ភ្នំពេញៈ ក្រសួងសាធារណការ និងដឹកជញ្ជូនកំពុងធ្វើប្រតិភូកម្ម និងផ្ទេរមុខងារទៅថ្នាក់ក្រោមជាតិដោយផ្សព្វផ្សាយអំពីបែបបទ និងនីតិវិធីនៃការគ្រប់គ្រង និងការផ្តល់សេវារដ្ឋបាលក្នុងវិស័យដឹកជញ្ជូនផ្លូវគោកទៅរដ្ឋបាលក្រុង ស្រុក ខណ្ឌ ដើម្បីបង្កភាពងាយស្រួលដល់ពលរដ្ឋនាពេលខាងមុខក្នុងការទទួលសេវាសាធារណៈក្នុងវិស័យដឹកជញ្ជូនដែលនៅជិតមូលដ្ឋាន។
លោក ហៀង សុធាយុទ្ធ អ្នកនាំពាក្យក្រសួងសាធារណការ និងដឹកជញ្ជូនថ្លែងនៅថ្ងៃទី ១៦ ខែធ្នូថា ក្នុងនាមក្រសួងជំនាញត្រូវតែបណ្តុះបណ្តាលធ្វើប្រតិភូកម្ម និងផ្ទេរមុខងារជូនទៅថ្នាក់ក្រោមជាតិ ហេតុនេះកម្មវិធីផ្សព្វផ្សាយបណ្តុះបណ្តាលនឹងធ្វើឡើងជាបន្តបន្ទាប់។
លោកបានបញ្ជាក់ថា៖ «កម្មវិធីនេះមានជាបន្តបន្ទាប់ ព្រោះថា មួយពេលយើងមិនអាចធ្វើទាំងអស់បានទេ ដំបូងយើងផ្សព្វផ្សាយ ផ្សព្វផ្សាយហើយយើងបំពាក់សម្ភារ បំពាក់សម្ភាររួចហើយយើងបណ្តុះបណ្តាល ហើយចាប់ផ្តើមអនុវត្តបន្តបន្ទាប់ ព្រោះការងារថ្នាក់ក្រោមជាតិនេះ បើដំណើរការទាំងអស់គឺមានច្រកចេញចូលប្រមាណជាង ២០០ បើប្រៀបធៀបជាមួយចំនួនស្រុក»។
លោក សុធាយុទ្ធ បានបន្តថា ការងារនេះជាការងារធំមួយដែលត្រូវធ្វើជាមួយនឹងគ្រប់អង្គភាពថ្នាក់ក្រោមជាតិ ដើម្បីរុញសេវាសាធារណៈក្នុងវិស័យដឹកជញ្ជូនឱ្យទៅជិតប្រជាពលរដ្ឋ និងដើម្បីឱ្យប្រជាពលរដ្ឋអាចរកសេវាសាធារណៈក្នុងវិស័យមួយនេះបានក្នុងមូលដ្ឋានរបស់ខ្លួន។ លោកបញ្ជាក់ថាពលរដ្ឋអាចទទួលសេវាសាធារណៈក្នុងវិស័យដឹកជញ្ជូនកាន់តែទូលំទូលាយតាមរយៈអង្គភាពច្រកចេញចូលតែមួយ និងការិយាល័យច្រកចេញចូលតែមួយ។
លោកថ្លែងថា៖ «ការិយាល័យច្រកចេញចូលតែមួយគឺសំដៅនៅស្រុក ចំណែកអង្គភាពច្រកចេញចូលតែមួយ គឺសំដៅនៅខេត្ត អ៊ីចឹងគេធ្វើមាន ២ កម្រិតហ្នឹង ហើយមានសេវាមួយចំនួនគេធ្វើនៅក្រសួងទៅតាមប្រភេទ។
បើសេវាណាមានភាពងាយស្រួលហើយតម្រូវការប្រជាពលរដ្ឋច្រើនគេរុញទៅដល់ស្រុក ហើយថ្ងៃក្រោយគេរុញទៅដល់ថ្នាក់ក្រោមហ្នឹងទៀតដើម្បីកាន់តែងាយស្រួល»។
