.jpg)
លោក ស ខេង ថ្លែងក្នុងពិធីសម្ពោធមណ្ឌលទទួល ពលករកំរៀង ខេត្តបាត់ដំបង ពីថ្ងៃទី ២០ ធ្នូ។រូប Sar Kheng's FB
ភ្នំពេញៈ រដ្ឋមន្ត្រីក្រសួងមហាផ្ទៃ លោក ស ខេង ជំរុញជាថ្មីដល់គណៈបញ្ជាការឯកភាពរាជធានី-ខេត្តត្រូវចូលរួមដោះស្រាយ និងទប់ស្កាត់បញ្ហាគ្រឿងញៀន កុំឱ្យកម្ពុជាក្លាយជាប្រទេសនាំចេញគ្រឿងញៀន ដែលនាំឱ្យប៉ះពាល់ដល់កិត្តិយសប្រទេសមួយនេះ និងជះឥទ្ធិពលអាក្រក់ដល់សង្គមជាតិទាំងមូល។
ថ្លែងក្នុងពិធីសម្ពោធអគារមណ្ឌលទទួលពលករកំរៀង ស្ថិតនៅភូមិបឹងរាំង ឃុំបឹងរាំង ស្រុកកំរៀង ខេត្តបាត់ដំបង នាថ្ងៃទី ២០ ខែធ្នូ ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ លោក ស ខេង ថ្លែងថា បញ្ហាគ្រឿងញៀនជារឿងមួយដែលគួរឱ្យព្រួយបារម្ភ ហើយមិនត្រូវមើលរំលងឡើយ។ និន្នាការនៃការចរាចរគ្រឿងញៀននៅលើពិភពលោកក៏ដូចជាក្នុងតំបន់ អនុតំបន់ មិនមានការថមថយទេ ជាពិសេសគ្រឿងញឿន សំយោគ ជាប្រភេទសារធាតុញៀនផ្សំឡើងដោយសារធាតុគីមីផ្សេងៗយកមកបូកបញ្ចូលគ្នា ហើយពិបាកណាស់ក្នុងការត្រួតពិនិត្យ។
លោកថ្លែងថា៖ «ពិបាកត្រង់ថា គ្រឿងញៀនយកមកម្តង (នាំចូល) សារធាតុនេះ បាន ៥ មុខ ថាយកមកផលិតជី ផលិតអីផ្សេង តែទីបំផុតយកមកផ្គុំគ្នាទៅជាសារធាតុញៀន។ ដូចយើងចាប់បាន ២ តោនជាងនៅស្រុកឱរ៉ាល់ ខេត្តកំពង់ស្ពឺ នេះជាបញ្ហា។ អ៊ីចឹងមូលដ្ឋានយើងត្រូវដោះស្រាយ។ ទោះបីផលិតហើយដឹកចេញក៏ត្រូវពិនិត្យដែរ។ យើងមិនត្រូវបណ្តែតបណ្តោយអនុញ្ញាតទេ ព្រោះវាខុសច្បាប់អន្តរជាតិ ហើយវាធ្វើឱ្យមុខមាត់កម្ពុជាវាខូច»។
លោករដ្ឋមន្ត្រីបញ្ជាក់ថា៖ «គេថាគ្រឿងញៀនចេញមកពីណា ចេញមកពីកម្ពុជា។ ពីមុនគេថា កម្ពុជាគ្រាន់ជាកន្លែងឆ្លងកាត់។ តែឥឡូវមិនមែនកន្លែងឆ្លងកាត់ ថែមទាំងផលិតផង ហើយបើចែកចាយក្នុងប្រទេសក៏កាន់តែគ្រោះថ្នាក់ យកចេញទៅក្រៅក៏អត់ល្អ»។
