ភ្នំពេញៈ រដ្ឋមន្ដ្រីក្រសួងការងារ និងបណ្ដុះបណ្ដាលវិជ្ជាជីវៈ លោក អ៊ិត សំហេង បានឯកភាពលើ «លទ្ធភាពក្នុងការផ្លាស់ប្តូររថយន្តដឹកកម្មករនិយោជិតប្រភេទរថយន្តដឹកទំនិញ មកជារថយន្តដែលមានសុវត្ថិភាពប្រសើរជាង» និងជំរុញឱ្យគ្រប់ស្ថាប័ន អង្គភាពពាក់ព័ន្ធត្រូវបង្កើននូវកិច្ចសហការតាមគ្រប់រូបភាព និងប្រកបដោយប្រសិទ្ធភាពខ្ពស់លើការងារនេះ។
លោក អ៊ិត សំហេង ថ្លែងបែបនេះ នៅពេលធ្វើជាអធិបតីបើកសិក្ខាសាលាថ្នាក់ជាតិស្តីពី «លទ្ធភាពក្នុងការផ្លាស់ប្តូររថយន្តដឹកកម្មករនិយោជិតពីប្រភេទរថយន្តដឹកទំនិញ មកជារថយន្តដែលមានសុវត្ថិភាពប្រសើរជាង» ដែលរៀបចំដោយអង្គការមូលនិធិបង្ករបួសអាស៊ី សហការជាមួយគណៈកម្មាធិការជាតិសុវត្ថិភាពចរាចរណ៍ផ្លូវគោក ក្រសួងការងារ និងដៃគូកាលពីថ្ងៃទី ២១ ធ្នូ នៅសណ្ឋាគារ ហ៊ីម៉ាវ៉ារី។ សិក្ខាសាលានេះគឺជាការបង្កើតវេទិកាដ៏មានសារៈសំខាន់ និងអាចឱ្យស្ថាប័នពាក់ព័ន្ធចូលរួមពិភាក្សាគ្នា ផ្លាស់ប្តូរមតិយោបល់ និងចែករំលែកនូវបទពិសោធល្អៗ ដែលជាធាតុចូលដ៏សំខាន់ក្នុងការកែលម្អប្រភេទរថយន្តដឹកកម្មករនិយោជិតឱ្យបានសមស្របទៅតាមលក្ខណៈបច្ចេកទេស និងតាមស្ថានភាពបច្ចុប្បន្នក្នុងកម្រិតស្តង់ដាមួយ ដែលអាចទទួលយកបាន ដើម្បីឱ្យការដឹកជញ្ជូនកម្មករ និយោជិត មានសុវត្ថិភាព ផាសុកភាព និងសណ្តាប់ធ្នាប់កាន់តែល្អប្រសើរជាងមុន។
លោកថ្លែងថា៖ «ជុំវិញករណីឱ្យអ្នកបើកបររថយន្តប្រភេទដឹកទំនិញដឹកកម្មករនិយោជិតឱ្យប្ដូរមកប្រើប្រាស់ ប្រភេទរថយន្តដឹកអ្នកដំណើររឿងនេះយើងកំពុងសិក្សាដោយថា ធ្វើម៉េចដើម្បីអាចផ្ទេរបាន។ ខ្ញុំក៏ឯកភាពដែរ តាមការសិក្សា តាមស្មារតីដែលថា យើងនឹងរៀបចំឱ្យមានជាផែនការយុទ្ធសាស្ដ្រមួយ សម្រាប់ឈានទៅដល់ការផ្ទេរ។ ប៉ុន្ដែរបៀបវិធីនៃការផ្ទេរនេះ ខ្ញុំគិតថា វាពិបាក វាស្ថិតនៅលើខ្សែឆ្មារមួយ ដែលងាយនឹងដាច់»។
លោក អ៊ិត សំហេង លើកឡើងថា តាមរយៈសិក្ខាសាលានេះនឹងជួយជំរុញលើការផ្សព្វផ្សាយនូវដំណោះស្រាយ និងអនុសាសន៍ដល់អ្នកពាក់ព័ន្ធ ជាពិសេសអ្នកធ្វើសេចក្តីសម្រេចចិត្តសម្រាប់ធ្វើឱ្យប្រសើរឡើងនូវសុវត្ថិភាព ចរាចរណ៍សម្រាប់កម្មករនិយោជិត ព្រមទាំងសម្របសម្រួលឱ្យមានការព្រមព្រៀងពីភាគីពាក់ព័ន្ធ អំពីផែនការនៃសកម្មភាពក្នុងការផ្លាស់ប្តូររថយន្តដឹកកម្មករនិយោជិតពីប្រភេទរថយន្តដឹកទំនិញ មកជារថយន្តដែលមានសុវត្ថិភាពប្រសើរជាងនៅតាមតំបន់ដែលងាយរងគ្រោះមកលើមធ្យោបាយដឹកជញ្ជូនកម្មករនិយោជិត។
