ភ្នំពេញៈ សាលាដំបូងរាជធានីភ្នំពេញ មិនពិចារណាសម្រេចបណ្តឹងរបស់មន្ត្រីហ្វុ៊នស៊ិនប៉ិច ៤ រូប ពាក់ព័ន្ធនឹងការស្នើសុំឱ្យចេញដីកាសម្រេចចាត់ចែងកំណត់ឋានៈជាបណ្តោះអាសន្ន ដោយសុំរក្សាសមាជិកភាពបក្សរបស់ខ្លួន នៅក្នុងគណបក្សនយោបាយដែលកំពុងមានបញ្ហាផ្ទៃក្នុង។ មន្ត្រីបក្សទាំង ៤ រូបនោះ មាន លោក ចាប ញ៉ាលីវុធ លោក ហេង ចាន់ថា លោក សាយ ហាក់ និង លោក ផាន់ សិទ្ធី ត្រូវបានបណ្ដេញចេញពីគណបក្ស។
យោងតាមដីកាសម្រេចរក្សាការពារ ដែលចុះហត្ថលេខាដោយលោក កូយ សៅ អនុប្រធានសាលាដំបូងរាជធានីភ្នំពេញ កាលពីថ្ងៃទី ១៧ ខែ ធ្នូ ឆ្នាំ ២០២១ បានឱ្យដឹងថា ការប្តឹងសុំឱ្យតុលាការចេញដីកាសម្រេចចាត់ចែង កំណត់ឋានៈជាបណ្តោះអាសន្នរបស់បុគ្គលទាំង ៤ នោះ គឺតុលាការមិនពិចារណា សម្រេចនោះឡើយ។
លោក កូយ សៅ ពន្យល់ថា ករណីនេះ ពាក់ព័ន្ធនិងជាសមត្ថកិច្ចរបស់ក្រសួងមហាផ្ទៃ ស្របតាមច្បាប់។ ដូចនេះ តុលាការសម្រេចលើកចោលពាក្យសុំរបស់ម្ចាស់បំណុល ចុះថ្ងៃទី ២២ ខែ តុលា ឆ្នាំ ២០២១។
លោក ផាន់ សិទ្ធី ដែលបានប្តឹងទៅតុលាការឱ្យរក្សាឈ្មោះនៅក្នុងបញ្ជីគណបក្សហ្វុ៊នស៊ិនប៉ិចឡើងវិញនោះ បានប្រាប់ ភ្នំពេញ ប៉ុស្តិ៍ នៅថ្ងៃទី ១៩ ខែ ធ្នូ ឆ្នាំ ២០២១ ថា លោកបានទទួលយកសេចក្តីសម្រេចនេះរួចហើយ និងបន្តប្តឹងទៅក្រសួងមហាផ្ទៃវិញនៅក្នុងសប្តាហ៍នេះ ព្រោះក្រសួងមហាផ្ទៃ គឺជាអាណាព្យាបាលរបស់គណបក្សនយោបាយ។
លោកថា នឹងដាក់ពាក្យបណ្តឹងទៅក្រសួងមហាផ្ទៃបន្តទៀត ដើម្បីឱ្យស្ថាប័ននេះ ពិនិត្យឡើងវិញនូវសមាជិកភាពរបស់លោកនិងអ្នកផ្សេងនៅក្នុងសប្តាហ៍នេះ និងរកដំណោះស្រាយបញ្ចប់នៅមុនឆ្នាំ ២០២២ ខាងមុខនេះ ព្រោះដំណើរការនៃការបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៥ កាន់តែខិតជិតចូលមកដល់ដែលត្រូវការពេល ដើម្បីរៀបចំបេក្ខភាពក្រុមប្រឹក្សាឃុំសង្កាត់។
ទោះជាយ៉ាងណាលោកថា លោកមិនចង់ដាក់ពាក្យឱ្យពិនិត្យសមាជិកភាពរបស់ខ្លួនឡើងវិញនោះទេ ប៉ុន្តែ ភាគីព្រះអង្គម្ចាស់ នរោត្តម ចក្រាវុឌ្ឍ ទេ ដែលមានភាពតឹងតែងដោយព្រះអង្គតែងតែបញ្ឈប់ ឬបណ្តេញសមាជិកចេញពីគណបក្ស។ តាមពិត គឺមិនត្រូវបញ្ឈប់នរណាម្នាក់នោះទេ ព្រោះសមាជិកភាគច្រើន គឺមិនមែនអ្នកថ្មីនោះទេ គឺសុទ្ធតែអ្នកធ្វើការយូរណាស់មកហើយ។
