កណ្ដាលៈ តុលាការខេត្តកណ្ដាលនៅល្ងាចថ្ងៃទី ២១ ខែ ធ្នូ ឆ្នាំ ២០២១ បានសម្រេចចោទប្រកាន់អ្នកបើកបររថយន្ត និងអ្នករួមដំណើរម្នាក់ទៀត ពីបទ «អំពើឃាតកម្ម» បន្ទាប់ពីពួកគេបានបើករថយន្តបុករះម៉ូតូ ៤ គ្រឿង លើកំណាត់ផ្លូវលេខ ១១០ ក្នុងភូមិសាស្ត្រស្រុកកៀនស្វាយ ខេត្តកណ្ដាលកាលពីយប់រំលងអាធ្រាត្រ ឈានចូលថ្ងៃថ្ងៃទី ១៩ ខែ ធ្នូ ឆ្នាំ ២០២១ ដែលយ៉ាងហោចណាស់មានជនរងគ្រោះ ៦ នាក់ស្លាប់ និង ២ នាក់ទៀតរងរបួសធ្ងន់។
លោក ជួន សុបញ្ញា អ្នកនាំពាក្យអយ្យការអមសាលាដំបូងរាជធានីភ្នំពេញ បានប្រាប់ ភ្នំពេញ ប៉ុស្តិ៍ថា ក្រោយពីធ្វើការសាកសួរអស់រយៈពេលជាច្រើនម៉ោង នារសៀលថ្ងៃទី ២១ ខែធ្នូនេះ តំណាងអយ្យការអមសាលាដំបូង បានសម្រេចចោទប្រកាន់ ជនសង្ស័យឈ្មោះ លី ចំណាន អាយុ ៣១ ឆ្នាំ ជាអ្នកបើកបររថយន្ត មានទីនៅក្នុងឃុំកំពង់ស្វាយ ស្រុកកៀនស្វាយ ខេត្តកណ្ដាល និងអ្នករួមដំណើរម្នាក់ទៀតឈ្មោះ ណម ប៊ុនថាន់ អាយុ ២២ ឆ្នាំ មានទីលំនៅក្នុងឃុំឈើទាល ស្រុកកៀនស្វាយ ខេត្តកណ្ដាល ពីបទ «អំពើឃាតកម្ម»។
លោកបានបញ្ជាក់ថា៖ «នៅពេលនេះ សំណុំរឿងជនសង្ស័យទាំង ២ បានបញ្ជូនទៅឲ្យចៅក្រមស៊ើបសួរ បន្តនីតិវិធី ប៉ុន្តែការសម្រេចឃុំខ្លួនឬយ៉ាងណានោះ ខ្ញុំនៅមិនទាន់បានដឹងនៅឡើយទេ»។
ជុំវិញករណីនេះ លោក សូ សារិន ប្រធានលេខាធិការដ្ឋានសាលាដំបូងខេត្តកណ្ដាល មិនអាចទាក់ទងស្នើសុំ អធិប្បាយបានទេ។
ប៉ុន្តែ លោក ព្រំ សំណាង អធិការស្រុកកៀនស្វាយ បានប្រាប់ ភ្នំពេញ ប៉ុស្តិ៍ថា តុលាការបានសម្រេច ឲ្យនាំជនសង្ស័យទាំង ២ យកទៅឃុំខ្លួនក្នុងពន្ធនាគារខេត្តកណ្ដាល ហើយនៅល្ងាចថ្ងៃទី ២១ ខែធ្នូនេះ ដោយចោទប្រកាន់ពីបទ «អំពើឃាតកម្ម តាមមាត្រ ១៩៩ នៃក្រមព្រហ្មទណ្ឌ»។ យោងតាមបទចោទនិងមាត្រាខាងលើនេះ ជនសង្ស័យទាំង ២ នឹងប្រឈមការផ្ដន្ទាទោសជាប់ពន្ធនាគារពី ១០ ឆ្នាំ ទៅ ១៥ ឆ្នាំ។
បើតាមលោក សំណាង នៅក្នុងដំណាក់កាលស៊ើបសួរដោយមន្ត្រីនគរបាលជំនាញ ជនសង្ស័យទាំង ២ សារភាពថា មុនពេលកើតហេតុ គ្រោះថ្នាក់ចរាចរណ៍ ពួកគេត្រូវបានក្រុមជនរងគ្រោះ ព្រួតគ្នាកាប់ប្រហារ ដោយកាំបិតនិងដាវកែច្នៃ នៅក្នុងពិធីជប់លាងមួយបណ្ដាលឲ្យរងរបួសដៃស្រាល។ ក្រោយត្រូវរបួសពួកគេទាំង ២ បាននាំគ្នារត់ឡើងជិះរថយន្តទៅព្យាបាលរបួស។ បន្ទាប់ពីត្រឡប់មកពីព្យាបាលរបួសវិញ ពួកគេក៏ជួបក្រុមជនរងគ្រោះទាំងនោះ ជិះម៉ូតូប្រជែងគ្នាពេញផ្លូវ ក្នុងទិសដៅបញ្ច្រាស់គ្នា។ ដោយសារតែយប់ជ្រៅស្ងាត់ ពួកគេបានបើករថយន្តក្នុងល្បឿនលឿនហើយខ្វះការប្រុងប្រយ័ត្ន ក៏បុកជនរងគ្រោះទាំងនោះតែម្ដងទៅ។
លោក សំណាង បានបញ្ជាក់ថា៖ «នៅកន្លែងកើតហេតុ សមត្ថកិច្ចយើងបានរកឃើញវត្ថុតាង ដាវកែច្នៃចំនួន ៣ ដើម និង កាំបិតមួយដើម ដែលជារបស់ក្រុមជនរងគ្រោះ។ ករណីនេះ សមត្ថកិច្ចយើងនឹងបន្តស្រាវជ្រាវបន្ថែមទៀត»៕
វីដេអូ៖