.jpg)
ភ្នំពេញៈ សមាជិកគណបក្សបេះដូងជាតិបានស្នើសុំពន្យារពេលចូលបំភ្លឺ ករណី «ក្លែងបន្លំ» តាមដីកាកោះហៅរបស់សាលាដំបូងរាជធានីភ្នំពេញនៅថ្ងៃទី ១៦ ធ្នូឆ្នាំ ២០២១ ដោយសំអាងទៅលើការទទួលបានដីកាកោះហៅក្នុងរយៈពេលខ្លី ខណៈពួកគេរស់នៅខេត្តឆ្ងាយ មិនអាចធ្វើដំណើរមកភ្នំពេញទាន់ពេល។
លោក សំ សុខគង់ មេធាវីការពារក្តីឱ្យគណបក្សបេះដូងជាតិប្រាប់ភ្នំពេញប៉ុស្តិ៍នៅថ្ងៃទី ១៦ ធ្នូថា មកទល់ពេលនេះមានសមាជិកគាំទ្រគណបក្សបេះដូងជាតិ ប្រមាណពី ៦ ទៅ ៧ នាក់ហើយដែលត្រូវបានសាលាដំបូងរាជធានីភ្នំពេញចេញដីកាកោះហៅឱ្យចូលបំភ្លឺករណីផ្តិតស្នាមមេដៃ គាំទ្រគណបក្ស ដើម្បីបានចុះបញ្ជីនៅក្រសួងមហាផ្ទៃ។ មានសមាជិកគាំទ្រខ្លះទើបទទួលបានដីកាកោះហៅនៅថ្ងៃទី ១៥ ធ្នូ ១៦ ធ្នូ និង ២ ឬ ៣ ថ្ងៃមុន ដែលបញ្ហានេះបានធ្វើឱ្យពួកគាត់ពិបាកក្នុងការចូលមកបំភ្លឺតាមកាលបរិច្ឆេទរបស់សាលាដំបូងរាជធានីភ្នំពេញ និងបានស្នើសុំពន្យារពេល ដើម្បីចូលទៅបំភ្លឺនៅថ្ងៃក្រោយ ដោយសារការទទួលដីកាមានភាពយឺតយ៉ាវរស់នៅឆ្ងាយ និងស្វែងរកមេធាវី ដើម្បីការពារក្តីមិនទាន់បាន។
លោកថ្លែងថា៖ «នៅព្រឹកមិញ (១៦ ធ្នូ) ពួកគាត់អត់បានចូលទៅបំភ្លឺទេ ដោយសារតែការទទួលដីកាហ្នឹង មានរយៈពេលខ្លីពេក គាត់មិនអាចត្រៀមខ្លួនក្នុងការរកជំនួយផ្នែកច្បាប់ ឬមេធាវី ការពារក្តីរបស់គាត់»។
លោក សៀម ភ្លុក ស្ថាបនិកគណបក្សបេះដូងជាតិប្រាប់ភ្នំពេញប៉ុស្តិ៍ថាលោកបានស្នើសុំទៅលោកមេធាវី សំ សុគង់ ដើម្បីពន្យារពេលចូលតាមការកោះហៅរបស់សាលាដំបូងរាជធានីភ្នំពេញ ដោយសារសមាជិកម្នាក់នៅខេត្តព្រៃវែងមានជំងឺ និងអ្នកខ្លះទៀតរស់នៅឆ្ងាយ។
តាមព័ត៌មានដែលលោកទទួលបានរហូតមកទល់ពេលនេះ មានសមាជិកចំនួន ៦ នាក់ហើយក្នុងនោះ ៣ នាក់នៅខេត្តព្រៃវែង និង ៣ នាក់នៅខេត្តសៀមរាប ត្រូវបានលោក សេង ហៀង ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ កោះហៅឱ្យចូលទៅបំភ្លឺក្នុងករណី «ក្លែងបន្លំ» នេះ។ ទោះជាយ៉ាងណា លោកចាត់ទុកការកោះហៅនេះ គឺជារូបភាពគំរាមកំហែង បំភិតបំភ័យ បំបាក់ស្មារតី ប្រជាពលរដ្ឋក្នុងបរិយាកាសនយោបាយជាក់ស្តែងដែលគួរឱ្យព្រួយបារម្ភ។
លោក ផ្លង់ សុផល អ្នកនាំពាក្យអយ្យការសាលាដំបូងរាជធានីភ្នំពេញថ្លែងនៅថ្ងៃទី ១៦ ធ្នូថា អយ្យការកំពុងស្ថិតនៅក្នុងនីតិវិធីដើម្បីស៊ើបអង្កេតដូច្នេះរាល់ព័ត៌មានស្តីពីលទ្ធផលនៃការស៊ើបអង្កេតត្រូវស្ថិតនៅជាការសម្ងាត់ហើយចំណាត់ការចុងក្រោយរបស់អយ្យការនឹងមានក្រោយពីបានស៊ើបអង្កេតចប់សព្វគ្រប់។
លោក សេង ហៀង ព្រះរាជអាជ្ញារងអយ្យការអមសាលាដំបូងរាជធានីភ្នំពេញ កាលពីថ្ងៃទី ៦ ធ្នូ ឆ្នាំ ២០២១ បានកោះហៅ អ្នកស្រី ស៊ីម ធាំ ភេទស្រី អាយុ ៦១ ឆ្នាំ បច្ចុប្បន្នរស់នៅភូមិត្រាវបាក់ ឃុំតាយ៉ែក ស្រុកសូទ្រនិគម ខេត្តសៀមរាប និងលោក ជា អ៊ាន ភេទប្រុស អាយុ ៦២ ឆ្នាំ រស់នៅភូមិងែកងក ឃុំបន្ទាយចក្រី ស្រុកព្រះស្តេច ខេត្តព្រៃវែង ឱ្យចូលបំភ្លឺនៅថ្ងៃទី ១៦ ធ្នូ ករណី «ក្លែងបន្លំ» ស្នាមមេដៃពាក់ព័ន្ធគណបក្សបេះដូងជាតិ៕
