កណ្ដាលៈ ក្នុងរយៈពេល ១ ថ្ងៃ មានទំនិញខូចគុណភាពប្រមាណ ៦០០ គីឡូក្រាម និងអាល់កុលក្លែងក្លាយ (មេតាណុល) ជិត ១ ពាន់លីត្រ ត្រូវបានមន្ត្រីអគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប.) សាខាខេត្តចំនួន ៤ បានរកឃើញ និងដកហូត កម្ទេចចោល។
ក្នុងយុទ្ធនាការត្រួតពិនិត្យទំនិញគ្រប់ប្រភេទដែលកំពុងចរាចរលើទីផ្សារសំដៅធានាការពារនូវសុខុមាលភាពជូនប្រជាពលរដ្ឋនិងការពារសិទ្ធិជូនអ្នកប្រើប្រាស់កាលពីថ្ងៃទី ១៧ ខែ ធ្នូ ឆ្នាំ ២០២១ មន្ត្រីជំនាញ ក.ប.ប. សាខាខេត្តបាត់ដំបង កណ្ដាល កំពង់ចាម និងខេត្តកំពង់ធំ បានរកឃើញទំនិញហួសកាលបរិច្ឆេទ និងខូចគុណភាពចំនួន ៥៦៨,៥ គីឡូក្រាម
និងអាល់កុលក្លែងក្លាយ (មេតាណុល) ចំនួន ៩៧៨ លីត្រ។
ក្រោយរកឃើញ ទំនិញទាំងនោះត្រូវបានមន្ត្រីជំនាញដកហូតយកមកកម្ទេចចោល រីឯម្ចាស់ទំនិញត្រូវបានពិន័យអន្តរការណ៍តាមនីតិវិធីផងដែរ។
កាលពីថ្ងៃទី ១៦ ខែធ្នូ មន្ត្រីជំនាញ ក.ប.ប. សាខាខេត្តកោះកុង និងខេត្តព្រះសីហនុ បានបន្តចុះត្រួតពិនិត្យភាពមិនអនុលោមលើទំនិញគ្រប់ប្រភេទនៅលើទីផ្សារ និងចែកខិត្តប័ណ្ណផ្សព្វផ្សាយស្ដីពីផលប៉ះពាល់នៃសារធាតុអាសបេស្ដុស (ASBESTOS) តាមហាងលក់គ្រឿងសំណង់ផងដែរ។
តាមលទ្ធផលត្រួតពិនិត្យមន្ត្រីជំនាញបានរកឃើញទំនិញខូចគុណភាព និងហួសកាលបរិច្ឆេទប្រើប្រាស់ ៥,៨ គីឡូក្រាម ដែលបានដាក់ចរាចរលក់លើទីផ្សារហើយបានដកហូតមករក្សាទុក ដើម្បីបន្តនីតិវិធី និងពិន័យអន្តរការណ៍។
ចំណែកកាលពីថ្ងៃទី ១៥ ខែធ្នូ មន្ត្រីក.ប.ប.បានបន្តចុះពិនិត្យទីផ្សារក្នុងភូមិសាស្ត្រខេត្តព្រះសីហនុ ខេត្តតាកែវ និងរាជធានីភ្នំពេញ ដោយរកឃើញទំនិញខូចគុណភាព និងទំនិញក្លែងក្លាយ ឬទំនិញគ្មានស្លាកសញ្ញាត្រឹមត្រូវនៅលើទីផ្សាចំនួន ៤៥១ គីឡូក្រាម ផងដែរ។
តាមការចុះផ្សាយរបស់មន្ត្រី ក.ប.ប បានឱ្យដឹងថា គិតក្នុងរយៈពេល ៥ ថ្ងៃ ដោយគិតចាប់ពីថ្ងៃទី ១៣ ដល់ថ្ងៃទី ១៧ ធ្នូ ទំនិញខូចគុណភាពដែលរឹបអូសបានមានជាង ១ តោនកន្លះ។
ដោយឡែកពាក់ព័ន្ធស្ថានីយប្រេងឥន្ធនៈវិញក្នុងរយៈពេល ១១ ខែ ឆ្នាំ ២០២១ នេះ មន្ត្រីអគ្គនាយកដ្ឋាន (ក.ប.ប) តាមរយៈការចុះត្រួតពិនិត្យភាពមិនអនុលោមផ្នែកគុណភាពបរិមាណ និងតម្លៃលក់រាយប្រេងឥន្ធនៈតាមបណ្តាស្ថានីយនិងដេប៉ូលក់ប្រេងឥន្ធនៈទូទាំងប្រទេសបានរកឃើញស្ថានីយ និងដេប៉ូ ៧៨៤ ទីតាំង ប្រកបអាជីវកម្មមិនស្មោះត្រង់ និងបានពិន័យអន្តរការណ៍ ៧៧៣ ករណី ព្រមទាំងបានកសាងសំណុំរឿងបញ្ជូនទៅតុលាការ ៧ ករណី។
ក្រោយពីបានរកឃើញដូចនេះ មន្ត្រី ក.ប.ប. បានណែនាំឱ្យម្ចាស់អាជីវកម្មទាំងនោះកែសម្រួល និងបញ្ឈប់ការប្រព្រឹត្តល្មើសនឹងច្បាប់ដែលធ្វើឱ្យខាតបង់ដល់អ្នកប្រើប្រាស់ និងសង្គមជាតិ៕