.jpg)
គ្រោះថ្នាក់ចរាចរណ៍រវាងរថយន្ត និងម៉ូតូ បុកបញ្ច្រាសទិសគ្នាលើកំណាត់ផ្លូវលេខ ១១០ ក្នុងស្រុកកៀនស្វាយ ខេត្តកណ្ដាល។ រូបថត ហ្វេសប៊ុក
កណ្ដាលៈ មនុស្ស ៦ នាក់បានស្លាប់ និង ២ នាក់របួសធ្ងន់ ក្នុងគ្រោះថ្នាក់ចរាចរណ៍រវាងរថយន្ត និងម៉ូតូជាច្រើនគ្រឿង បុកបញ្ច្រាសទិសគ្នាលើកំណាត់ផ្លូវលេខ ១១០ ក្នុងភូមិព្រែកដូង ឃុំកំពង់ស្វាយ ស្រុកកៀនស្វាយ ខេត្តកណ្ដាល កាលពីវេលាម៉ោង ១ រំលងអ្រធាត្រ ឈានចូលថ្ងៃទី ១៩ ខែ ធ្នូ ឆ្នាំ ២០២១។ នេះបើតាមការអះអាងរបស់លោក ព្រំ សំណាង អធិការស្រុកកៀនស្វាយ។
លោកថ្លែងថា មុនពេលកើតហេតុគេឃើញបុរស ២ នាក់ បើករថយន្ត TUNDRA ពណ៌ក្រហមពាក់ស្លាកលេខ ភ្នំពេញ 2BM-4386 ធ្វើដំណើរយ៉ាងលឿន តាមបណ្តោយផ្លូវ ១១០ ក្នុងទិសដៅពីកើតទៅលិច។ មកដល់ចំណុចកើតហេតុ ក៏មានម៉ូតូ ៤ គ្រឿង មានគ្នា ៨ នាក់ ជិះប្រដេញគ្នាយ៉ាងលឿននៅលើដងផ្លូវដ៏តូចចង្អៀតនេះដែរ។
លោកបានបញ្ជាក់ថា៖ «ដោយខ្វះការប្រុងប្រយ័ត្ន រថយន្តនិងម៉ូតូទាំងនោះ ដែលបើកបរក្នុងទិសដៅបញ្ច្រាសគ្នា ក៏បានបុកគ្នាយ៉ាងពេញទំហឹងបណ្ដាលឱ្យស្លាប់នៅកន្លែង (កើតហេតុ) ៥ នាក់ភ្លាមៗ និងម្នាក់ទៀតបានស្លាប់តាមផ្លូវពេលដឹកយកទៅសង្គ្រោះនៅមុន្ទីរពេទ្យ ចំណែក ២ នាក់ទៀតរងរបួសធ្ងន់ កំពុងសម្រាកព្យាបាលនៅមន្ទីរពហុព្យាបាល និងសម្ភពម្លិះ»។
យោងតាមរបាយការណ៍របស់សមត្ថកិច្ចនគរបាលជំនាញផ្នែកចរាចរណ៍ស្រុកកៀនស្វាយ ដែល ភ្នំពេញ ប៉ុស្តិ៍ ទទួលបាននៅរសៀលថ្ងៃទី ១៩ ខែធ្នូ បានឱ្យដឹងថា យុវជនរងគ្រោះដែលស្លាប់ភ្លាមៗនៅនឹងកន្លែងកើតហេតុ រួមមាន ឈ្មោះ រស់ ប៊ុនលី អាយុ ១៨ ឆ្នាំ វ៉ាត ផានិត អាយុ ២១ ឆ្នាំ ព្រំ មេសា អាយុ ១៧ ឆ្នាំ ផុន ភារ៉ា អាយុ ២១ ឆ្នាំ និងឈ្មោះ បូ ប្រុសវីន អាយុ ១៩ ឆ្នាំ។ អ្នកទាំង ៥ មានលំនៅក្នុងស្រុកកៀនស្វាយ ខេត្តកណ្តាល។ រីឯយុវជនដែលស្លាប់ក្នុងពេលបញ្ជូនទៅកាន់មន្ទីរពេទ្យ ឈ្មោះ សឿន មាន អាយុ ១៧ ឆ្នាំ មានលំនៅក្នុងស្រុកកៀនស្វាយ។
