.jpg)
មន្ត្រីក្រសួងសាធារណការប្រជុំពិនិត្យវឌ្ឍនភាពការងារពីថ្ងៃទី ២០ ធ្នូ។ រូបថត MPWT
ភ្នំពេញៈ ក្រសួងសាធារណការ និងដឹកជញ្ជូននឹងរៀបចំសន្និបាតប្រចាំឆ្នាំរយៈពេល ២ ថ្ងៃ នៅចុងខែធ្នូនេះ ដែលមន្ត្រីអះអាងថា សន្និបាតនេះនឹងផ្ដោតជាសំខាន់ទៅលើបញ្ហាប្រឈម និងសំណូមពរនានា ដែលធ្លាប់ជួបប្រទះ ដើម្បីចៀសវាងការធ្វើបទអន្តរាគមន៍ ដោយការអានរបាយការណ៍របស់ខ្លួនទាំងស្រុង។
កាលពីថ្ងៃទី ២០ ខែវិច្ឆិកា លោក តូច ចាន់កុសល រដ្ឋលេខាធិការប្រចាំការក្រសួងសាធារណការ និងដឹកជញ្ជូន និងជាប្រធានគណៈកម្មការបានដឹកនាំកិច្ចប្រជុំពិនិត្យវឌ្ឍនភាពការងារត្រៀមរៀបចំសន្និបាតបូកសរុបលទ្ធផលការងារឆ្នាំ ២០២១ និងលើកទិសដៅការងារឆ្នាំ ២០២២ នាទីស្តីការក្រសួងដោយមានការចូលរួមពីថ្នាក់ដឹកនាំ និងមន្ត្រីក្រោមចំណុះទាំងអស់។
ទំព័រហ្វេសប៊ុករបស់ក្រសួងសាធារណការបញ្ជាក់ថា៖ «ពិធីសន្និបាតនេះ គ្រោងនឹងប្រារព្ធធ្វើឡើងនៅថ្ងៃទី ២៦-២៧ ខែមករា ឆ្នាំ ២០២២ ដោយមានសមាសភាពអញ្ជើញចូលរួមដោយផ្ទាល់ និងតាមប្រព័ន្ធវីដេអូពីចម្ងាយ ជាមួយនឹងការប្រកាន់ខ្ជាប់តាមវិធានការការពាររបស់ក្រសួងសុខាភិបាល ដើម្បីទប់ស្កាត់ការឆ្លង រីករាលដាលនៃជំងឺកូវីដ ១៩»។
លោក តូច ចាន់កុសល ថ្លែងក្នុងឱកាសនោះថា កិច្ចប្រជុំនេះធ្វើឡើង ដើម្បីពិភាក្សាអំពីតួនាទី និងភារកិច្ចរបស់សមាជិក-សមាជិកាគណៈកម្មការត្រៀមរៀបចំសន្និបាតបូកសរុបលទ្ធផលការងារឆ្នាំ ២០២១ និងលើកទិសដៅការងារឆ្នាំ ២០២២ ក៏ដូចជាពិនិត្យមើលវឌ្ឍនភាពការងារត្រៀមរៀបចំ សំដៅកំណត់នូវចំណុចខ្លាំង ចំណុចខ្សោយ និងស្វែងរកដំណោះស្រាយចំពោះបញ្ហាប្រឈម និងសំណូមពរនានា ដើម្បីឱ្យសន្និបាតអាចប្រព្រឹត្តទៅដោយរលូនតាមការគ្រោងទុក។
ក្នុងឱកាសនោះ លោកក៏បានជំរុញឱ្យអនុគណៈកម្មការបទអន្តរាគមន៍ រៀបចំសេចក្តីព្រាង និងជ្រើសរើសប្រធានបទសម្រាប់ សន្និបាតឱ្យបានសមស្របដោយផ្តោតជាសំខាន់ទៅលើការអភិវឌ្ឍ ហេដ្ឋារចនាសម្ព័ន្ធកម្ពុជា ក្រោយវិបត្តិជំងឺកូវីដ ១៩។ បន្ថែមពីនេះ លោកក៏បានស្នើឱ្យអង្គភាពក្រោមឱវាទក្រសួង ដែលត្រូវឡើងធ្វើបទអន្តរាគមន៍ក្នុងសន្និបាត ត្រូវផ្ដោតជាសំខាន់ទៅលើបញ្ហាប្រឈម និងសំណូមពរ ដើម្បីចៀសវាងការធ្វើបទអន្តរាគមន៍ដោយការអានរបាយការណ៍របស់ខ្លួនទាំងស្រុងផងដែរ។
លោកបញ្ជាក់ថា៖ «សមាជិក-សមាជិកាអនុគណៈកម្មការទាំងអស់នឹងខិតខំប្រឹងប្រែងបំពេញការងារប្រកបដោយការទទួលខុសត្រូវខ្ពស់ ដើម្បីឱ្យពិធីសន្និបាតរបស់ក្រសួងមានដំណើរការប្រកបដោយជោគជ័យយ៉ាងរលូន»។
យោងតាមរបាយការណ៍របស់លោក សឿន ប៊ុនលី អគ្គនាយកនៃអគ្គនាយកដ្ឋានផែនការ និងគោលនយោបាយបានឱ្យដឹងថា វឌ្ឍនភាពនៃការត្រៀមរៀបចំរបាយការណ៍បូកសរុបការងារសម្រាប់សន្និបាត គិតរហូតមកទល់ពេលនេះ សម្រេចបាន ៦៥% ហើយ។ លោក សឿន ប៊ុនលី ក៏បានអះអាងដែរថា ជាមួយនឹងសមិទ្ធផលទាំងនេះ ក្រុមការងារក៏កំពុងខិតខំប្រឹងប្រែងបំពេញការងារយ៉ាងយកចិត្តទុកដាក់ និងការទទួលខុសត្រូវខ្ពស់តាមបណ្តាអង្គភាពពាក់ព័ន្ធក្រោមឱវាទរបស់ក្រសួង៕
