កំពង់ធំៈ នគរបាលប្រឆាំងការជួញដូរមនុស្ស និងការពារអនីតិជន ខេត្តកំពង់ធំ កសាងសំណុំរឿងបញ្ជូនអតីតសង្ឃម្នាក់ទៅសាលាដំបូងខេត្តនៅរសៀលថ្ងៃទី ២១ ធ្នូ បន្ទាប់ពីធម្មការខេត្តកំពង់ធំ ចាប់ផ្សឹកបាន ១ ថ្ងៃ ពាក់ព័ន្ធនឹងការរួមភេទជាមួយក្មេងស្រីម្នាក់អាយុ ១៤ ឆ្នាំ នៅឃុំសាលាវិស័យ ស្រុកប្រាសាទបល័ង្ក កាលពីថ្ងៃទី ១៩ ធ្នូ។
លោកស្រី កង កូយ ស្នងការរងទទួលផែន ការងារនគរបាលប្រឆាំងការេជួញដូរមនុស្ស និងការពារអនីតិជន ខេត្តកំពង់ធំ ប្រាប់ភ្នំពេញប៉ុស្តិ៍នៅរសៀលថ្ងៃទី ២១ ធ្នូថា ជនសង្ស័យឈ្មោះលី ទ្រី អាយុ ៤៤ ឆ្នាំ។ រីឯក្មេងស្រីរងគ្រោះឈ្មោះ ម.ស. អាយុ១៤ឆ្នាំ រស់នៅក្នុងឃុំសាលាវិស័យ ស្រុកប្រាសាទបល័ង្ក ខេត្តកំពង់ធំ។
លោកស្រីថ្លែងថា៖«ករណីនេះ សមត្ថកិច្ចជំនាញរបស់ខ្ញុំបានបញ្ចប់ការសួរចម្លើយជនសង្ស័យហើយ។ ខ្ញុំទទួលបានគោលការណ៍ពីលោកឧត្តមសេនីយ៍ទោស្នងការខេត្ត ឱ្យបញ្ជូនជនសង្ស័យ ទៅសាលាដំបូងខេត្តកំពង់ធំ នៅរសៀលថ្ងៃនេះ(ថ្ងៃទី២១ ធ្នូ ឆ្នាំ២០២១)»។
លោកស្រីបញ្ជាក់ថា ក្មេងស្រីរងគ្រោះមានផ្ទះនៅក្បែរវត្ត សុវណ្ណគិរីសេរីរតនារាម ហៅវត្តខ្វាន់ទៀង ហើយជនសង្ស័យកាលពីនៅជាព្រះសង្ឃបានគង់នៅក្នុងវត្តនេះដែរ។ ពេលដែលជនសង្ស័យនៅជាព្រះសង្ឃបានមានទំនាក់ទំនងស្គាល់គ្នាជាមួយក្មេងស្រីរងគ្រោះ។ ប៉ុន្តែនៅយប់ថ្ងៃទី១៩ ធ្នូ ឆ្នាំ២០២១ នៅវេលាម៉ោងប្រហែលជាង៧យប់ ជនសង្ស័យបាននាំក្មេងរងគ្រោះទៅព្រៃ ដែលមានចម្ងាយពីវត្ត ប្រមាណជាកន្លះគីឡូម៉ែត្រ ធ្វើឱ្យក្រុមគ្រួសារសាច់ញាតិ របស់ក្មេង នាំគ្នាដើរក តែរកមិនឃើញ។
លោកស្រីបន្តថា លុះនៅវេលាម៉ោងជាង៨យប់ថ្ងៃទី១៩ ធ្នូ ដដែល ទើបក្មេងស្រីរងគ្រោះដើរត្រឡប់មកផ្ទះវិញ។ ពេលនោះម្តាយនាងជជីកសួរ ហើយក្មេងរងគ្រោះប្រាប់ម្តាយថា នាងត្រូវបានលោកសង្ឃឈ្មោះលី ទ្រី នាំទៅក្នុងព្រៃក្រោយវត្ត ហើយបានចាប់នាងរំលោភ។ ភ្លាមៗនោះម្តាយឪពុករបស់ក្មេងរងគ្រោះបានទៅប្តឹងនៅប៉ុស្តិ៍នគរបាល ឃុំសាលាវិស័យ។ លុះព្រឹកឡើងថ្ងៃទី២០ ធ្នូ ត្រូវបាននគរបាលប៉ុស្តិ៍ឃាត់ខ្លួនជនសង្ស័យនៅក្នុងវត្តតែម្តង។
បើតាមលោកស្រីស្នងការរងថា៖«ជនសង្ស័យបានសារភាពថា គាត់ពិតជាបានប្រព្រឹត្តលើក្មេងស្រីរងគ្រោះមែន តែថាជាការព្រមព្រៀងគ្នាទេ។ ករណីនេះមានខាងមន្ទីរធម្មការខេត្តកំពង់ធំ និងព្រះមេគណស្រុកប្រាសាទបល័ង្ក ខេត្តកំពង់ធំ ជាអ្នកផ្សឹកលោកផ្ទាល់»៕