លោកថ្លែងថា៖ «ព្រះអង្គម្ចាស់ នរោត្តម ចក្រាវុឌ្ឍ អត់ប្រាប់គេពីកំហុសទេ ដឹងតែបញ្ឈប់គេតែម្ដង ប៉ុន្តែបើប្រាប់ថា វាខុសនេះ ឬខុសនោះសិនទៅអត់? ដឹងថា ដកតួនាទី បណ្តេញចេញពីបក្ស។ លោកធ្វើនេះ ខុសនីតិវិធីរដ្ឋបាលទាំងស្រុង»។
លោក ផាន់ សុទ្ធី ថា លោកក៏មានបំណងស្វែងរកដំណោះស្រាយបញ្ចប់ ពីព្រះអង្គម្ចាស់ នរោត្តម ចក្រាវុឌ្ឍ ប្រកបដោយសន្តិវិធី និងឯកភាពគ្នា ឱ្យបានកាន់តែឆាប់កាន់តែល្អ ដើម្បីត្រៀមរៀបចំ ដាក់បេក្ខភាពក្រុមប្រឹក្សា-ឃុំ-សង្កាត់ សម្រាប់ធ្វើការបោះឆ្នោតនៅពេលខាងមុខ ប៉ុន្តែខាងភាគីព្រះអង្គម្ចាស់ ចក្រាវុឌ្ឍ ហាក់មិនមានឆន្ទៈនោះទេ។
លោកថ្លែងថា៖ «ដោះស្រាយបានកាន់តែឆាប់កាន់តែល្អ បើអូសបន្លាយយូរ ការដាក់បេក្ខភាពក្រុមប្រឹក្សាឃុំ-សង្កាត់ គឺមិនបានល្អ ព្រោះយើងនៅបែកគ្នា ពាសវាល ពាសកាល អ៊ីចឹង វាមិនអាចបន្ទោសអ្នកណាទេ វាជាកម្សោយរបស់គណបក្ស»។
លោក ញឿន រ៉ាដែន អ្នកនាំពាក្យគណបក្សហ្វុ៊នស៊ិនប៉ិច ថ្លែងប្រាប់ ភ្នំពេញ ប៉ុស្តិ៍ នៅថ្ងៃទី ១៩ ខែ ធ្នូ ឆ្នាំ ២០២១ ថា ការសម្រេចលើកចោលមិនចាត់ការរបស់សាលាដំបូងរាជធានីភ្នំពេញ លើបុគ្គលទាំង ៤ រូបនោះ គឺអាចទទួលយកបាន និងត្រឹមត្រូវស្របតាមច្បាប់។ ចំពោះការបន្តប្តឹងទៅក្រសួងមហាផ្ទៃទៀត វាជាសិទ្ធិរបស់អ្នកទាំង ៤ រូបនោះ ប៉ុន្តែការសម្រេចយ៉ាងណា វាអាស្រ័យលើក្រសួងមហាផ្ទៃ។
លោក រ៉ាដែន បញ្ជាក់ថា ព្រះអង្គម្ចាស់នរោត្តម ចក្រាវុឌ្ឍ ដែលធ្លាប់បានដង្ហែអតីតសម្តេចក្រុមព្រះនរោត្តម រណឫទ្ធិ គឺព្រះអង្គតែងតែបង្ហាញការរួបរួម និងមិនចង់ឈ្លោះគ្នានោះទេ ដើម្បីធ្វើយ៉ាងណាឱ្យគណបក្សមានភាពរឹងមាំ និងឈានទៅរក ភាពជោគជ័យនៅពេលខាងមុខ។
លោកថ្លែងថា៖ «លោក ផាន់ សិទ្ធី និងបក្ខពួក បានយល់ច្រឡំដោយខ្លួនឯង តាមពិតគណបក្សហ្វុ៊នស៊ិនប៉ិច ដែលមានព្រះអង្គម្ចាស់ ចក្រាវុធ ដឹកនាំមិនមានបញ្ហានោះទេ ប៉ុន្តែមានតែលោក សិទ្ធី ទេ ដែលមិនសប្បាយចិត្តខ្លួនឯង។ លោកគួរតែបញ្ឈប់ការប្តឹងប្តល់ និងមកថ្វាយបង្គំលោក ប្រាប់ពីមូលហេតុវិញទៅជាការស្រេច»៕