បើកម្ពុជាមិនទប់ស្កាត់បញ្ហាគ្រឿងញៀនទាន់ពេលវេលា នឹងនាំឱ្យមានបញ្ហាដល់សង្គមជាតិ ដូចបណ្តាប្រទេសជិតខាងដែលធ្លាប់ឆ្លងកាត់បញ្ហានេះ។ ព្រោះនេះជាបញ្ហាធំសម្រាប់ជាតិ បើសិនជាដោះស្រាយមិនបានទេ ស្ថានការណ៍វាជ្រុល ដូចបទពិសោធនៅប្រទេសថៃ បង្ក្រាបសម្លាប់អស់ខ្ទង់ជាង ២ ពាន់នាក់ ប៉ះខ្នងតូចធំ។ បើនៅហ្វីលីពីនបង្ក្រាបសម្លាប់ខ្ទង់ ៥ ពាន់នាក់ ដែលបណ្តាប្រទេសមួយចំនួនថ្កោលទោស ប៉ុន្តែវាគ្មានជម្រើស។ ទោះយ៉ាងណា លោកថា មិនគាំទ្រការសម្លាប់នោះទេ។ ប៉ុន្តែចង់បញ្ជាក់ថា កុំទុកឱ្យស្ថានការណ៍វាទៅជាបែបហ្នឹង តែធ្ងន់ហើយ បានស្រែកអត់បានទេ ត្រូវដោះស្រាយពីឥឡូវ។ នេះជាការអធិប្បាយរបស់លោក ស ខេង។
លោកថ្លែងថា៖ «ម្យ៉ាង រដ្ឋយើងត្រូវចិញ្ចឹមអ្នកជាប់ឃុំ ព្រោះអ្នករកស៊ីគ្រឿងញៀន ជួនអីអ្នកខ្លះមិនជក់ខ្លួនឯងទេ។ ប៉ុន្តែអ្នករកស៊ីតូចតាច ជក់ផង រកស៊ីផង បើអ្នកធំៗមែនទែនមិនសូវជក់ទេ។ អ៊ីចឹងទេ អនាគត ខូចប៉ះពាល់គ្រួសារ និងបុគ្គលផង និងសម្រាប់សង្គម គឺធ្ងន់ធ្ងរ។ ខ្ញុំមានការបារម្ភ បើសិនយើងមិនរួមគ្នា មិនគាំទ្រគ្នា ក្នុងការប្រយុទ្ធប្រឆាំងគ្រឿងញៀនទេអត់បានទេ ត្រូវតែឯកភាពគ្នា»។
លោក ស ខេង បានបង្ហើបឱ្យដឹងថា អ្នកជាប់ឃុំនៅទូទាំងកម្ពុជាទាំងអស់មាន ៣៨ ០០០ នាក់ក្នុងនោះ ៥១ ភាគរយ គឺជាអ្នកទោសគ្រឿងញៀន ដោយសារគ្រឿងញៀន។
អភិបាលខេត្តកំពង់ស្ពឺលោក វ៉ី សំណាង ប្រាប់ភ្នំពេញប៉ុស្តិ៍ថា ចំពោះការងារបង្ក្រាបគ្រឿងញៀនក្នុងមូលដ្ឋានរបស់ខ្លួន គឺតែងតែធ្វើរៀងរាល់ថ្ងៃ មិនដែលធ្វេសប្រហែសឡើយ។ ទោះបីសមត្ថកិច្ចគ្រប់ជាន់ថ្នាក់ខិតខំស្វះស្វែងទប់ស្កាត់ការចរាចរ និងសេពគ្រឿងញៀនក្តី ប៉ុន្តែករណីនេះនៅតែមានដោយសារមនុស្សមួយចំនួនមានឆន្ទៈប្រព្រឹត្ត។
លោកថ្លែងថា៖ «បទល្មើសទាំងអស់មនុស្សមានឆន្ទៈប្រព្រឹត្ត សូម្បីតែប្រឡាយមួយមានដាយត្រីនៅលើកណ្តាល នៅខាងក្រោម សួរថាអ្នកនៅក្រោមចាប់បានត្រីអត់ គឺនៅតែចាប់បាន។ ចុះទម្រាំ មនុស្សដែលមានឆន្ទៈអាក្រក់។ អ៊ីចឹងបានយើងបង្កើតទាហាន ប៉ូលិស និងប៉េអឹម ទុកបង្ក្រាបបទល្មើស»។
ការបង្ក្រាបគ្រឿងញៀនទ្រង់ទ្រាយធំក្នុងទឹកដីរបស់ខ្លួនជាង ២ តោន កន្លងមកនេះ គឺសមត្ថកិច្ចបានតាមដានរយៈពេល ២ ខែមកហើយ។ ដើម្បីច្បាមយកមេខ្លោងពិតប្រាកដ កម្លាំងសមត្ថកិច្ចបានប្រើប្រាស់ពេលវេលា និងយន្តការយ៉ាងច្រើន ដើម្បីឈានទៅដល់ការបង្ក្រាបបានទ្រង់ទ្រាយធំបែបនេះ ដោយមិនមានការធ្វេសប្រហែស។ កម្លាំងសមត្ថកិច្ចទប់ស្កាត់មិនឱ្យនាំចេញបានទេ។ នេះជាការបញ្ជាក់របស់លោក វ៉ី សំណាង។
