ភ្នំពេញៈ អភិបាលរាជធានី-ភ្នំពេញជំរុញឱ្យកងកម្លាំង និងអាជ្ញាធរខណ្ឌទាំង ១៤ ពង្រឹងសន្តិសុខសុវត្ថិភាព និងសណ្ដាប់ធ្នាប់ជូនពលរដ្ឋ ក្រោយពីរដ្ឋាភិបាលបើកប្រទេសឡើងវិញ ជាពិសេសក្នុងពិធីបុណ្យចូលឆ្នាំសកលនាពេលខាងមុខនេះ។
ការជំរុញនេះធ្វើឡើងក្នុងកិច្ចប្រជុំគណៈបញ្ជាការឯកភាពរាជធានីភ្នំពេញតាមអនឡាញជាមួយនឹងកងកម្លាំង មន្ទីរពាក់ព័ន្ធ និងអាជ្ញាធរខណ្ឌទាំង ១៤ នៅសាលារាជធានីភ្នំពេញ ពីថ្ងៃទី ២០ ខែធ្នូ ឆ្នាំ ២០២១។
នៅក្នុងកិច្ចប្រជុំនោះលោក ឃួង ស្រេង អភិបាលរាជធានី-ភ្នំពេញបានលើកឡើងថា ថ្មីៗនេះរាជរដ្ឋាភិបាលកម្ពុជាបានប្រកាសបើកប្រទេសឡើងវិញ។
បន្ថែមពីនេះក៏បានសម្រេចបិទបញ្ចប់ “ព្រឹត្តិការណ៍ ២០ កុម្ភៈ” ដែលធ្វើឱ្យសកម្មភាពអាជីវកម្មនានាវិលមករកភាពប្រក្រតីវិញ។
ទន្ទឹមនេះដែរ លោកបានជំរុញដល់អាជ្ញាធរមានសមត្ថកិច្ចទាំង ១៤ ខណ្ឌ ត្រូវពង្រឹងសន្តិសុខ សុវត្ថិភាពជូនពលរដ្ឋនាឱកាសពិធីបុណ្យណូអែល និងបុណ្យចូលឆ្នាំសកលដែលខិតជិតមកដល់។
លោកថា៖ «ដូច្នេះរាល់សកម្មភាពនានាវានឹងកើតឡើងវិញទាំងបទល្មើសផ្សេងៗទាំងល្បែងស៊ីសងគ្រប់ប្រភេទ ទាំងបញ្ហាសណ្ដាប់ធ្នាប់សាធារណៈ។ ដូច្នេះ កម្លាំងមានសមត្ថកិច្ច និងអាជ្ញាធរខណ្ឌទាំងអស់ត្រូវពង្រឹងឡើងវិញ ពិសេសបង្ក្រាបឱ្យបាននូវបទល្មើសផ្សេងៗ ដូចជា បទល្មើស លួច ឆក់ ប្លន់ គ្រឿងញៀន និងល្បែងស៊ីសងជាដើម ដើម្បីធានាបាននូវសន្តិសុខសុវត្ថិភាពជូនបងប្អូនពលរដ្ឋរបស់យើង»។
លោកបានបន្តថា ពាក់ព័ន្ធនឹងបុណ្យចូលឆ្នាំសកល អាជ្ញាធរខណ្ឌក៏ដូចជាមន្ទីរសាធារណការរាជធានីភ្នំពេញ ត្រូវរាយការណ៍ពីគោលដៅកកស្ទះក្នុងមូលដ្ឋានរបស់ខ្លួន ហើយបើដោះស្រាយមិនចេញ ត្រូវរាយការណ៍មកអាជ្ញាធររាជធានី-ភ្នំពេញ ដើម្បីដោះស្រាយ។
លោកថា៖ «ពិធីបុណ្យចូលឆ្នាំសកលនេះបងប្អូនពលរដ្ឋនឹងសម្រុកចាកចេញពីលំនៅឋាន ដើម្បីឆ្លងឆ្នាំដែលវានឹងធ្វើឱ្យតំបន់ប្រឈមមួយចំនួនកកស្ទះចរាចរណ៍ ដូច្នេះក្នុងនាមយើងជាអាជ្ញាធរ កម្លាំងមានសមត្ថកិច្ច ត្រូវសម្រួលចរាចរណ៍ជូនបងប្អូនពលរដ្ឋ ដើម្បីឱ្យពួកគាត់បានសប្បាយរីករាយ»។
ស្នងការនគរបាលរាជធានី-ភ្នំពេញលោក ស ថេត បានថ្លែងក្នុងកិច្ចប្រជុំនោះដែរថា ក្នុងឱកាសបុណ្យចូលឆ្នាំសកលខាងមុខសមត្ថកិច្ចនឹងប្រើកម្លាំងសរុបចំនួន ១ ១៦៥ នាក់ ដើម្បីការពារសន្តិសុខ សុវត្ថិភាព និងសម្រួលចរាចរណ៍ជូនប្រជាពលរដ្ឋ។
ជាមួយគ្នានេះ លោកស្នងការបានសរសើរលោក ឃួង ស្រេង ដែលតែងតែយកចិត្តទុកដាក់ក្នុងកិច្ចការពារសន្តិសុខ សុវត្ថិភាពជូនពលរដ្ឋដោយតែងចុះផ្ទាល់ដល់ទីតាំងត្រួតពិនិត្យតាមគោលដៅនានាក្នុងរាជធានីភ្នំពេញ។
លោក ធឹម សំអាន អភិបាលខណ្ឌបឹងកេងកង ប្រាប់ភ្នំពេញ-ប៉ុស្តិ៍ថា រដ្ឋបាលខណ្ឌរបស់លោកបានដាក់កម្លាំងការពារ ២៤ ម៉ោង ទាំងប៉ូលិស ប៉េអឹម រួមទាំងប្រជាការពារ ដើម្បីការពារសុវត្ថិភាពជូនពលរដ្ឋ និងការសម្រួលចរាចរណ៍ជាដើម។
លោកថា៖ «និយាយរួមក្រុមការងារខ្ញុំ ប្រចាំការ ២៤ ម៉ោងលើ ២៤ ម៉ោង បម្រើការងារជូនពលរដ្ឋ នៅពេលមានការរាយការណ៍ទាក់ទងនឹងអសន្តិសុខ ឬហេតុការណ៍អីមួយ យ៉ាងយូរ ១៥ នាទីទៅដល់កន្លែងកើតហេតុ ព្រោះរាល់ការការពារសន្តិសុខគឺជាភារកិច្ចរបស់ខ្ញុំដែលជាគណៈអភិបាលនៅខណ្ឌ»។
លោកឱ្យដឹងដែរថា សម្រាប់បទល្មើសផ្សេងៗដូចជា លួច ឆក់ ប្លន់ ឬបញ្ហាការកកស្ទះចរាចរណ៍ក្នុងខណ្ឌរបស់លោកពុំសូវមានទេ តែភាគច្រើនជាអាជីវកម្មបើកហាងហូបចុកដែលបង្កការរំខានដល់ការស្នាក់នៅរបស់ពលរដ្ឋ៕