់ស្ពឺ ខេត្តព្រះសីហនុ និងខេត្តកោះកុង បានបង្ក្រាបករណីគ្រឿងញៀនទ្រង់ទ្រាយធំ ដោយរឹបអូសវត្ថុតាងគ្រឿងញៀនប្រភេទ Ketamine បានជាង ២ តោន និង សារធាតុគីមីផ្សំជាង ៨៤ តោន ព្រមទាំងអាវុធខ្លី K54 ១ ដើម ម៉ាស៊ីនកែច្នៃផលិតគ្រឿងញៀន ខ្នាតធំចំនួន ២០ គ្រឿង និងមធ្យោបាយ ដឹកជញ្ជូនមួយចំនួនទៀត៕