ភ្នំពេញៈ លោក គួច ចំរើន អភិបាលខេត្តព្រះសីហនុបញ្ជាឱ្យគណៈបញ្ជាការឯកភាពរដ្ឋបាលខេត្ត ក្រុង និងស្រុក ចុះពិនិត្យ និងចាត់វិធានការច្បាប់ឱ្យបានម៉ឺងម៉ាត់បំផុត ចំពោះជនប្រព្រឹត្តល្មើសច្បាប់ព្រៃឈើ ជលផល តំបន់ការពារធម្មជាតិ និងរំលោភច្បាប់ភូមិបាលដែលបានធ្វើការរំលោភបំពានកាន់កាប់ដីរដ្ឋ។
តាមរយៈលិខិតជូនដំណឹងដែលបង្ហាញទិដ្ឋភាពច្បាប់ព្រៃឈើ ជលផល តំបន់ការពារធម្មជាតិ និងច្បាប់ភូមិបាលកាលពីថ្ងៃទី ១៥ ធ្នូ លោក គួច ចំរើន បានបញ្ជាឱ្យគណៈបញ្ជាការឯកភាពរដ្ឋបាលខេត្ត ក្រុង ស្រុកត្រូវតែចុះពិនិត្យ និងចាត់វិធានការច្បាប់ឱ្យបានម៉ឺងម៉ាត់ចំពោះជនប្រព្រឹត្តល្មើសច្បាប់ទាំងនោះ។
ក្នុងលិខិតបញ្ជាក់ថា រដ្ឋបាលខេត្តព្រះសីហនុបានជូនដំណឹងដល់បុគ្គលពាក់ព័ន្ធរួមមាន អ្នកផ្តើមគំនិតអ្នកសមគំនិតអ្នកប្រព្រឹត្ត និងអ្នកញុះញង់ដែលបាន និងកំពុងរុករានទន្ទ្រានកាន់កាប់ កាប់ឆ្ការ ឈូសឆាយ ដុត ហ៊ុមព័ទ្ធសាងសង់សំណង់មិនរៀបរយ ស្នាក់នៅដាំដំណាំផ្សេងៗ នៅក្នុងដីគម្របព្រៃឈើ ដីព្រៃលិចទឹក ដីព្រៃកោងកាង ដីតំបន់អភិរក្ស។ លិខិតជូនដំណឹងបានប្រាប់ទៅអ្នកនៅលើដីស្ថានីយដាំឈើអូរថ្ម ដីឧទ្យានជាតិ ដីឧទ្យានជាតិសមុទ្រ របៀងអភិរក្ស ជីវចម្រុះ ដីតំបន់ប្រើប្រាស់ច្រើនយ៉ាង ព្រែកទឹកសាប ក្បាលឆាយ និងដីកម្មសិទិ្ធ ឯកជន ស្ថិតនៅក្នុងភូមិសាស្ត្រខេត្តព្រះសីហនុឱ្យបានដឹងថា សកម្មភាពទាំងអស់នោះ គឺជាបទល្មើស ដែលមានចែងក្នុងក្រមរដ្ឋប្បវេណី ក្រមព្រហ្មទណ្ឌ ច្បាប់ស្តីពីរដ្ឋបាលព្រៃឈើ ច្បាប់ស្តីពីជលផល ច្បាប់ស្តីពីតំបន់ការពារធម្មជាតិ និងច្បាប់ភូមិបាលដែលនៅជាធរមាន។ ហេតុនេះរដ្ឋបាលខេត្តព្រះសីហនុ អំពាវនាវជាថ្មីឱ្យចាកចេញ និងប្រគល់ដីជូនរដ្ឋវិញបើមិនដូច្នេះទេនឹងប្រឈមមុខផ្លូវច្បាប់។
លិខិតលោក គួច ចំរើន បញ្ជាក់ថា៖ «ក្នុងន័យនេះ ដើម្បីចៀសវាងការប្រឈមទោសទណ្ឌតាមផ្លូវច្បាប់ រដ្ឋបាលខេត្តព្រះសីហនុ សូមអំពាវនាវ ជាថ្មីម្តងទៀត ដល់បុគ្គលពាក់ព័ន្ធទាំងអស់ត្រូវបញ្ឈប់រាល់សកម្មភាពទាំងឡាយដូចមានរៀបរាប់ខាងលើដោយធ្វើការរុះរើសំណង់ផ្សេងៗ ហើយចាកចេញពីទីតាំងដី រួចប្រគល់ជូនអាជ្ញាធរកាន់កាប់ដីរដ្ឋ និងម្ចាស់កម្មសិទ្ធិស្របច្បាប់»។
