.jpg)
មន្ត្រី ក.ប.ប. ពេលចុះពិនិត្យនៅតាមស្ថានីយប្រេងឥន្ធនៈកាលពីថ្ងៃទី ១៥ ធ្នូ។ រូបថត ក.ប.ប.
ភ្នំពេញៈ នៅក្នុងឆ្នាំនេះ មន្ត្រីអគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) តាមរយៈចុះត្រួតពិនិត្យភាពមិនអនុលោមផ្នែកគុណភាពបរិមាណ និងតម្លៃលក់រាយប្រេងឥន្ធនៈ តាមបណ្តាស្ថានីយ និងដេប៉ូលក់ប្រេងឥន្ធនៈទូទាំងប្រទេសបានរកឃើញស្ថានីយ និងដេប៉ូ ៧៨៤ ទីតាំង ប្រកបអាជីវកម្មមិនស្មោះត្រង់ និងបានពិន័យអន្តរការណ៍ ៧៧៣ ករណី ព្រមទាំងបានកសាងសំណុំរឿងបញ្ជូនទៅតុលាការ ៧ ករណី។
លោក ផាន អូន ប្រតិភូរាជរដ្ឋាភិបាលទទួលបន្ទុកអគ្គនាយកនៃអគ្គនាយកដ្ឋាន (ក.ប.ប.) បានប្រាប់ភ្នំពេញប៉ុស្តិ៍នៅថ្ងៃទី ១៦ ខែធ្នូថា ក្នុងឆ្នាំ ២០២១ នេះមន្ត្រី (ក.ប.ប.) បានចុះត្រួតពិនិត្យភាពមិនអនុលោមផ្នែកគុណភាពបរិមាណ និងតម្លៃលក់រាយប្រេងឥន្ធនៈនៅតាមស្ថានីយ/ដេប៉ូលក់ប្រេងឥន្ធនៈនៅទូទាំងប្រទេសបានចំនួន ១ ៨៩៦ ស្ថានីយ/ដេប៉ូ ក្នុងនោះបានរកឃើញ ៧៨៤ ទីតាំងបានប្រកបអាជីវកម្មមិនស្មោះត្រង់។
លោកបានឱ្យដឹងថា ចំពោះដេប៉ូប្រេងដែលត្រូវបានរកឃើញធ្វើអាជីវកម្មមិនអនុលោមទៅនឹងច្បាប់ខាងលើត្រូវបានមន្ត្រី (ក.ប.ប.) អនុវត្តវិធានការពិន័យអន្តរការណ៍ទៅតាមប្រភេទ និងទំហំនៃបទល្មើសនីមួយៗចំនួន ៧៧៣ ករណី កសាងសំណុំរឿងបញ្ជូនទៅតុលាការចំនួន ៧ ករណី និងបានព្រមានជាលាយលក្ខអក្សរចំនួន ៤ ករណី។
លោក ផាន អូន ថ្លែងថា៖ «អគ្គនាយកដ្ឋាន (ក.ប.ប.) នឹងបន្តចុះត្រួតពិនិត្យ និងអនុវត្តវិធានការច្បាប់យ៉ាងម៉ឺងម៉ាត់បំផុតចំពោះបុគ្គលដែលប្រព្រឹត្តល្មើសនឹងច្បាប់ពាក់ព័ន្ធនឹងការធ្វើអាជីវកម្មប្រេងឥន្ធនៈនៅតាមបណ្តាស្ថានីយ និងដេប៉ូទូទាំងប្រទេស ដើម្បីទប់ស្កាត់ឱ្យបានការធ្វើអាជីវកម្មមិនស្មោះត្រង់កិបកេងយកផលចំណេញពីប្រជាពលរដ្ឋដែលជាអ្នកប្រើប្រាស់»។
កាលពីថ្ងៃទី ១៥ ខែធ្នូ មន្ត្រី (ក.ប.ប.) បានបន្តចុះត្រួតពិនិត្យលើស្ថានីយ និងដេប៉ូប្រេងឥន្ធនៈចំនួន ២២ ផ្សេងទៀតនៅក្នុងខេត្តកំពត ឧត្តរមានជ័យ ព្រៃវែង ព្រះសីហនុ និងខេត្តកំពង់ស្ពឺ ដោយបានរកឃើញដេប៉ូប្រេងឥន្ធនៈចំនួន ១០ ប្រព្រឹត្តល្មើសនឹងច្បាប់។
អគ្គនាយកដ្ឋាន (ក.ប.ប.) បានឱ្យដឹងថា ក្រោយពីបានរកឃើញដូចនេះ មន្ត្រី (ក.ប.ប.) បានធ្វើការពិន័យអន្តរការណ៍លើម្ចាស់ដេប៉ូទាំងនោះព្រមទាំងបានណែនាំឱ្យម្ចាស់ដេប៉ូកែសម្រួល និងបញ្ឈប់ការប្រព្រឹត្តល្មើសនឹងច្បាប់ដែលធ្វើឱ្យខាតបង់ដល់អ្នកប្រើប្រាស់ និងសង្គមជាតិ។
ជាមួយគ្នានេះ កាលពីថ្ងៃទី ១៤ ខែធ្នូ ឆ្នាំ ២០២១ មន្ត្រី (ក.ប.ប.) ក៏បានបានចុះត្រួតពិនិត្យស្ថានីយ និងដេប៉ូប្រេងឥន្ធនៈចំនួន ១៥ ស្ថិតក្នុងខេត្តកំពត កំពង់ស្ពឺ ព្រះសីហនុ និងខេត្តព្រៃវែងផងដែរ ក្នុងបំណងទប់ស្កាត់ ការប្រកបអាជីវកម្មដែលមិនសុចរិត និងដើម្បីការពារផលប្រយោជន៍ជូនអ្នកប្រើប្រាស់។
អគ្គនាយកដ្ឋាន (ក.ប.ប.) បញ្ជាក់ថា «ក្នុងប្រតិបត្តិការត្រួតពិនិត្យនេះមន្ត្រីជំនាញបានរកឃើញដេប៉ូប្រេងឥន្ធនៈចំនួន ៦ មិនអនុលោម។ ក្រោយពីបានរកឃើញដូចនេះមន្ត្រីជំនាញបានធ្វើការពិន័យអន្តរការណ៍ និងបានណែនាំដល់ម្ចាស់ដេប៉ូឱ្យប្រកបអាជីវកម្មរបស់ខ្លួនដោយគោរពទៅតាមច្បាប់ជាធរមាន»៕
វីដេអូ៖
