.jpg)
សមត្ថកិច្ចពេលចុះចាប់ជនសង្ស័យករណីប្លន់អ្នកលក់ ឡេ អ៊ាន សៀវម៉ី។ រូប ប៉ូលិស
ភ្នំពេញៈ ប្រធានគណបក្សនយោបាយម្នាក់លោក សុខសុវណ្ណ វឌ្ឍនាសាប៊ុង ហៅ William Guang និងមនុស្ស ១៤ នាក់ត្រូវបានចាប់ខ្លួនជាបន្តបន្ទាប់តាមគោលដៅដោយឡែកពីគ្នា ទាក់ទងជាមួយនឹងអំពើប្លន់ប្រដាប់អាវុធ ១ ករណី កាលពីព្រឹកថ្ងៃទី ១៩ ខែធ្នូ ឆ្នាំ ២០២១ ចំណុចផ្ទះវីឡាលេខ V01 ស្ថិតក្នុងភូមិគោកចំបក់ សង្កាត់ចោមចៅ១ ខណ្ឌពោធិ៍សែនជ័យ រាជធានីភ្នំពេញ ដែលជនរងគ្រោះត្រូវបានគេស្គាល់ថា ជាអ្នកលក់ផលិតផល តាម Online និងមានងារជាឧកញ៉ា ឈ្មោះ អ៊ាន សៀវម៉ី។
ករណីប្លន់នោះត្រូវបានឧកញ៉ាដែលជាស្ត្រីរងគ្រោះ អះអាងថាបានបាត់បង់នូវគ្រឿងអលង្ការមួយចំនួនរួមទាំងទូរស័ព្ទដៃ I-phone ចំនួន ២ គ្រឿងគិតជាទឹកប្រាក់ សរុបជិត ២ លានដុល្លារអាមេរិក។
លោក សាន សុខសីហា អ្នកនាំពាក្យស្នងការដ្ឋាននគរបាលរាជធានីភ្នំពេញបានប្រាប់ភ្នំពេញ-ប៉ុស្តិ៍នៅព្រឹកថ្ងៃទី ២១ ខែធ្នូ ថា ក្រោយពីមានករណីប្លន់ប្រដាប់អាវុធនេះ កម្លាំងសមត្ថកិច្ចជំនាញនគរបាលបានសហការជាមួយកម្លាំងកងរាជអាវុធហត្ថ ចុះស្រាវជ្រាវភ្លាមៗ ដើម្បីស្វែងរកមុខសញ្ញាក្រុមចោរប្រដាប់អាវុធទាំងនោះ។
លោកបានអះអាងថា លុះមកដល់វេលាម៉ោង ១០ យប់ថ្ងៃទី ២០ ខែធ្នូ ក្រុមសមត្ថកិច្ចនគរបាលជំនាញបានប្រទះឃើញរថយន្តទំនើបមួយគ្រឿង ដែលជនសង្ស័យប្រើប្រាស់ក្នុងពេលធ្វើសកម្មភាពប្លន់ផ្ទះជនរងគ្រោះក៏បាននាំគ្នាដេញតាមចាប់ ប៉ុន្តែដោយយប់ងងឹត ក្រុមជនសង្ស័យបានបើកគេចខ្លួនដល់ចំណុចមានគម្ពោតព្រៃមួយកន្លែង ក៏នាំគ្នាឈប់រត់ចូលទៅពួនក្នុងព្រៃ ដោយទុកឡានចោលនៅលើដងផ្លូវ។
លោកបានបញ្ជាក់ថា៖ «មួយសន្ទុះក្រោយមក គឺវេលាម៉ោង ១០:៣០ នាទីយប់ ថ្ងៃទី ២០ ខែធ្នូ ឆ្នាំ ២០២១ កម្លាំងសមត្ថកិច្ចយើងបានធ្វើការរុករកជនសង្ស័យនៅក្នុងព្រៃនោះដោយចាប់ខ្លួនស្ត្រីសង្ស័យម្នាក់។ បន្ទាប់មកនៅវេលាម៉ោង ៣ ទៀបភ្លឺ ឈានចូលថ្ងៃទី ២១ ខែធ្នូ សមត្ថកិច្ចយើងក៏ចាប់ខ្លួនបុរសជាជនសង្ស័យម្នាក់ទៀត»។
សកម្មភាពសមត្ថកិច្ចព័ទ្ធឆែកផ្ទះលោក សុខសុវណ្ណ វឌ្ឍនាសាប៊ុង។ រូបថត នគរបាល
លោក សុខសីហា ថ្លែងថា ជនសង្ស័យទាំង ២ គឺជាអ្នកធ្វើសកម្មភាពប្លន់ផ្ទះឧកញ៉ា អ៊ាន សៀវម៉ី ដោយផ្ទាល់នៅក្នុងថ្ងៃកើតហេតុនោះ។ បច្ចុប្បន្ន ជនសង្ស័យទាំង ២ រួមទាំងវត្ថុតាងរថយន្តជាមធ្យោបាយប្រព្រឹត្តបទល្មើស ត្រូវបានបញ្ជូនមកស្នងការដ្ឋានរាជធានីភ្នំពេញ ដើម្បីសាកសួរបន្ថែមជាប្រយោជន៍ស្រាវជ្រាវរកជនដែលពាក់ព័ន្ធក្នុងបទល្មើសនេះ ដើម្បីចាប់ខ្លួនបញ្ជូនឱ្យតុលាការចាត់វិធានការបន្តតាមនីតិវិធី។