នៅថ្ងៃទី ១៤ និងទី ១៥ ខែធ្នូ ឆ្នាំ ២០២១ នៅសាលមហោស្រពខេត្តក្រចេះ លោក សួន រចនា រដ្ឋលេខាធិការក្រសួងសាធារណការ និងដឹកជញ្ជូនបានបើកសិក្ខាសាលាផ្សព្វផ្សាយលើកទី ៤ លើសេចក្តីណែនាំអំពីបែបបទ និងនីតិវិធីនៃការគ្រប់គ្រង និងការផ្តល់សេវារដ្ឋបាលក្នុងវិស័យដឹកជញ្ជូនផ្លូវគោកដល់ប្រធាន និងមន្ត្រីអនុវត្តមុខងារនេះមកពីខេត្តចំនួន ៦ រួមមាន ខេត្តក្រចេះ រតនគិរី មណ្ឌលគិរី ព្រះវិហារ ស្ទឹងត្រែង និងខេត្តកំពង់ធំ និងមានរដ្ឋបាលស្រុកចំនួន ៣១ ដែលមិនទាន់ទទួលបានការផ្សព្វផ្សាយដល់មន្ត្រីអនុវត្តមុខងារនៅថ្នាក់ក្រុង ស្រុក ខណ្ឌ មានសមាសភាពសរុប ១៥៣ នាក់ ស្រី ២០ នាក់។
ការផ្សព្វផ្សាយលើបែបបទ និងនីតិវិធីការគ្រប់គ្រងលើការអនុវត្តមុខងារក្នុងវិស័យដឹកជញ្ជូនផ្លូវគោកនេះមានមុខងារចំនួន ៤ រួមមាន ការគ្រប់គ្រងការចុះបញ្ជី និងការផ្តល់លិខិតអនុញ្ញាតធ្វើអាជីវកម្មយានដ្ឋានជួសជុល កែច្នៃដំឡើង ទោចក្រយានយន្ត សេវាចុះបញ្ជីទោចក្រយានយន្ត សេវាចុះបញ្ជីត្រីចក្រយានយន្ត និងរ៉ឺម៉កទោចក្រយានយន្ត និងការត្រួតពិនិត្យលក្ខណៈបច្ចេកទេសត្រីចក្រយានយន្ត និងទោចក្រយានយន្តសណ្តោងរ៉ឺម៉ក ។
លោក សុខ ភាក់ ប្រជាពលរដ្ឋនៅបន្ទាយមាស ខេត្តកំពតបានប្រាប់ភ្នំពេញប៉ុស្តិ៍នៅថ្ងៃទី ១៦ ខែធ្នូថា វិស័យសាធារណការ និងដឹកជញ្ជូន ប្រសិនបើមានការផ្ទេរមុខងារទៅដល់ថ្នាក់ស្រុកនោះ គឺជារឿងល្អ ហើយមានប្រយោជន៍សម្រាប់ប្រជាពលរដ្ឋនៅតាមមូលដ្ឋាន ព្រោះបង្កការងាយស្រួលក្នុងការស្វែងរកសេវា មិនចំណាយពេលវេលាច្រើន។
លោកបានថ្លែងថា៖ «វាល្អត្រង់ថាទី ១ គឺប្រជាពលរដ្ឋអត់ត្រូវការចំណាយពេលវេលាធ្វើដំណើរដើម្បីទៅធ្វើការចុះបញ្ជីចុះបណ្ណយានយន្ត ឬក៏អីអ៊ីចឹងទៅណា បើគាត់ធ្វើនៅមូលដ្ឋានអ៊ីចឹងវាជិត។ ចំណែកអាជ្ញាធរមូលដ្ឋានដែលធ្វើកិច្ចការហ្នឹងគឺគាត់អាចដឹងព័ត៌មានច្បាស់លាស់ជាងថា នៅភូមិណា ឃុំណាខ្លះ មានឡានម៉ូតូប៉ុន្មាន អីប៉ុន្មាន»៕