ភ្នំពេញៈ រដ្ឋមន្ដ្រីក្រសួងអប់រំ យុវជន និងកីឡា លោក ហង់ជួន ណារ៉ុន បញ្ជាក់ថា សិស្សថ្នាក់ទី ១២ ដែលត្រូវប្រឡងសញ្ញាបត្រមធ្យមសិក្សាទុតិយភូមិឆ្នាំនេះ ជាង ១១ ម៉ឺននាក់ គឺមិនមានសិស្សវិជ្ជមានកូវីដ ១៩ ទេ ហើយបើសិស្សមានកម្ដៅលើសពី ៣៧,៥ អង្សាសេ ត្រូវធ្វើតេស្តរកមេរោគកូវីដ ១៩ ពីមន្ដ្រីសុខាភិបាល ដែលបញ្ជាក់ថា អវិជ្ជមានទើបអនុញ្ញាតឱ្យចូលប្រឡង។
លោក ហង់ជួន ណារ៉ុន ថ្លែងក្នុងសន្និសីទសារព័ត៌មានស្ដីពីដំណើរការរៀបចំការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ២៧ ធ្នូ ២០២១ នៅទីស្ដីការក្រសួងអប់រំ យុវជន និងកីឡា នាថ្ងៃទី ២០ ធ្នូ ថា ក្រសួងបានរៀបចំការប្រឡងឆ្នាំនេះ ដូចរាល់ដង ទៅតាមស្ដង់ដានៃការប្រឡងសញ្ញាបត្រមធ្យមសិក្សាទុតិយភូមិ។ ការរៀបចំបែបនេះ គឺក្រសួងមិនចង់ឱ្យមានការរើសអើងថា ឆ្នាំនេះការប្រឡងទាបជាងស្ដង់ដាដោយសារតែបញ្ហាកូវីដ ១៩ នោះទេ។
លោកថ្លែងថា៖ «អ៊ីចឹងយើងដឹងហើយថា លទ្ធភាពដែលមានកូវីដ ១៩ នេះ គឺមានតិចណាស់ ដោយសារតែសិស្សភាគច្រើនតាមរបាយការណ៍ដែលយើងបានទទួលប្រចាំថ្ងៃពីគណៈគ្រប់គ្រងពីរាជធានី-ខេត្ដនីមួយៗ។ ប្រសិនបើសិស្ស មានកូវីដ ១៩ គឺគាត់នឹងទទួលបាននូវការព្យាបាល ហើយមកទល់ពេលនេះយើងមិនទាន់ទទួលព័ត៌មានថា សិស្សថ្នាក់ទី ១២ មានកូវីដ ១៩ ទេ»។
លោកបញ្ជាក់ថា បេក្ខជនទាំងអស់ត្រូវមកទទួលការវាស់ស្ទង់កម្ដៅ ពិនិត្យសុខភាព និងទទួលស្ទីកឃ័រកម្ដៅធម្មតា នៅតាមមណ្ឌលសំណេរនីមួយៗនៅមុនថ្ងៃប្រឡង ១ ថ្ងៃ (ថ្ងៃទី ២៦ ខែធ្នូ ឆ្នាំ ២០២១) និងត្រូវពាក់ម៉ាស់ជាប់ជាប្រចាំនៅក្នុងមណ្ឌលប្រឡង។ ចំពោះបេក្ខជនដែលបានប៉ះពាល់ផ្ទាល់ជាមួយអ្នកវិជ្ជមានកូវីដ ១៩ និងស្ថិតក្នុងអំឡុងពេលចត្តាឡីស័កត្រូវធ្វើស្វ័យប្រកាសយ៉ាងតិច ១ ថ្ងៃមុនដំណើរការសំណេរ។
