The Phnom Penh Post Search

Search form




Logo of Phnom Penh Post newspaper Phnom Penh Post - រដ្ឋមន្ត្រី​មហាផ្ទៃ​ស្នើ​រាជធានី​-ខេត្ត សហការ​ជាមួយ​ក្រសួង​អប់រំ​រៀបចំ​ប្រឡង​បាក់​ឌុប​ក្នុង​ស្មារតី​ទទួលខុសត្រូវ​

រដ្ឋមន្ត្រី​មហាផ្ទៃ​ស្នើ​រាជធានី​-ខេត្ត សហការ​ជាមួយ​ក្រសួង​អប់រំ​រៀបចំ​ប្រឡង​បាក់​ឌុប​ក្នុង​ស្មារតី​ទទួលខុសត្រូវ​

Content image - Phnom Penh Post
លោក ហង់ជួន ណារ៉ុន​​ បើកវិញ្ញាសាប្រឡងបាក់ឌុប នៅវិទ្យាល័យព្រះស៊ីវត្ថិ ពីឆ្នាំ ២០១៩។ ហ៊ាន រង្សី

រដ្ឋមន្ត្រី​មហាផ្ទៃ​ស្នើ​រាជធានី​-ខេត្ត សហការ​ជាមួយ​ក្រសួង​អប់រំ​រៀបចំ​ប្រឡង​បាក់​ឌុប​ក្នុង​ស្មារតី​ទទួលខុសត្រូវ​

​ភ្នំពេញៈ ឧបនាយករដ្ឋមន្ដ្រី រដ្ឋមន្ដ្រី​ក្រសួងមហាផ្ទៃ លោ​ក ស ខេង ស្នើ​ដល់​អភិបាល​រាជធានី​ខេត្ត​ត្រូវ​ផ្ដល់​កិច្ច​​សហការ​ជាមួយ​ក្រសួង​អប់រំ យុវជន និង​កីឡា ដោយមាន​ការចូលរួម​ពី​ស្ថាប័ន អង្គភាព​ជំនាញ​ពាក់ព័ន្ធ និង​អាជ្ញាធរ​​មូលដ្ឋាន ក្នុង​ដំណើរ​ការប្រឡង​សញ្ញា​​ប​ត្រ​មធ្យមសិក្សា​ទុតិយភូមិ នា​ថ្ងៃទី​ ២៧-២៨ ខែធ្នូ ប្រកបដោយ​ស្មារតី​ទទួលខុសត្រូវ​ខ្ពស់​។​

​លិខិត​របស់លោក​ស ខេង ចុះ​ថ្ងៃទី ​១៧ ខែធ្នូ បាន​បញ្ជាក់ថា ដើម្បីឱ្យ​កិច្ចដំណើរការ​នៃ​ការប្រឡង​សញ្ញាបត្រ​មធ្យមសិក្សា​ទុតិយភូមិ​នៅ​ថ្ងៃទី​ ២៧-២៨ ខែ ធ្នូ ឆ្នាំ ​២០២១ ប្រព្រឹត្ត​ទៅដោយ​​រលូន និង​ទទួលបាន​ជោគជ័យ​តាម​ការ​​គ្រោងទុក ក្រសួងមហាផ្ទៃ​ស្នើ​លោក លោកស្រី​អភិបាល នៃ​គណៈ​អភិបាល​រាជធានី​ខេត្ត ត្រូវ​ផ្តល់​កិច្ចសហការ​ជាមួយ​ក្រសួង​អប់រំ ដោយមាន​ការចូល​​រួម​ពី​ស្ថាប័ន អង្គភាព​ជំនាញ​ពាក់ព័ន្ធ និង​អាជ្ញាធរ​មូលដ្ឋាន ដើម្បី​ចាត់​​វិធានការ​ចាំបាច់​មួយ​ចំនួន​សម្រាប់​បម្រើឱ្យ​ការប្រឡង​។​