ដោយឡែក ដោយយោងតាមរបាយការណ៍ព័ត៌មានដែលត្រូវបានផ្សព្វផ្សាយលើគេហទំព័រ Facebook ផ្លូវការរបស់កងរាជអាវុធហត្ថរាជធានី-ភ្នំពេញបានឱ្យដឹងផងដែរថាក្រុមកម្លាំងកងរាជអាវុធហត្ថរាជធានីភ្នំពេញក៏បានប្រឹងប្រែងស្រាវជ្រាវដែរ រហូតឈានដល់ការកំណត់បានទីតាំងសម្បុកក្រុមចោរប្លន់ប្រដាប់អាវុធទាំងនោះ ហើយបានសម្រុកចូលបង្ក្រាបចាប់បានមនុស្ស ១២ នាក់ថែមទៀត រួមទាំងមេខ្លោងកាលពីយប់ថ្ងៃទី ២០ ខែធ្នូ ឆ្នាំ ២០២១។
របាយការណ៍ព័ត៌មាននេះបានបង្ហាញថា នៅក្នុងប្រតិបត្តិការបង្ក្រាបករណីចោរប្លន់ប្រដាប់អាវុធនេះ កម្លាំងជំនាញកងរាជអាវុធហត្ថរាជធានី-ភ្នំពេញដឹកនាំផ្ទាល់ដោយលោក រ័ត្ន ស្រ៊ាង មេបញ្ជាការកងរាជអាវុធហត្ថរាជធានីភ្នំពេញដែលបានដឹកនាំកងកម្លាំងក្នុងការស្រាវជ្រាវនេះក៏បានរកឃើញទីតាំងសម្បុកចោរប្រដាប់អាវុធដែលជាភូមិគ្រឹះដ៏ធំមួយស្ថិតក្នុងបុរីប៉េងហួតក្នុងសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញក្បែរផ្លូវ ៦០ ម៉ែត្រ ហើយបានចូលទៅបង្ក្រាបចាប់ជនសង្ស័យជាមេខ្លោងរៀបចំផែនការប្លន់ម្នាក់ឈ្មោះ សុខសុវណ្ណ វឌ្ឍនាសាប៊ុង ហៅ William Guang ប្រធានគណបក្សខ្មែរក្រោក និងបក្ខពួក ១២ នាក់ផ្សេងទៀត ក្នុងនោះមានស្រី ៣ នាក់ ព្រមទាំងរឹបអូស វត្ថុតាងគ្រឿងអលង្ការមួយចំនួន និងរឹបអូសអាវុធខ្លី ៤ ដើម និង វែង ១ ដើម។
សមត្ថកិច្ចនាំខ្លួនជនសង្ស័យចេញពីផ្ទះពីថ្ងៃទី ២០ ធ្នូ។ រូបថត នគរបាល
លោក អេង ហ៊ី អ្នកនាំពាក្យកងរាជអាវុធលើផ្ទៃប្រទេសបានបញ្ជាក់ប្រាប់ភ្នំពេញប៉ុស្តិ៍នាព្រឹកថ្ងៃទី ២១ ខែធ្នូថា៖ «ក្នុងប្រតិបត្តិការបង្ក្រាបក្រុមចោរប្លន់ប្រដាប់អាវុធនេះ សមត្ថកិច្ចកងរាជអាវុធហត្ថយើង ពិតជាបានឃាត់ខ្លួនជនសង្ស័យឈ្មោះ សុខសុវណ្ណ វឌ្ឍនាសាប៊ុង ហៅ William Guang ប្រធានគណបក្សខ្មែរក្រោក និងបក្ខពួកមួយចំនួនទៀតមែន»។
លោកបានបញ្ជាក់ថា៖ «ជនសង្ស័យរូបនេះជាមេខ្លោង ឬ ជាអ្នកផ្ដើមគំនិតយ៉ាងណានោះ ខ្ញុំមិនទាន់ដឹងច្បាស់ទេ ព្រោះសមត្ថកិច្ចយើងកំពុងអនុវត្តនីតិវិធីស៊ើបសួរនៅឡើយ»។
លោក រ័ត្ន ស្រ៊ាង បានអះអាងនៅរសៀលថ្ងៃទី ២១ ខែធ្នូ ឆ្នាំ ២០២១ ថានៅចំពោះមុខសមត្ថកិច្ច លោក សុខសុវណ្ណ វឌ្ឍនាសាប៊ុង ហៅ William Guang ប្រធានគណបក្សខ្មែរក្រោកបានសារភាពថា គាត់ពិតជាអ្នករៀបចំគម្រោង និងបានដឹកនាំការបញ្ជាឱ្យធ្វើសកម្មភាពប្លន់ ឧកញ៉ា អ៊ាន សៀវម៉ី នាថ្ងៃនោះ។
លោកបានបញ្ជាក់ថា៖ «ជនសង្ស័យជាមេខ្លោងក្រុមចោរប្លន់ឈ្មោះ William Guang ប្រធានគណបក្សខ្មែរក្រោកបានសារភាពថា ខ្លួនពិតជាបានដឹកនាំបក្ខពួកធ្វើសកម្មភាពប្លន់អ្នកលក់ឡេ ឈ្មោះ អ៊ាន សៀវម៉ី ពិតមែន ដោយខ្លួនជាអ្នករៀបចំផែនការនេះ»។
លោកថា នៅពេលនេះកម្លាំងសមត្ថកិច្ចជំនាញកំពុងបន្តនីតិវិធី ស៊ើបសួរអ្នកពាក់ព័ន្ធមួយចំនួនបន្ថែមទៀត ដើម្បីរៀបចំកសាងសំណុំរឿងបញ្ជូនទៅតុលាការតាមនីតិវិធីច្បាប់៕
វីដេអូ៖
