.jpg)
ទិដ្ឋភាពគ្រោះថ្នាក់ចរាចរណ៍លើកំណាត់ផ្លូវលេខ ១១០ ក្នុងភូមិព្រែកដូង ឃុំកំពង់ស្វាយ ស្រុកកៀនស្វាយ។ រូបថត ហ្វេសប៊ុក
កណ្ដាលៈ មនុស្ស ៦ នាក់បានស្លាប់ និង ២ នាក់ទៀតរងរបួសធ្ងន់ ក្នុងគ្រោះថ្នាក់ចរាចរណ៍រវាងរថយន្ត និងម៉ូតូជាច្រើនគ្រឿង លើកំណាត់ផ្លូវលេខ ១១០ ក្នុងភូមិព្រែកដូង ឃុំកំពង់ស្វាយ ស្រុកកៀនស្វាយ ខេត្តកណ្ដាលកាលពីវេលាម៉ោង ១ រំលងអធ្រាត្រឈានចូលថ្ងៃទី ១៩ ខែធ្នូឆ្នាំ ២០២១។ នេះបើតាមការអះអាងរបស់លោក ព្រំ សំណាង អធិការស្រុកកៀនស្វាយ។
លោកថ្លែងថាមុនពេលកើតហេតុគេឃើញបុរសពីរនាក់ បើករថយន្តTUNDRA ពណ៌ក្រហមពាក់ស្លាកលេខភ្នំពេញ 2BM.4386 ធ្វើដំណើរយ៉ាងលឿន តាមបណ្តោយផ្លូវ ១១០ ក្នុងទិសដៅពីកើតទៅលិច។ មកដល់ចំណុចកើតហេតុខាងលើក៏មានម៉ូតូ៤គ្រឿងជិះប្រដេញគ្នាយ៉ាងលឿនផងដែរក្នុងទិសដៅបញ្ច្រាស់គ្នាជាមួយនឹងរថយន្ត។
លោកបានបញ្ជាក់ថា៖«ដោយខ្វះការប្រុងប្រយ័ត្នទាំងសងខាង និងក្នុងល្បឿនលឿនដូចគ្នា គ្រាដែលផ្លូវយើងមានភាពតូចចង្អៀត ធ្វើឲ្យភាគីទាំងសងខាង [រថយន្ត និងម៉ូតូ]បុកគ្នាពេញទំហឹងបណ្ដាលឲ្យស្លាប់នៅនឹងកន្លែង ៥ នាក់ភ្លាមៗនិងម្នាក់ទៀតបានស្លាប់តាមផ្លូវពេលដឹកយកទៅសង្គ្រោះនៅមុន្ទីរពេទ្យ។ ចំណែក ២ នាក់ទៀតរងរបួសធ្ងន់ កំពុងសម្រាកព្យាបាលនៅមន្ទីរពេទ្យបង្អែកស្រុកកៀនស្វាយ»។
លោកបានបន្ថែមថា នៅពេលនេះក្រុមសមត្ថកិច្ចជំនាញ កំពុងស្រាវជ្រាវ វាស់វែងនៅកន្លែងកើតហេតុ ខណៈភាគីខាងរថយន្ត កំពុងត្រូវបានឃាត់ខ្លួន និងសាកសួរដើម្បីកសាងសំណុំរឿង បញ្ជូនទៅតុលាការចាត់វិធានការបន្តតាមនីតិវិធីច្បាប់៕