​លោក​បញ្ជាក់ថា វិធានការ​ចាំបាច់​សម្រាប់​បម្រើឱ្យ​ការប្រឡង​ទាំងនោះ រួមមានរៀបចំ​កម្លាំង​ការពារ​សន្តិសុខ សុវត្ថិភាព រក្សា​សណ្តាប់ធ្នាប់ និង​របៀបរៀបរយ​តាម​មណ្ឌល​ប្រឡង​ទូទាំង​រាជធានី-ខេត្ត-ក្រុង-ស្រុក​មួយចំនួន និង​មណ្ឌល​កំណែ​ទាំង​ ១០ ​នៅ​រាជធានី​​ភ្នំពេញ​។ រក្សា​សុវត្ថិភាព​ក្នុង​ការដឹក​ជញ្ជូន និង​ការរក្សា​ទុកដាក់​ហឹប​ប្រធាន​វិញ្ញាសា និង​ដុំ​កិច្ចការ​បេក្ខជន នៅតាម​​សាលា​រាជធានី​-ខេត្ត-ក្រុង​ និង​ស្រុក​មួយ​​ចំនួន​។ រក្សា​សន្តិសុខ និង​សុវត្ថិភាព​ដល់​គណៈមេប្រយោគ​គ្រប់លំដាប់​ថ្នាក់​នៅ​គ្រប់​ដំណាក់កាល​នៃ​ការប្រឡង​។​

​លោក​ក៏បាន​ស្នើឱ្យ​អភិបាល​រាជធានី​-​ខេត្ដ ចាត់វិធានការ​ទប់ស្កាត់​ការថត​​ចម្លង​នូវ​សំណៅ​ឯកសារ​ផ្សេងៗ​ពាក់ព័ន្ធ នឹង​ការប្រឡង​តាម​គ្រប់​រូបភាព ជា​ពិសេស​ការផ្អាក​អាជីវកម្ម​ថតចម្លង​ឯកសារ​នៅ​ជុំវិញ​បរិវេណ​មណ្ឌល​​ប្រឡង​។ លោក​ក៏បាន​ប្រាប់​ឱ្យ​អភិ​​បាល​រាជធានី​ខេត្ដ រក្សា​សន្តិសុខ និង​សុវត្ថិភាព​ដល់​បេក្ខជន មាតាបិតា ឬ​អាណាព្យាបាល ដែល​មក​ស្នាក់នៅ​ទី​រួម​ខេត្ត​-​រាជធានី ក្រុង​និង​ស្រុក​មួយចំនួន ដែលមាន​មណ្ឌល​ប្រឡង ព្រមទាំង​ជួយ​អន្តរាគមន៍​ដល់​ម្ចាស់ផ្ទះ​សំណាក់ សណ្ឋាគារ ភោជនីយដ្ឋាន និង​អាហារ​​ដ្ឋា​ន ដើម្បី​កុំឱ្យ​ដំឡើងថ្លៃ​សេវា​។

​រក្សាទុក​ និង​ប្រគល់ជូន​បេក្ខជន ​ឬ​គណៈមេប្រយោគ​វិញ​នូវ​ឧបករណ៍​អេ​​ឡិច​ត្រូ​និក​គ្រប់​ប្រភេទ ​ដែល​បាន​ដកហូត​ក្នុង​ដំណើរការ​សំណេរ​។ ផ្តល់​រថយន្ត​សង្គ្រោះ និង​បុគ្គលិក​សុខាភិបាល​ប្រចាំការ​នៅតាម​មណ្ឌល​ប្រឡង ដើម្បី​ជួយសង្គ្រោះ​ដល់​បេក្ខជន​ និង​គណៈ​​មេ​ប្រយោគ​ដែលមាន​បញ្ហា​សុខភាព​។ ជួយ​សម្រួល​ចរាចរណ៍​ដល់​បេក្ខជន និង​គណៈមេប្រយោគ ដើម្បី​ធ្វើដំណើរ​ទៅ​មណ្ឌល​ប្រឡង​ឱ្យបាន​ទាន់ពេល​កំណត់​។ ទប់ស្កាត់​បាតុភាព​មិន​ប្រក្រតី​នានា​ដែល​អាច​កើតមាន​ជាយថាហេតុ​។​

​លោ​ក ស ខេង ក៏​ប្រាប់​ឱ្យ​អភិបាល​-​រាជធានី ខេត្ត ណែនាំ​អភិបាល ក្រុង ស្រុក ខណ្ឌ ដែលមាន​មណ្ឌល​ប្រឡង និង​ប្រធានការិយាល័យ​អប់រំ យុវជន និង​កីឡា​នៃ​រដ្ឋបាល​ក្រុង ស្រុក ខណ្ឌ ទទួលខុសត្រូវ នៅ​ចំពោះមុខ​រដ្ឋមន្ត្រី ក្រសួង​អប់រំ យុវជន និង​កីឡា លើ​ការរក្សា នូវ​សុខ​សុវត្ថិភាព​នៅតាម​មណ្ឌល​ប្រឡង​ផងដែរ​។​

