ភ្នំពេញៈ លោក ហេង សំរិន ប្រធានរដ្ឋសភាបានអំពាវនាវដល់ថ្នាក់ដឹកនាំព្រះពុទ្ធសាសនាទាំងអស់សូមបន្តការប្រកាន់ខ្ជាប់នូវការយោគយល់គ្នា គោរពគ្នាតាមឋានានុក្រមសំដៅធ្វើឱ្យមានការឯកភាព សាមគ្គីភាព ក្នុងស្ថាប័នព្រះពុទ្ធសាសនា ខណៈដែលលោកលើកឡើងថា វិស័យព្រះពុទ្ធសាសនា នៅមានបញ្ហាប្រឈមមួយចំនួន។
ក្នុងពិធីបើកអនុសំវច្ឆរៈមហាសន្និបាតមន្ត្រីសង្ឃទូទាំងប្រទេសលើកទី ២៩ ដែលត្រូវបានធ្វើឡើងកាលពីព្រឹកថ្ងៃទី ២០ ធ្នូ ឆ្នាំ ២០២១ នៅឯសាលសន្និសីទចតុមុខក្នុងរាជធានីភ្នំពេញ លោក ហេង សំរិន បានថ្លែងថា ព្រះរាជាណាចក្រកម្ពុជា បានផ្តល់តម្លៃខ្ពស់លើការអភិវឌ្ឍវិស័យសាសនា ដែលក្នុងនោះ មានការគោរពសេរីភាពខាងជំនឿ និងសាសនា ការលើកស្ទួយព្រះពុទ្ធសាសនា ដែលជាសាសនារបស់រដ្ឋ និងការគាំទ្រការគោរពប្រតិបត្តិសាសនាដទៃទៀត ដើម្បីសាមគ្គីភាព និងសុខដុមរមនានៃសង្គមជាតិ។ រាជរដ្ឋាភិបាលបានខិតខំធ្វើឱ្យវត្តអារាម និងវិហារសាសនាផ្សេងៗទៀត ក្លាយជាមជ្ឈមណ្ឌលជីវភាពខាងស្មារតី ដែលជាសកម្មភាពដ៏សំខាន់ក្នុងការចូលរួមអភិវឌ្ឍសង្គមជាតិ ខាងផ្នែកវប្បធម៌ អប់រំ និងសីលធម៌សង្គម។
លោកបានបញ្ជាក់ថា៖ «ស្របទៅនឹងការរីកចម្រើនទាំងនេះ យើងក៏នៅមានបញ្ហាប្រឈមមួយចំនួន ដែលបង្កឡើងពីកង្វះការយល់ដឹងនៃការប្រើប្រាស់បច្ចេកវិទ្យាទំនើប។ បើយើងមានការយល់ដឹងច្បាស់ពីប្រព័ន្ធបច្ចេកវិទ្យា ហើយចេះទាញប្រយោជន៍ពីបច្ចេកវិទ្យា នោះនឹងនាំប្រយោជន៍ដល់វិស័យសាសនា និងសង្គមជាតិរបស់យើង»។
នៅក្នុងឱកាសនោះលោក ហេង សំរិន ក៏បានអំពាវនាវដល់ថ្នាក់ដឹកនាំព្រះពុទ្ធសាសនាទាំងអស់សូមបន្តការប្រកាន់ខ្ជាប់នូវការយោគយល់គ្នា គោរពគ្នាតាមឋានានុក្រម សំដៅធ្វើឱ្យមានការឯកភាព សាមគ្គីភាព ក្នុងស្ថាប័នព្រះពុទ្ធសាសនា និងសូមព្រះថេរានុត្ថេរៈគ្រប់ព្រះអង្គ បន្តយកចិត្តទុកដាក់ស្វាធ្យាយរៀនសូត្រព្រះធម៌ វិន័យ និងប្រតិបត្តិឱ្យសមជាស្រែបុណ្យសម្រាប់ជាទីសក្ការៈរបស់ពុទ្ធបរិស័ទ។ ទន្ទឹមនឹងនេះ ពុទ្ធសាសនិកជនទាំងអស់ សូមរួមគ្នាប្រតិបត្តិតាមព្រះពុទ្ធឱវាទឱ្យបានខ្ជាប់ខ្ជួនតាមតួនាទី និងភារកិច្ចរបស់ខ្លួន។ លោកថ្លែងថា៖ «ព្រះពុទ្ធសាសនាយើងរីកចម្រើន ឬចុះអន់ថយ គឺអាស្រ័យលើយើងទាំងអស់គ្នា»។
ដោយសារអនុសំវច្ឆរៈមហាសន្និបាតមន្ត្រីសង្ឃទូទាំងប្រទេស ជាវេទិកាជួបជុំដ៏សំខាន់មួយ ដើម្បីផ្តល់នូវកាលានុវត្តភាពក្នុងការពិគ្រោះ ពិភាក្សា និងស្វែងរកដំណោះស្រាយលើបញ្ហាបច្ចុប្បន្នភាព ដែលជាកត្តាចាំបាច់សម្រាប់អនុវត្តនាឆ្នាំបន្តបន្ទាប់នោះ លោក ហេង សំរិន បានជំរុញលើកទឹកចិត្តដល់សម្តេចព្រះសង្ឃនាយក សម្ដេចព្រះសង្ឃនាយករង ព្រះរាជាគណៈព្រះមេគណ ព្រះអនុគណ ព្រះចៅអធិការ ព្រះថេរានុត្ថេរៈគ្រប់ព្រះអង្គ និងថ្នាក់ដឹកនាំក្រសួងធម្មការ និងសាសនា ព្រមទាំងសមាជិក សមាជិកានៃអង្គមហាសន្និបាតទាំងអស់ ចូលរួមពិភាក្សា ចែករំលែក ផ្លាស់ប្តូរយោបល់ ផ្តល់ចំណេះដឹង បទពិសោធ រកឱ្យឃើញនូវចំណុចខ្លាំង ចំណុចខ្សោយ ដើម្បីសម្រេចបាននូវផែនការ និងគោលការណ៍រួម ដែលមហាសន្និបាតចង់បាន។