លោក គួច ចំរើន បានបង្ហាញទិដ្ឋភាពច្បាប់ទាំងនោះដែលមានដូចជា មាត្រា ៩៧ និងមាត្រា ៩៨ នៃច្បាប់ស្តីពីព្រៃឈើ ដែលចែងថា ជនណាដែលបានប្រព្រឹត្តបទល្មើសដូចជាក្លែងបន្លំលិខិតសាធារណៈ ដែលពាក់ព័ន្ធនឹងវិស័យព្រៃឈើ ឬសត្វព្រៃ បំផ្លាញ លាក់បាំង លក់ ឬលួចវត្តុតាងព្រៃឈើ កម្ទេច ផ្លាស់ប្តូរ លុបបំបាត់ ឬធ្វើឱ្យខាតដល់ព្រំសីមានៃតំបន់ព្រៃឈើ កាន់កាប់រានព្រៃ ឈូសឆាយដី ព្រៃហ៊ុមព័ទ្ធកាន់កាប់ព្រៃ គ្រៀវ បំពុល កាប់បំផ្លាញ ផ្តួលរំលំដើមឈើ ឬគាស់រំលើងប្រមូលគល់ឈើ បង្កឱ្យភ្លើងឆេះព្រៃដោយចេតនាត្រូវផ្តន្ទាទោសក្រោមបទល្មើសព្រៃឈើថ្នាក់ទី ១ ដែលត្រូវជាប់ពន្ធនាគារពី ៥ ឆ្នាំ ទៅ ១០ ឆ្នាំ និងត្រូវរឹបអូសវត្ថុតាងទាំងអស់មកជាសម្បត្តិរដ្ឋ។ ករណីជនប្រព្រឹត្តបទល្មើសមិនរាងចាលត្រូវផ្តន្ទាទោសទ្វេដងនៃទោសខាងលើ។
ដោយឡែកមាត្រា ៩៨ នៃច្បាប់ស្តីពីជលផលបានចែងថា ត្រូវផ្តន្ទាទោសក្រោមបទល្មើសជលផលថ្នាក់ទី ១ ដែលត្រូវដាក់ពន្ធនាគារពី ៣ ទៅ ៥ ឆ្នាំ និងវត្ថុតាងទាំងអស់ត្រូវរឹបអូសជាសម្បត្តិរដ្ឋ ឬ បំផ្លាញចោល និងដកហូតកិច្ចព្រមព្រៀង ឬលិខិតអនុញ្ញាត ចំពោះជនណាដែលកាប់ឆ្ការគាស់រាន ឈូសឆាយ ព្រៃលិចទឹក និងព្រៃកោងកាង ឬហ៊ុមព័ទ្ធកាន់កាប់ព្រៃលិចទឹក និងព្រៃកោងកាង។ ចំពោះជនណាប្រព្រឹត្តបទល្មើសជលផលថ្នាក់ទី ១ ចាប់ពី ២ ដងឡើងទៅត្រូវផ្តន្ទាទោសទ្វេដងនៃបទល្មើសជលផលថ្នាក់ទី ១ នៃមាត្រានេះ។
លោក វ៉ាន់ លី មន្ត្រីអង្គការលីកាដូប្រចាំខេត្តព្រះសីហនុគាំទ្រចំណាត់ការរបស់រដ្ឋបាលខេត្តព្រះសីហនុ។ ទន្ទឹមនោះ លោកស្នើសុំដល់ពលរដ្ឋដែលបានទន្ទ្រានដីរដ្ឋដោយខុសច្បាប់ ប្រញាប់ចាកចេញចៀសវាងការទទួលទោសតាមច្បាប់។ ជាមួយគ្នានោះលោកក៏ស្នើសុំឱ្យរដ្ឋបាលខេត្ត អាជ្ញាធរខេត្ត មេត្តាពិនិត្យ និងចុះអនុវត្តឱ្យមានសមភាពរវាងអ្នកបំពានដែលជាពលរដ្ឋក្រីក្រ និងអ្នកមានលុយមានអំណាច។ លោកថ្លែងថា៖ «សូមអាជ្ញាធរចុះអនុវត្តឱ្យមានភាពស្មើគ្នាកុំឱ្យពេលដែលអ្នកក្រីក្រគាត់ទៅនៅមានការអនុវត្តផ្លូវច្បាប់ ប៉ុន្តែដល់ពេលដែលអ្នកមានលុយមានអំណាចបែរជាអាចទៅធ្វើទីតាំងហ្នឹងពាក់ព័ន្ធការរំលោភខុសច្បាប់ហើយ គ្រាន់តែឱ្យចាកចេញ ឬមិនអនុវត្តទៅតាមផ្លូវច្បាប់ចំពោះពួកគាត់នោះ»។ លោកថា ការមិនអនុវត្តចំពោះអ្នកមានលុយមានអំណាចគឺជាគំរូមិនល្អ សម្រាប់អ្នកផ្សេងទៀត នឹងហ៊ានប្រព្រឹត្តល្មើសបន្ថែម ប្រសិនបើគេមើលឃើញថា ការរំលោភលើដីរបស់រដ្ឋ ហើយមិនមានការដាក់ទោសទណ្ឌ។ យ៉ាងណាក៏ដោយ លោក វ៉ាន់ លី បញ្ជាក់ថា អាជ្ញាធរគួរតែពិនិត្យមើលឱ្យបានច្បាស់លាស់ប្រសិនពលរដ្ឋបានរស់នៅលើដីរដ្ឋយូរឆ្នាំមកហើយ គួរតែកាត់ឆ្វៀលប្រគល់ដីនោះជូនពួកគាត់៕
វីដេអូ៖