រីឯបេក្ខជនដែលមានកម្ដៅលើសពី ៣៧,៥ អង្សាសេ ឬមានរោគសញ្ញាផ្សេងៗ ដូចជា ក្អក ហៀរសំបោរ ឈឺបំពង់ក ពិបាកដកដង្ហើម ត្រូវធ្វើតេស្តរហ័សរកមេរោគកូវីដ ១៩ នៅទីតាំងសុខាភិបាលដែលកំណត់ដោយអាជ្ញាធរដែនដីរាជធានី-ខេត្ត និងត្រូវយកលិខិតបញ្ជាក់លទ្ធផលអវិជ្ជមានកូវីដ ១៩ ពីភ្នាក់ងារសុខាភិបាលមកបង្ហាញនៅមណ្ឌលប្រឡងវិញ ដើម្បីទទួលការអនុញ្ញាតឱ្យចូលប្រឡង។
លោក ហង់ជួន ណារ៉ុន បញ្ជាក់ថាក្រសួងបានផ្ដល់ឱកាសចាប់តាំងពីបិទសាលារៀនមកបានជំរុញគ្រូក្នុងការបង្រៀនដោយផ្ដោតលើការយកចិត្ដទុកដាក់ចំពោះសិស្សថ្នាក់ទី ៩ និងទី ១២ ហើយរៀបចំជាមេរៀនសង្ខេបឱ្យសិស្សលើមុខវិជ្ជាសំខាន់ៗសម្រាប់ការប្រឡង។
លោកបន្តថា នៅពេលដែលក្រសួងបើកដំណើរការសាលារៀនឡើងវិញ ក្រសួងក៏តម្រូវឱ្យគណៈគ្រប់គ្រងធ្វើការវាយតម្លៃសមត្ថភាពសិស្ស ហើយបង្រៀនផ្ដោតទៅលើចំណុចណាដែលសិស្សខ្សោយ ដែលសិស្សទាមទារត្រូវពង្រឹងឡើងវិញ។ ទាំងនេះ ក្រសួងបានផ្ដល់ឱកាសឱ្យសិស្សបានរៀនគ្រប់គ្រាន់ ហើយគណៈគ្រប់គ្រងក៏ត្រូវវាយតម្លៃជាប្រចាំនូវសមត្ថភាពសិស្ស ក្នុងការវាស់ស្ទង់សមត្ថភាពសិស្ស ដើម្បីឱ្យការប្រឡងនេះដំណើរការទៅបានដែរ។
លោកបញ្ជាក់ថា៖ «ក្រសួងត្រូវធានាថា ការប្រឡងនេះ គឺមិនខុសពីរាល់ដងទេ គឺយើងចង់បានកុំឱ្យសិស្ស កុំឱ្យគាត់មានការរើសអើង។ ដូច្នេះខ្ញុំយល់ឃើញថា ការរៀបចំការប្រឡងនេះ គឺរៀបចំយ៉ាងណាកុំឱ្យថាសិស្សទទួលនូវទោសទណ្ឌផង យើងផ្ដល់ឱកាសឱ្យគាត់បានរៀនឱ្យបានគ្រប់គ្រាន់ផង ហើយក៏ទទួលបានសញ្ញាបត្រមួយដូចគេដូចឯងដែរ»។
បើតាមសេចក្ដីប្រកាសព័ត៌មានរបស់ក្រសួងអប់រំ កាលបរិច្ឆេទសំខាន់ៗនៃការប្រឡងឆ្នាំនេះ រួមមាន សម្រាប់ដំណើរការសំណេរ នឹងប្រព្រឹត្តទៅក្នុងរយៈពេល ២ ថ្ងៃ គឺថ្ងៃទី ២៧-២៨ ខែធ្នូ ឆ្នាំ ២០២១។ ដំណើរការកំណែនឹងប្រព្រឹត្តទៅចាប់ពីថ្ងៃទី ៣០-៣១ ខែធ្នូ ឆ្នាំ ២០២១ ដល់ថ្ងៃទី ៥ ខែមករា ឆ្នាំ ២០២២។ ចំណែក ដំណើរការស្រង់បូកពិន្ទុដោយកុំព្យូទ័រ និងផ្ទៀងផ្ទាត់ពិន្ទុនឹងប្រព្រឹត្តទៅចាប់ពីថ្ងៃទី ៦ ដល់ថ្ងៃទី ១៦ ខែមករា ឆ្នាំ ២០២២។