ទោះយ៉ាងណានៅពេលមានវិបត្តិជំងឺកូវីដ ១៩ វិស័យសាសនា ក៏ដូចជាវិស័យផ្សេងៗទៀត បានជួបនូវបញ្ហាប្រឈមមួយចំនួន។ នេះបើតាមព្រះតេជព្រះគុណ ជា សំអាង ព្រះមេគណខេត្តកណ្ដាល។
ព្រះអង្គមានសង្ឃដីកាថា វិបត្តិជំងឺកូវីដ ១៩ ព្រះសង្ឃក្នុងវត្តអារាមមួយចំនួនក្នុងតំបន់ជនបទដាច់ស្រយាល បានជួបប្រឈមកង្វះស្បៀងអាហារ ព្រោះប្រជាពុទ្ធបរិស័ទ ក្នុងតំបន់ជនបទដាច់ស្រយាលទាំងនោះមានជីវភាពក្រីក្រ។ ភាពខ្វះខាតនេះបានធ្វើឱ្យមានអធិករណ៍ខ្លះកើតមានរវាងព្រះសង្ឃនិង គណៈកម្មការអាចារ្យវត្ត ហើយអធិករណ៍ភាគច្រើនកើតឡើងទាក់ទងទៅនឹងបច្ច័យ ដែលប្រើមិនបានសមស្របនេះឯង។
ព្រះតេជព្រះគុណ បន្តថា៖ «ប៉ុន្តែករណីអធិករណ៍តូចតាចបែបនេះ វាមិនប៉ះពាល់ដល់វិស័យព្រះពុទ្ធសាសនាយើងនោះទេ ព្រោះបញ្ហាត្រូវបានដោះស្រាយ ក្រោយពីមានការពន្យល់ណែនាំពីគណៈធម្មសភាសង្ឃ និងមន្ត្រីធម្មការ និងសាសនា»។ ព្រះអង្គបន្ថែមថា៖ «ការរាតត្បាតនៃជំងឺកូវីដ ១៩ បានធ្វើឱ្យពុទ្ធបរិស័ទ កើតមានសទ្ធាជ្រះថ្លាកាន់តែខ្លាំងពេលដឹងថា វត្តណាមានព្រះសង្ឃខ្វះចង្ហាន់គឺលេចចេញអ្នកមានសទ្ធាជ្រះថ្លាកាន់តែច្រើនទៅជួយឧបត្ថម្ភគាំទ្រ ដល់វត្តនោះ។ អ៊ីចឹងទេអាត្មាយល់ឃើញថា ជំងឺកូវីដ ១៩ មានភាពអាក្រក់ផង និងល្អផង»។
ពាក់ព័ន្ធទៅនឹងការប្រើប្រាស់ប្រព័ន្ធបច្ចេកវិទ្យាព្រះតេជព្រះគុណ ជា សំអាង មានសង្ឃដីកាថា ការពិត ព្រះសង្ឃមួយចំនួននៅមិនទាន់យល់ដឹងពីការប្រើសម្ភារបច្ចេកវិទ្យាទំនើបនោះទេ។ ទោះយ៉ាងណា កិច្ចការនេះ មន្ត្រីសង្ឃ ដែលមានជំនាញបច្ចេកទេសខាងប្រើប្រាស់បច្ចេកវិទ្យា បានធ្វើការបណ្ដុះបណ្ដាលដល់មន្ត្រីសង្ឃ នៅតាមវត្តអារាមមួយចំនួនជាបន្តបន្ទាប់ច្រើនវគ្គមកហើយ សង្ឃឹមថា បច្ចុប្បន្ន មន្ត្រីសង្ឃគ្រប់ព្រះអង្គនឹងបានយល់ច្បាស់ពីវិធីប្រើប្រាស់សម្ភារ និងប្រព័ន្ធបច្ចេកវិទ្យាបានសមស្របទៅតាមធម្មវិន័យព្រះពុទ្ធសាសនា និងបានសមស្របតាមគោលការណ៍នៃច្បាប់ជាតិ។
នៅក្នុងឱកាសនេះដែរ លោក ឈិត សុខុន រដ្ឋមន្ត្រីក្រសួងធម្មការ និងសាសនា បានថ្លែងថា ក្រោយថ្ងៃ ៧ មករាឆ្នាំ ១៩៧៩ វិស័យសាសនានៅកម្ពុជាបានរស់ឡើងវិញ និងមានវឌ្ឍនភាពជាបន្តបន្ទាប់រហូតដល់បច្ចុប្បន្ន។ គ្រប់សាសនានៅកម្ពុជាត្រូវបានប្រតិបត្តិដោយសុខដុមរមនា ដោយប្រកាន់ខ្ជាប់នូវសាមគ្គីគ្នាយ៉ាងជិតស្និទ្ធស្មោះត្រង់ ឈរលើគោលការណ៍គោរពគ្នាអធ្យាស្រ័យគ្នា យោគយល់គ្នាទៅវិញទៅមកក្នុងគ្រប់កាលៈទេសៈ៕