ប្រធានសមាគមសង្គ្រោះជនរងគ្រោះដោយគ្រឿងញៀនកម្ពុជា លោក មាស សុវណ្ណ សាទរចំពោះសមត្ថកិច្ចពាក់ព័ន្ធ ដែលបានបង្ក្រាបជនល្មើស និងដកហូតសារធាតុញៀនធ្វើជាវត្ថុតាង និងដុតកម្ទេចចោល។ លោកក៏បានជំរុញសមត្ថកិច្ចអនុត្តឱ្យម៉ឺងម៉ាត់ទៅលើជនល្មើសតាមផ្លូវច្បាប់ និងស្រាវជ្រាវរកមេឧក្រិដ្ឋជនគ្រឿងញៀន ដែលជាមុខសញ្ញាធំដើមចមនៃបញ្ហានេះ។
លោកនិយាយថា៖ «សារធាតុញៀនយើងចាប់បានហើយទុកជាភ័ស្តុតាង សំខាន់គឺមនុស្ស។ មានន័យថា មនុស្សដែលចាប់បាននោះចំទិសដៅអត់?។ ម្នាក់នោះជាឧក្រិដ្ឋជនគ្រឿងញៀនមែនដែរ ឬអត់? ព្រោះចាប់ភាគច្រើនបានតែអ្នកបម្រើឱ្យគេ ជាដៃជើងគេ តែបើយើងចាប់បានអ្នកនៅពីក្រោយតែម្តង គឺជា [រឿងល្អ] កាន់តែខ្លាំង»។
កម្លាំងសមត្ថកិច្ចនៃមន្ទីរប្រឆាំងគ្រឿងញៀននៃអគ្គស្នងការដ្ឋាននគរបាលជាតិ នៅថ្ងៃទី ១២ ខែធ្នូ ឆ្នាំ ២០២១ បានសហការជាមួយកម្លាំងនគរបាលនៃស្នងការដ្ឋាននគរបាលរាជធានី-ខេត្តចំនួន ៤ រួមមាន រាជធានីភ្នំពេញ ខេត្តកំពង់ស្ពឺ ខេត្តព្រះសីហនុ និងខេត្តកោះកុង បានបង្ក្រាបករណីគ្រឿងញៀនលក្ខណៈទ្រង់ទ្រាយធំ ដោយរឹបអូសវត្ថុតាងគ្រឿងញៀនប្រភេទ Ketamine បានចំនួនជាង ២ តោន និងសារធាតុគីមីផ្សំជាង ៨៤ តោន ព្រមទាំងអាវុធខ្លី K54 ១ ដើម ម៉ាស៊ីនកែច្នៃផលិតគ្រឿងញៀន ខ្នាតធំចំនួន ២០ គ្រឿង និងមធ្យោបាយដឹកជញ្ជូនមួយចំនួនទៀត។
របាយការណ៍អគ្គស្នងការដ្ឋាននគរបាលជាតិឱ្យដឹងថា យុទ្ធនាការប្រយុទ្ធប្រឆាំងគ្រឿងញៀនខុសច្បាប់ទូទាំងប្រទេស សម្រាប់ថ្ងៃទី ១៩ ខែធ្នូ ឆ្នាំ ២០២១ កម្លាំងសមត្ថកិច្ចបានបង្ក្រាប ២៥ ករណី ក្នុងនោះករណីប្រើប្រាស់ ១០ ករណី និងជួញដូរ ១៥ ករណី ដោយឃាត់ខ្លួនជនសង្ស័យ ៥១ នាក់។
របាយការណ៍ឱ្យដឹងថា លទ្ធផលអនុវត្តច្បាប់ពីថ្ងៃទី ១ ខែមករា ដល់ថ្ងៃទី ១៩ ខែធ្នូ ឆ្នាំ ២០២១ កម្លាំងសមត្ថកិច្ចបានបង្ក្រាបចំនួន ៦ ០៣៣ ករណី ឃាត់មនុស្ស ១៣ ២៧១ នាក់ (ស្រី ៧៧៧ នាក់)៕