​លោក​ រស់ សុ​វាចា អ្នកនាំពាក្យ​ក្រសួង​​អប់រំ យុវជន និង​កីឡា ថ្លែង​នៅ​ថ្ងៃទី​ ១៩ ធ្នូថា សម្រាប់​បច្ចុប្បន្នភាព​នៃ​ការប្រព្រឹត្តទៅ​នៃ​ការប្រឡង​បាក់​ឌុប​ឆ្នាំនេះ ក្រសួង​​អប់រំ​នឹង​រៀបចំ​សន្និសីទ​សារព័ត៌មាន​ស្ដីពី​ «​ដំណើរ​ការរៀប​ចំការ​ប្រឡង​សញ្ញា​​ប​ត្រ​មធ្យមសិក្សា​ទុតិយភូមិ​ចំណេះ​ទូទៅ និង​បំពេញវិជ្ជា សម័យ​ប្រឡង ២៧ ធ្នូ​នេះ​» នៅ​ថ្ងៃទី ​២០ ធ្នូ​នេះ ក្រោម​អធិបតីភាព លោក​ ហង់​ជួន ណា​រ៉ុ​ន រដ្ឋមន្ដ្រីក្រសួង​អប់រំ យុវជន និង​កីឡា ជា​វាគ្មិន នៅ​ទីស្ដីការក្រសួង​អប់រំ​។

​លោក​ថ្លែងថា​៖ «​តាម​យន្តការ​ឆ្នាំកន្លងមក ក្រសួង​អប់រំ យុវជន និង​កីឡា​ ស្នើ​កិច្ច​សហការ​ពី​ក្រសួងមហាផ្ទៃ អង្គភាព​​ប្រឆាំង​អំពើពុករលួយ សហភាព​សហ​​ព័ន្ធ​យុវជន​កម្ពុជា ក្រសួង ស្ថាប័ន​ពាក់ព័ន្ធ អាជ្ញាធរ​មូលដ្ឋាន ចូលរួម​គ្រប់​ដំណាក់​​កាល​នៃ​ដំណើរការ​ប្រឡង​បាក់​ឌុប​សម័យ ប្រឡង​ ២៧ ធ្នូ ២០២១ ដើម្បី​បន្ត​អនុវត្ត​គោលការណ៍​ច្បាប់ យុត្តិធម៌ តម្លាភាព និង​លទ្ធផល​ទទួលយកបាន ស្រប​នឹង​វិធានការ​សុវត្ថិភាព​សុខភាព​»​។

​លោក​បញ្ជាក់ថា នៅ​ទូទាំងប្រទេសដំណើរការ​រៀបចំ​ប្រឡង​បាក់​ឌុប​បាននិងកំពុង​ប្រព្រឹត្ត​ទៅតាម​ការគ្រោងទុក​។ ពិន្ទុ​ដែល​បេក្ខជន​ប្រឡង​ត្រូវធ្វើ​ឱ្យបាន​ដើម្បី​ប្រឡង​ជាប់​គឺ ២៣៧ ​ពិន្ទុ នៃ​ពិន្ទុសរុប​ចំនួន ៥០០ ​ពិន្ទុ​។ បើតាម​លោក​ សុ​វាចា តាម​ទិន្នន័យបឋម ចំនួន​បេក្ខជន​ប្រឡង​បាក់​ឌុប​ឆ្នាំនេះ​មាន​ចំនួន ​១១៥ ១៣៩​ នាក់ ក្នុងនោះ​មាន​បេ​ក្ខ​នារី​ចំនួន ​៦០ ៦៦១​ នាក់​។ មាន​មណ្ឌល​ប្រឡង​ចំនួន​ ២០៤​ មណ្ឌល បន្ទប់​ប្រឡង ​៤ ៦៥២​ បន្ទប់​។ ក្រៅពីនេះ គណ​:​កម្ម​ការ​អប្បមាទ​ចំនួន​ ៦១២​ នាក់ និង​ជំនួយការ​អប្បមាទ​១ ៥៧៨ ​នាក់​៕

អត្ថបទគួរចាប់អារម្មណ៍