ភ្នំពេញៈ សាលាដំបូងរាជធានីភ្នំពេញបានសម្រេចឃុំខ្លួនបុរសជនជាតិចិន ៣ នាក់ នៅល្ងាចថ្ងៃទី ២០ ខែធ្នូ ដោយចោទប្រកាន់ក្នុងម្នាក់ៗ ២ បទល្មើស ទាក់ទងក្នុងបទល្មើសគ្រឿងញៀនជាង ២ តោនដែលសមត្ថកិច្ចបានបង្ក្រាបចាប់ខ្លួនកាលពីថ្ងៃទី ១២ ខែធ្នូ។ នេះបើតាមមន្ត្រីនាំពាក្យ មន្ទីរប្រឆាំងគ្រឿងញៀន។
លោក អ៊ិន សុង អ្នកនាំពាក្យ នគរបាលមន្ទីរប្រឆាំងគ្រឿងញៀនបានប្រាប់ភ្នំពេញប៉ុស្តិ៍ថា ជនសង្ស័យ ឈ្មោះ YE YAN SHOU អាយុ ៥៨ ឆ្នាំជាមេក្លោងក្នុងបទល្មើសគ្រឿងញៀនដ៏ធំនេះ និង បក្ខពួក ២ នាក់ទៀត រួមមានឈ្មោះ YE YONG អាយុ ៤៨ ឆ្នាំជាមេការគ្រប់គ្រងរោងចក្រកែច្នៃគ្រឿងញៀនក្នុងខេត្តកំពង់ស្ពឺ និង ឈ្មោះ Ly Po Han អាយុ ៣២ ឆ្នាំត្រូវបានតុលាការរាជធានីភ្នំពេញ សម្រេចឃុំខ្លួនជាបណ្ដោះអាសន្នក្នុងពន្ធនាគារព្រៃស។
លោកបានប្រាប់ឱ្យដឹងទៀតថា ចំណែកជនសង្ស័យ ៩ នាក់ផ្សេងទៀត ដែលជាកម្មករ សន្តិសុខ និង ជាអ្នកបើកបររថយន្ត ហើយជាជនជាតិខ្មែរនោះត្រូវបានអនុញ្ញាតឱ្យវិលត្រឡប់ទៅផ្ទះវិញ ប៉ុន្តែក្នុងចំណោមពួកគេទាំង ៩ នាក់ មាន ៣ នាក់ ដែលបានដឹងរឿងខ្លះៗ ពីការខ្សឹបខ្សៀវរបស់ជនសង្ស័យជាមេខ្លោងជួញដូរគ្រឿងញៀននេះ ត្រូវបានកម្លាំងសមត្ថកិច្ចជំនាញចាត់ទុកឱ្យធ្វើជាសាក្សី នៅក្នុងសំណុំរឿងគ្រឿងញៀនដ៏ធំនេះ។
លោក ប្លង់ សុផល អ្នកនាំពាក្យអយ្យការអមសាលាដំបូងរាជធានីភ្នំពេញនាព្រឹកថ្ងៃទី ២០ ខែធ្នូ ឆ្នាំ ២០២១ ថ្លែងថា ជនសង្ស័យឈ្មោះ YE YAN SHOU និង បក្ខពួក ឈ្មោះ YE YONG និង ឈ្មោះ Ly Po Han ត្រូវបានលោក សេង ហៀង តំណាងអយ្យការអមសាលាដំបូងរាជធានីភ្នំពេញ បើកការស៊ើបសួរតាំងពីថ្ងៃទី ១៨ ខែធ្នូ ឆ្នាំ ២០២១។
លោក សុផល បានបញ្ជាក់ថា៖ «ជនសង្ស័យទាំង ៣ ត្រូវបានចោទប្រកាន់ពីបទផលិត ដឹកជញ្ជូន ជួញដូរដោយខុសច្បាប់នូវសារធាតុញៀន និងបទសម្អាតប្រាក់ តាមមាត្រា ៤០ មាត្រា ៤៧ មាត្រា ៤៨ និងមាត្រា ៣៨ នៃច្បាប់ស្តីពីការត្រួតពិនិត្យគ្រឿងញៀន និងច្បាប់ស្តីពីការប្រឆាំងការសម្អាតប្រាក់ និងហិរញ្ញប្បទានភេរវកម្ម»។