ក្នុងឆ្នាំសិក្សា ២០២០-២០២១ បេក្ខជនបានចុះឈ្មោះប្រឡងសរុប ១១៤ ១៨៣ នាក់ ស្រី ៦០ ៣៩៧ នាក់។ បេក្ខជនត្រូវបានរៀបចំចំនួន ២៥ នាក់ ក្នុង ១ បន្ទប់ លើកលែងតែបន្ទប់ចុងក្រោយ និងបន្ទប់ ដែលមានបេក្ខជនមកពីវិទ្យាល័យអប់រំពិសេស។ ចំណែកមណ្ឌលសំណេរមានចំនួនសរុប ២០៤ មណ្ឌល ត្រូវជា ៤ ៦១៦ បន្ទប់។ មណ្ឌលកំណែសម្រាប់ការប្រឡងសញ្ញាបត្រមធ្យមសិក្សាទុតិយភូមិ មានចំនួន ១០ មណ្ឌលនៅរាជធានីភ្នំពេញ។
ក្រសួងកំណត់យកថ្ងៃទី ១៨ ខែមករា ឆ្នាំ ២០២២ ពេលរសៀល សម្រាប់ប្រកាសលទ្ធផលប្រឡងនៅរាជធានី-ភ្នំពេញ និងខេត្តកណ្តាល និងនៅថ្ងៃទី ១៩ ខែមករា ឆ្នាំ ២០២២ សម្រាប់ខេត្តផ្សេងៗ។
ក្រសួងបញ្ជាក់ថា គណៈមេប្រយោគ និងគណៈកម្មការនានាដែលចូលរួមក្នុងដំណើរការប្រឡងមានចំនួន ៣១ ៤៣២ នាក់។ ក្រសួងបានពង្រឹងកិច្ចសហការយ៉ាងស្អិតល្មួតជាមួយក្រសួង-ស្ថាប័នចំនួន ៧ រួមមាន ក្រសួងមហាផ្ទៃ ក្រសួងសុខាភិបាល កងរាជអាវុធហត្ថលើផ្ទៃប្រទេស អង្គភាពប្រឆាំងអំពើពុករលួយ សហព័ន្ធសហភាពយុវជនកម្ពុជា អគ្គិសនីកម្ពុជា និងក្រុមគ្រូពេទ្យស្ម័គ្រចិត្តយុវជនសម្តេចតេជោ។
ក្រសួងនឹងរៀបចំការបិទបញ្ជីឈ្មោះបេក្ខជនប្រឡងនៅតាមរាជធានី-ខេត្ត ២ ដង គឺលើកទី ១ នៅថ្ងៃទី ២០ ខែធ្នូដើម្បីឱ្យបេក្ខជនបានពិនិត្យ និងរកមើលមណ្ឌលប្រឡង ត្រូវនឹងអក្ខរក្រមនៃឈ្មោះរបស់ខ្លួន។ លើកទី ២ នៅថ្ងៃទី ២៦ ខែធ្នូ ឆ្នាំ ២០២១ ដើម្បីពិនិត្យមើល និងបញ្ជាក់ម្ដងទៀតអំពីមណ្ឌលប្រឡងលេខបន្ទប់ និងលេខតុ ព្រមទាំងវាស់កម្ដៅសីតុណ្ហភាពរបស់បេក្ខជន។
ក្រសួងអប់រំបានអំពាវនាវដល់បេក្ខជនទាំងអស់ ត្រូវគោរពបទប្បញ្ញត្តិនៃការប្រឡងឱ្យបានល្អប្រសើរ ជាពិសេសមិនត្រូវលាក់ទុកជាប់នឹងខ្លួននូវឧបករណ៍អេឡិចត្រូនិកគ្រប់ប្រភេទចូលក្នុងមណ្ឌលប្រឡង ឬបន្ទប់ប្រឡងជាដាច់ខាត។ ក្នុងករណីរកឃើញថា បានប្រព្រឹត្តសកម្មភាពផ្ទុយនឹងបទប្បញ្ញត្តិ និងកម្រិតវិន័យ បេក្ខជននឹងត្រូវបានកំណត់ឱ្យធ្លាក់ជាស្វ័យប្រវត្តិ៕
វីដេអូ៖