ភ្នំពេញៈអ្នកជំនួញលក់ឡេម្នាក់ ត្រូវក្រុមចោរប្រដាប់អាវុធ សម្រុកចូលភ្ជង់កាំភ្លើងប្លន់ក្នុងផ្ទះកាលពីវេលាម៉ោងជាង ១០ ព្រឹកថ្ងៃទី ១៩ ធ្នូ ឆ្នាំ ២០២១ យកគ្រឿងអលង្ការ និងប្រាក់សរុបអស់ជាង ៩ លានដុល្លារ ក្នុងផ្ទះនៅបុរីមូនថោន ក្នុងភូមិចំបក់ សង្កាត់ចោមចៅទី១ ខណ្ឌ ពោធិសែនជ័យ។
លោក ម៉ន វុធី អធិការនគរបាល ខណ្ឌ ពោធិសែនជ័យ ប្រាប់នៅរសៀលថ្ងៃទី ១៩ ធ្នូ ថា ស្ត្រីជាម្ចាស់ផ្ទះរងគ្រោះឈ្មោះ អ៊ាន សៀវម៉ី ជាអ្នកជំនួញលក់ឡេ។
លោកថ្លែងថា៖ «អំពើប្លន់ប្រដាប់អាវុធនេះ ម្ចាស់ផ្ទះ មិនរងគ្រោះអីដល់អាយុជីវិតទេ ហើយសមត្ថកិច្ចជំនាញកំពុងធ្វើការងារនេះ»។
ទោះយ៉ាងណា លោក ម៉ន វុធី មិនបានបញ្ជាក់លម្អិត ពាក់ព័ន្ធនឹងហេតុការណ៍នេះទេ។
ប៉ុន្តែបើយោងមន្ត្រីនគរបាលខណ្ឌពោធិ៍សែនជ័យមួយរូប សុំមិនឱ្យបញ្ចេញឈ្មោះ បានប្រាប់នៅរសៀលថ្ងៃទី ១៩ ធ្នូនេះថា ហេតុការណ៍នេះ បានកើតឡើងនៅចន្លោះម៉ោង ១០ ទៅម៉ោង ១១ ព្រឹកថ្ងៃទី ១៩ ធ្នូ ស្ថិតនៅផ្ទះវីឡាមួយ ក្នុងភូមិគោកចំបក់ សង្កាត់ ចោមចៅទៅ១ ខណ្ឌ សែនសុខ។
ក្នុងហេតុការណ៍នេះ ក្រុមជនសង្ស័យ មានគ្នាប្រមាណជាពី ៣ ទៅ ៤ នាក់ ប្រដាប់ដោយអាវុធវែងខ្លីបានជិះរថយន្តចូលទៅក្នុងបុរីឈ្មោះ មូនថោន ដែលជាទីតាំងផ្ទះរបស់ជនរងគ្រោះ ហើយធ្វើសកម្មភាពប្លន់តែម្តង។
មុនឈានដល់ការប្លន់ គឺក្រុមចោរ បានក្លែងធ្វើជាសមត្ថកិច្ចនគរបាល ចុះអនុវត្តសាលដីកា ខណៈក្រុមគ្រួសាររបស់ជនរងគ្រោះរៀបចំចេញដំណើរទៅខេត្តកំពង់ស្ពឺ។
មន្ត្រីនគរបាលដដែលបញ្ជាក់ថា ជនរងគ្រោះ មិនដឹងច្បាស់ថា ក្រុមចោរមានគ្នាប៉ុន្មាននាក់ឱ្យប្រាដកនោះទេ ក៏ប៉ុន្តែនៅពេលធ្វើសកម្មភាពប្លន់នោះ គេបានឃើញបុរសពី ៣ ទៅ ៤ នាក់ បានយកកាំភ្លើងខ្លីភ្ជង់ម្ចាស់ផ្ទះ ឱ្យនាំទៅរកកន្លែងទូដែក ហើយបង្ខំឱ្យបើកយកគ្រឿងអលង្ការ។ ពេលប្លន់បានទ្រព្យសម្បត្តិហើយ ក្រុមចោរនាំគ្នាឡើងរថយន្តបើកគេចខ្លួនបាត់អស់។
មន្ត្រីរូបនេះបញ្ជាក់ថា៖ «ករណីនេះ ម្ចាស់ផ្ទះរងគ្រោះ គាត់មិនហ៊ានទូរស័ព្ទទេ ព្រោះមនុស្សនៅក្នុងផ្ទះប្រហែល ៦-៧ នាក់ត្រូវបានក្រុមចោរភ្ជង់កាំភ្លើងមិនឱ្យកម្រើកខ្លួនទេ»៕