កាលពីថ្ងៃទី ១២ ខែធ្នូឆ្នាំ ២០២១ កម្លាំងសមត្ថកិច្ចនគរបាលមន្ទីរប្រឆាំងគ្រឿងញៀន ក្រសួងមហាផ្ទៃ បានសហការជាមួយកម្លាំងជំនាញប្រឆាំងគ្រឿងញៀននៃស្នងការដ្ឋានរាជធានី-ខេត្តចំនួន ៤ រួមមាន រាជធានីភ្នំពេញ ខេត្តកំពង់ស្ពឺ ខេត្តព្រះសីហនុ និង ខេត្តកោះកុង បង្ក្រាបករណីបទល្មើសគ្រឿងញៀនចំនួន ២ ធំៗ លើគោលដៅ ៣ ទីតាំងផ្សេងគ្នាក្នុងថ្ងៃតែមួយ។ ក្នុងនោះករណីទី ១ គឺករណីដឹកជញ្ជូនគ្រឿងញៀន មាន ២ គោលដៅដោយគោលដៅទី ១ នៅលើកំណាត់ផ្លូវជាតិលេខ ៤ ក្នុងភូមិសាស្ត្រ ស្រុកកំពង់សីលា ខេត្តព្រះសីហនុ សមត្ថកិច្ចបង្ក្រាបចាប់បានជនសង្ស័យម្នាក់ ឈ្មោះ Ly Po Han ជាមួយថ្នាំញៀន ប្រភេទ Ketamine ចំនួន ១ ៤៨០ គីឡូក្រាម ខណៈជនសង្ស័យម្នាក់ទៀត ឈ្មោះ LEE TSUNG HAN បានសម្លាប់នៅកន្លែង បន្ទាប់ពីជននេះបានបើករថយន្តបុកបារ៉ាស់ត្រួតពិនិត្យរបស់សមត្ថកិច្ច ហើយបាញ់ប្រហារលើសមត្ថកិច្ច ធ្វើឱ្យសមត្ថកិច្ចតបតដោយអាវុធ។
បន្ទាប់មកនៅគោលដៅទី ២ គឺ នៅរោងចក្រផលិតអាល់កុល ១ កន្លែង ក្នុងភូមិសាស្ត្រឃុំសង្កែសាទប ស្រុកឱរ៉ាល់ ខេត្តកំពង់ស្ពឺ សមត្ថកិច្ចបានចាប់ឃាត់ខ្លួនមេការម្នាក់ទៀត ឈ្មោះ YE YONG និងរឹបអូសបានគ្រឿងញៀន ប្រភេទ Ketamine ចំនួនជាង ៧៥៣ គីឡូក្រាមបន្ថែមទៀត រួមទាំងសារធាតុគីមីផ្សំចំនួនជាង ៨៤ តោន ព្រមទាំងស្រាវជ្រាវ ចាប់ឃាត់ខ្លួនកម្មករ សន្តិសុខ និង អ្នកបើកបររថយន្តជនជាតិខែ្មរ សរុប ៩ នាក់បន្ថែមទៀត។
ចំណែកមេខ្លោងធំ ឈ្មោះ YE YAN SHOU ត្រូវបានចាប់ខ្លួនក្នុងភូមិសាស្ត្រ ខណ្ឌពោធិ៍សែនជ័យ រាជធានីភ្នំពេញ ក្នុងករណីទី ២ គឺការដឹកនាំការផលិតគ្រឿងញៀននៅកម្ពុជា ព្រោះរោងចក្រផលិតអាល់កុលនោះ ជាផ្នែកមួយរបស់ក្រុមហ៊ុន XIN YINFENG (CAMBODIA) INDUSTRY CO., LTD ដែលមានជននេះជាប្រធានក្រុមប្រឹក្សាភិបាល។
នៅថ្ងៃទី ១៨ ខែធ្នូឆ្នាំ ២០២១ នគរបាលជំនាញខេត្តកំពង់ស្ពឺក៏បានស្រាវជ្រាវបង្ក្រាបចាប់ខ្លួនមនុស្សម្នាក់ និងរឹបអូសបានថ្នាំញៀនប្រភេទ Methamphetamine ជាង ១,៣ គីឡូក្រាម ក្នុងករណីផ្សេង៕