ចំណែកយុវជនឈ្មោះ សុខ សុបញ្ញា អាយុ ២០ ឆ្នាំ និង ឈ្មោះ ជិន សុជាតិ អាយុ ២០ ឆ្នាំ ដែលរងរបួសធ្ងន់ និងកំពុងសម្រាកព្យាបាលនៅក្នុងមន្ទីរពេទ្យនៅឡើយនោះ ពួកគេទាំង ២ នាក់ មានលំនៅក្នុងភូមិ-សង្កាត់ព្រែកថ្មី ខណ្ឌមានជ័យ រាជធានីភ្នំពេញ។ ដោយឡែកអ្នកបើកបររថយន្តឈ្មោះ លី ចំណាន អាយុ ៣១ ឆ្នាំ មានលំនៅក្នុងឃុំកំពង់ស្វាយ ស្រុកកៀនស្វាយ ខេត្តកណ្ដាលនិង អ្នករួមដំណើរឈ្មោះ ណម ប៊ុនថាន់ អាយុ ២២ ឆ្នាំ មានលំនៅក្នុងឃុំឈើទាល ស្រុកកៀនស្វាយផងដែរនោះ ត្រូវបានកម្លាំងសមត្ថកិច្ចចាប់ឃាត់ខ្លួនយកមកសាកសួរនៅអធិការដ្ឋាននគរបាលស្រុកក្រៀនស្វាយ ដើម្បីកសាងសំណុំរឿងបញ្ជូនទៅតុលាការចាត់ការបន្តតាមនីតិវិធីច្បាប់។
លោក ហង្ស ផាណារ៉ា អធិការរងស្រុកកៀនស្វាយ ទទួលបន្ទុកផ្នែកចរាចរណ៍ បានប្រាប់ ភ្នំពេញ ប៉ុស្តិ៍ថា៖ «ករណីគ្រោះថ្នាក់ចរាចរណ៍នេះ គឺបង្កឡើងដោយភាពធ្វេសប្រហែសរបស់អ្នកបើកបររថយន្ត ដែលមិនប្រកាន់ស្ដាំ ឬមិនគោរពចំណែកទ្រូងផ្លូវជាអាទិភាព និងបើកបរដោយល្បឿនលឿន»។
លោកបានបន្ថែមថា៖ «ទោះយ៉ាងណាក៏ដោយនៅកន្លែងកើតហេតុ សមត្ថកិច្ចយើងប្រមូលបានវត្ថុតាង ជាអាវុធដាវសាំមូរ៉ៃកែច្នៃចំនួន ៣ ដើម និងកាំបិទខ្វែវ ១ ដើម ដែលជារបស់ក្រុមយុវជនរងគ្រោះដែលជិះម៉ូតូ»។
លោក សំណាង ថា ក្រុមសមត្ថកិច្ច កំពុងបន្តស្រាវជ្រាវលើករណីអាវុធដែលប្រមូលបាននៅកន្លែងកើតហេតុ ជាវត្ថុតាងដូចជា ដាវ និងកាំបិត ព្រមទាំងរថយន្ត ១ គ្រឿង និងម៉ូតូ ៤ គ្រឿង ត្រូវបានសមត្ថកិច្ច នាំយកមករក្សាទុកនៅអធិការដ្ឋាននគរបាលស្រុកកៀនស្វាយ ដើម្បីកសាងសំណុំរឿងតាមនីតិវិធី។ លោកថា៖ «តាមធម្មតា ពលរដ្ឋសាមញ្ញ មិនដែលជិះម៉ូតូពេលយប់ជ្រៅបែបនេះ ហើយដាក់ដាវកាំបិតជាប់ខ្លួននោះទេ»៕
វីដេអូ៖
