.jpg)
មន្ត្រីនៃមន្ទីរកសិកម្មខេត្តព្រះសីហនុ ចុះបង្ក្រាបបទល្មើសនេសាទ ក្នុងខែកញ្ញា ឆ្នាំ ២០២១។ រូបថត មន្ទីរកសិកម្មខេត្តព្រះសីហនុ
ព្រះសីហនុៈ មន្ទីរកសិកម្ម រុក្ខាប្រមាញ់និងនេសាទខេត្តព្រះសីហនុ បានបង្ក្រាបចាប់ជនសង្ស័យក្នុងបទល្មើសព្រៃឈើ និងជលផលយ៉ាងហោចណាស់ ១២ នាក់ បញ្ជូនទៅតុលាការ ដើម្បីចាត់វិធានការទៅតាមនីតិវិធី ក្នុងឆ្នាំ ២០២១ នេះ ខណៈជនសង្ស័យមួយចំនួនត្រូវបានចាប់ផាកពិន័យអន្តរការណ៍និងអប់រំណែនាំ ធ្វើកិច្ចសន្យាបញ្ឈប់រាល់សកម្មភាពបទល្មើសគ្រប់ទម្រង់។ នេះបើតាមមន្ត្រីជាន់ខ្ពស់នៃមន្ទីរកសិកម្មខេត្តព្រះសីហនុ។
លោក នេន ចំរើន ប្រធានមន្ទីរកសិកម្ម រុក្ខាប្រមាញ់និងនេសាទ ខេត្តព្រះសីហនុ ប្រាប់ភ្នំពេញប៉ុស្តិ៍នៅល្ងាចថ្ងៃទី ១៩ ខែធ្នូ ថា ក្នុងរយៈពេលជិតពេញ ១ ឆ្នាំ ២០២១ នេះ ក្រុមមន្ត្រីជំនាញ ខណ្ឌរដ្ឋបាលជលផល ខេត្តព្រះសីហនុ បានចុះល្បាតស្រាវជ្រាវ និងបង្ក្រាបបទល្មើសបានចំនួន ៥៧ លើក។ ក្នុងនោះបានប្រទះឃើញនិងបង្ក្រាបបទល្មើសបានចំនួន ៣០ លើក ដោយបានរុះរើ និងដុតបំផ្លាញចោលនូវខ្ទម និងខ្យូសខុសច្បាប់ចំនួន ៦ ខ្នង រនាស់ឈឹបសម្រាប់អូសចាប់ក្រែងឈាមចំនួន ១៦ គ្រឿង បង្គោលថ្មចំនួន ១៥៩ បង្គោល លបពោះវៀនជ្រូក [លូស្បៃមុង] ចំនួន ១ ១២២ គ្រឿង មានប្រវែង ៨ ៨៨៦ ម៉ែត្រ ។
លោកថ្លែងថា៖ «ទន្ទឹមនឹងនេះ ជនសង្ស័យចំនួន ២ [នាក់] ត្រូវបានសមត្ថកិច្ចរដ្ឋបាលជលផលយើង ចាប់បញ្ជូនទៅកាន់តុលាការខេត្តព្រះសីហនុ ដើម្បីចំណាត់ការតាមនីតិវិធីច្បាប់ ខណៈ ២ នាក់ទៀត ត្រូវបានមន្ត្រីជំនាញយើងធ្វើការផាកពិន័យអន្តរការណ៍ទៅតាមច្បាប់ស្ដីពីជលផល»។
លោកចំរើនឱ្យដឹងទៀតថា ក្នុងរយៈពេលដូចគ្នានេះផងដែរ សមត្ថកិច្ចរដ្ឋបាលព្រៃឈើខេត្តព្រះសីហនុ បានចុះប្រតិបត្តិការស្រាវជ្រាវ និងបង្ក្រាបបទល្មើសព្រៃឈើ និងសត្វព្រៃបានចំនួន ១៥៣ លើក។ ក្នុងនោះបានជួបប្រទះ និងបង្ក្រាបបទល្មើសបានចំនួន ៧៧ លើក ដោយបានរុះរើ និងកាប់បំផ្លាញចោលបង្គោលរបងឈើគ្រាក់ ចំនួន ៨០ ដើម ខ្ទមចំនួន ៦៦ ខ្នង វាយបំផ្លាញចោលបន្ទប់ទឹក ១ ល្វែងមាន ៥ បន្ទប់ និងបំផ្លាញចោលនូវសម្ភារសំណង់មួយចំនួនទៀត។
លោកបញ្ជាក់ថា៖ «ក្នុងប្រតិបត្តិការបង្ក្រាបបទល្មើសព្រៃឈើ និងសត្វព្រៃនេះផងដែរ សមត្ថកិច្ចយើងបានចាប់ខ្លួនជនសង្ស័យសរុប ១៣ នាក់ ក្នុងនោះ ១០ នាក់ត្រូវបានកសាងសំណុំរឿងបញ្ជូនទៅតុលាការ និង៣នាក់ទៀត ត្រូវបានអប់រំណែនាំ និងផាកពិន័យអន្តរការណ៍»។
បើតាមលោក នេន ចំរើន នៅពេលនេះ ក្រុមមន្ត្រីជំនាញកំពុងបន្តកិច្ចខិតខំប្រឹងប្រែង អនុវត្តការងារ ទៅតាមតួនាទី និងភារកិច្ចរបស់ខ្លួន ក្នុងការចុះផ្សព្វផ្សាយអប់រំបន្ថែមទៀត អំពីច្បាប់ជលផល និងព្រៃឈើ ដល់ប្រជានេសាទ និង ប្រជាកសិករ នៅតាមមូលដ្ឋាន ដើម្បីឱ្យពួកគាត់ចូលរួមការពារធនធានជលផល ព្រៃឈើ និងសត្វព្រៃនៅកម្ពុជា។ ព្រោះការងារ ការពារធនធានជលផល ព្រៃឈើ និងសត្វព្រៃ គឺទាមទារឱ្យមានការចូលរួមពីគ្រប់ភាគីពាក់ព័ន្ធទាំងអស់ ពិសេសពីប្រជាសហគមន៍ក្នុងមូលដ្ឋានតែម្ដង៕
