.jpg)
បុរសស្ត្រីជនជាតិចិន-វៀតណាមត្រូវបានចាប់ខ្លួនពីថ្ងៃទី ១៩ ធ្នូ ពាក់ព័ន្ធឃាតកម្ម។ រូប CID
ព្រះសីហនុៈ នគរបាលព្រហ្មទណ្ឌខេត្តព្រះសីហនុនៅថ្ងៃទី ២០ ធ្នូ កំពុងសាកសួរបុរស-ស្ត្រីជនជាតិចិន-វៀតណាម ២ នាក់ ពាក់ព័ន្ធនឹងការបាញ់សម្លាប់បុរសជនជាតិចិនម្នាក់ នៅថ្ងៃទី ៤ ធ្នូ ឆ្នាំ ២០២១ នៅភូមិ៥ សង្កាត់លេខ៤ ក្រុង-ខេត្តព្រះសីហនុ ក្រោយពីត្រូវបានចាប់ខ្លួនកាលពីថ្ងៃទី ១៩ ធ្នូ នៅបុរីប៉េងហួតបឹងស្នោ ភូមិបឹងឈូក សង្កាត់និរោធ ខណ្ឌច្បារអំពៅ រាជធានីភ្នំពេញ។
លោក ណុប បញ្ញា ស្នងការរងទទួលផែនការងារនគរបាលព្រហ្មទណ្ឌនៃស្នងការដ្ឋាននគរបាលខេត្តព្រះសីហនុ ប្រាប់នៅរសៀលថ្ងៃទី ២០ ខែធ្នូ ថា បុរសជនជាតិចិន ដែលត្រូវបានចាប់ខ្លួនឈ្មោះ LI HONGBO ហៅ ប៉ូប៉ូ និងឈ្មោះ មី ពៅ ភេទស្រី ជាជនជាតិវៀតណាម។ ចំណែកជនរងគ្រោះ ឈ្មោះ JIKE MUNAI ភេទប្រុស ជនជាតិចិនដូចគ្នា។ ក្រុមជនសង្ស័យត្រូវបាននគរបាលនៃនាយកដ្ឋានព្រហ្មទណ្ឌក្រសួងមហាផ្ទៃ សហការជាមួយនគរបាល ខេត្តព្រះសីហនុស្រាវជ្រាវចាប់បាននៅបុរីប៉េងហួតបឹងស្នោ ភូមិបឹងឈូក សង្កាត់និរោធ ខណ្ឌច្បារអំពៅ រាជធានីភ្នំពេញ កាលពីថ្ងៃទី ១៩ ធ្នូ។
លោកបញ្ជាក់ថា៖ «នៅថ្ងៃនេះ (ថ្ងៃទី ២០ ធ្នូ) មន្ត្រីជំនាញកំពុងអនុវត្តនីតិវិធីស៊ើបសួរជនសង្ស័យប្រុសស្រីទាំង ២ នាក់នេះ។ ចំពោះមូលហេតុនៃការបាញ់សម្លាប់ជនរងគ្រោះ គឺយើងនៅមិនទាន់ដឹងនៅឡើយទេ»។
បើតាមកំណត់ហេតុរបស់នាយកដ្ឋានព្រហ្មទណ្ឌ ដែលបានចុះផ្សាយក្នុងផេកនៃគេហទំព័ររបស់ខ្លួននៅថ្ងៃទី ២០ ធ្នូ ឆ្នាំ ២០២១ បានបង្ហាញថា អំពើឃាតកម្មបាញ់សម្លាប់បុរសជនជាតិចិនម្នាក់នោះបានកើតឡើងកាលពីវេលាម៉ោង ១ និង ៣០ នាទីរសៀលថ្ងៃទី ៤ ធ្នូ ឆ្នាំ ២០២១ នៅចំណុចផ្ទះល្វែងមួយក្នុងបុរី BLUE SKY ផ្ទះលេខ A252 ជាន់ផ្ទាល់ដី ស្ថិតក្នុងក្រុមទី ២២ ភូមិ ៥ សង្កាត់លេខ ៤ ក្រុង-ខេត្ត ព្រះសីហនុ។
កំណត់ហេតុដដែលបានបន្តថា ភ្លាមៗក្នុងថ្ងៃទី ៤ ខែធ្នូ ដដែលនោះ បន្ទាប់ពីទទួលបានព័ត៌មានពីប្រជាពលរដ្ឋរួចមក កម្លាំងសមត្ថកិច្ចជំនាញនៃស្នងការដ្ឋាននគរបាលខេត្តព្រះសីហនុ ដោយមានការសម្របសម្រួលនីតិវិធីពីលោក ពេញ ពិសិដ្ឋ ព្រះរាជអាជ្ញារងនៃអយ្យការអមសាលាដំបូងខេត្តព្រះសីហនុបានចុះទៅត្រួតពិនិត្យដល់កន្លែងកើតហេតុ។ នៅក្នុងផ្ទះកើតហេតុនោះ សមត្ថកិច្ចរបស់នាយកដ្ឋានព្រហ្មទណ្ឌ និងនគរបាលជំនាញខេត្តព្រះសីហនុបានរកឃើញសាកសពបុរសជនជាតិចិនម្នាក់ដេកស្លាប់នៅក្បែរសាឡុងពូកមួយ។ ជនរងគ្រោះត្រូវបានក្រុមជនសង្ស័យបាញ់ត្រូវចុងភ្លៅធ្លាយទាំងសងខាង និងមានសម្បកគ្រាប់ ចំនួន ៣ គ្រាប់បន្សល់ទុកនៅក្បែរសាកសព។
កំណត់ហេតុបានបញ្ជាក់ថា ក្រោយពីពិនិត្យ និងមានការស៊ើបអង្កេតពីកម្លាំងជំនាញនៃស្នងការដ្ឋាននគរបាលខេត្តព្រះសីហនុនៅកន្លែងកើតហេតុ កម្លាំងសមត្ថកិច្ចបានកំណត់អត្តសញ្ញាណថា ជនរងគ្រោះស្លាប់មានឈ្មោះ JIKE MUNAI មិនមែនជាអ្នកជួលផ្ទះកើតហេតុនោះទេ។ ប៉ុន្តែអ្នកដែលជួលផ្ទះកើតហេតុពិតប្រាកដ មាន ឈ្មោះ មី ពៅ ភេទ ស្រី ជាជនជាតិវៀតណាមមានស្រុកកំណើតនៅសង្កាត់ឡាបានសៀក ក្រុងបានលុង ខេត្តរតនគិរី និងមានមិត្តប្រុសម្នាក់ជាជនជាតិចិន។ បន្ទាប់ពីសមត្ថកិច្ចចម្រុះកំណត់អត្តសញ្ញាណពួកគេបានហើយ ក៏ស្រាវជ្រាវរហូតតាមចាប់ពួកគេបាននៅថ្ងៃទី ១៩ ធ្នូ៕
