.jpg)
សកម្មភាពនគរបាល និងពលរដ្ឋកំពុងពន្លត់ភ្លើងឆេះផ្ទះ។ រូបថត ប៉ូលិស
ភ្នំពេញៈ សមត្ថកិច្ចមូលដ្ឋានបានឱ្យដឹងថា ភ្លើងឆេះផ្ទះស្តុកទំនិញមួយល្វែងនៅភូមិត្រពាំងល្វា ២ សង្កាត់កាកាប ១ ខណ្ឌពោធិ៍សែនជ័យ រាជធានី-ភ្នំពេញ កាលពីវេលា ១២:២០ នាទីរសៀល ថ្ងៃទី ១៦ ខែធ្នូ ឆ្នាំ ២០២១ ប៉ុន្តែមិនបណ្ដាលឱ្យមានគ្រោះថ្នាក់ដល់មនុស្សនោះទេ។
លោក ម៉ន វុធី អធិការខណ្ឌពោធិ៍សែនជ័យបានប្រាប់ភ្នំពេញប៉ុស្តិ៍ថា អគ្គិភ័យនេះមិនបង្កឱ្យមានពលរដ្ឋណាម្នាក់រងរបួសទេ ប៉ុន្តែបានខូចខាតទាំងស្រុងនូវផ្ទះស្តុកទំនិញមួយល្វែងទំហំ ៤១៦ ម៉ែត្រការ៉េ ដែលមានម្ចាស់ឈ្មោះ លី ឃុន អាយុ ៤០ ឆ្នាំ និង បានប៉ះពាល់ខូចខាតស្រាលដល់ផ្ទះអ្នកជិតខាងនៅក្បែរនោះ ២ ល្វែង។
លោកថ្លែងថា៖ «តាមសម្ដីរបស់បុរសម្ចាស់ផ្ទះឈ្មោះ លី ឃុន អគ្គិភ័យនេះបង្កឡើងមកពីការផ្ទុះឆ្លងចរន្តអគ្គិសនី ចេញពីប្រអប់បារ៉ែតភ្លើងនៅក្នុងផ្ទះរបស់គាត់ហើយឆេះរាលដល់ទំនិញជាប្រអប់ស្នោ ដែលគាត់បានស្តុកទុកនៅក្នុងផ្ទះនោះ»។ លោក វុធី ថ្លែងថា មុនពេលកម្លាំងអន្តរាគមន៍ ពន្លត់អគ្គិភ័យ ខណ្ឌពោធិ៍សែនជ័យ និង អង្គភាពពាក់ព័ន្ធមួយចំនួនទៀតទៅដល់ម្ចាស់ផ្ទះ និង ក្រុមគ្រួសារ រួមទាំងអ្នកជិតខាងរបស់គាត់បានព្យាយាមយកបំពង់ពន្លត់អគ្គិភ័យ ទៅបាញ់ពន្លត់អស់ជាច្រើនបំពង់ដែរ ប៉ុន្តែមិនអាចទប់ទល់នឹងកំសួលភ្លើងបាន ព្រោះទំនិញនៅក្នុងផ្ទះនោះ ភាគច្រើនជាជ័រ និងស្នោដែលងាយនឹងឆេះ។
ក្នុងឆ្នាំ ២០២១ គិតត្រឹមថ្ងៃទី ១៦ ខែធ្នូនេះ អគ្គិភ័យបានកើតឡើងនៅទូទាំងប្រទេសចំនួន ៦៨៥ លើកបង្កឱ្យមនុស្ស ២២ នាក់ស្លាប់ និង ៤០ នាក់ទៀតរងរបួស។ នេះបើយោងតាមទិន្នន័យ ដែលភ្នំពេញប៉ុស្តិ៍ទទួលបានពីនាយកដ្ឋានបង្ការពន្លត់អគ្គិភ័យ និងសង្គ្រោះក្រសួងមហាផ្ទៃ៕