លោកបញ្ជាក់ថា ក្រសួងការងារបានយកចិត្តទុកដាក់ទៅដល់សុវត្ថិភាពរបស់កម្មករ និយោជិត ដោយបានគិតគូរអំពីបញ្ហាគ្រោះថ្នាក់ចរាចរណ៍ដែលបានកើតឡើង ទៅលើកម្មករនិយោជិតអំឡុងពេលធ្វើដំណើរ និងធ្វើការជំរុញឱ្យកាន់តែប្រសើរឡើងនូវមធ្យោយបាយដឹកជញ្ជូនកម្មករនិយោជិត ដោយការប្រើប្រាស់រថយន្តជាប្រភេទដឹកអ្នកដំណើរ ការរៀបចំឱ្យមានកៅអីអង្គុយឱ្យបានសមស្រប និងការសហការជាមួយអង្គភាពពាក់ព័ន្ធ ដើម្បីតាមដានត្រួតពិនិត្យលក្ខណៈ រថយន្តដឹកកម្មករនិយោជិតជាប្រចាំ។
បើតាមលោក សំហេង ករណីគ្រោះថ្នាក់ចរាចរណ៍ផ្លូវគោកគឺជាឃាតករលាក់មុខដែលធ្វើឱ្យមនុស្ស ស្លាប់ពិការ បន្សល់ទុកនូវសោកនាដកម្មយ៉ាងធំធេង និងបង្កផលប៉ះពាល់ដល់សេដ្ឋកិច្ចគ្រួសារ និងសង្គមជាតិ ខណៈនៅទូទាំងប្រទេសក្នុងឆ្នាំ ២០២១ នេះ គ្រោះថ្នាក់ចរាចរណ៍ផ្លូវគោក មានការកើនឡើងគួរឱ្យព្រួយបារម្ភ ដោយក្នុង ១ ថ្ងៃ បណ្ដាលឱ្យប្រជាពលរដ្ឋប្រមាណ ៦ នាក់ស្លាប់ និងរបួសពី ៨ ទៅ ៩ នាក់ ក្នុងនោះអ្នកស្លាប់ និងអ្នករបួសក៏មានកម្មករនិយោជិតផងដែរ។
លោក គឹម បញ្ញា នាយកអង្គការមូលនិធិបង្ករបួសអាស៊ីប្រចាំនៅកម្ពុជាបានថ្លែងថា ដោយមានការចូលរួម និងការខិតខំពីអ្នកពាក់ព័ន្ធ លោកកត់សម្គាល់ឃើញថា ចំនួនរថយន្តផ្តល់សេវាដឹកកម្មករនិយោជិត ដែលគេប្រើរថយន្តប្រភេទដឹកទំនិញមានការថយចុះគួរឱ្យកត់សម្គាល់។ ប៉ុន្ដែទោះជាយ៉ាងណាក្តី ចំនួនរថយន្តប្រភេទនេះ គឺនៅតែមានច្រើននៅឡើយ។ លោកឱ្យដឹងតាមរយៈរបាយការណ៍ដែលផ្សព្វផ្សាយដោយបេឡាជាតិរបបសន្តិសុខសង្គមក្នុងពេលថ្មីៗនេះ គឺនៅក្នុងចំណោមរថយន្តដែលកំពុងផ្តល់សេវាដឹកជញ្ជូន កម្មករនិយោជិតទៅមកបំពេញការងារក្នុងឆ្នាំ ២០២០ ដែលមានជិត ៤ ០០០ គ្រឿងមានប្រមាណ ៦០% គឺជារថយន្តប្រភេទដឹកទំនិញ។
លោកថ្លែងថា៖ «ខ្ញុំយល់ឃើញថាទោះបីជាការប្តូរបង្កើនសុវត្ថិភាពរថយន្តដឹកកម្មករនិយោជិត ជារឿងមិនងាយស្រួលមានបញ្ហាប្រឈម/ឧបសគ្គ និងភាពស្មុគស្មាញច្រើន ប៉ុន្តែបើយើងអាចជំរុញឱ្យមានការប្តេជ្ញាចិត្ត និងការចូលរួមដោយដាក់បញ្ហានេះជាអាទិភាពកម្រិតខ្ពស់សម្រាប់ការចាត់ជាវិធានការឆ្លើយតបឱ្យបានសកម្ម ព័ត៌មាន និងស្ថិតិច្បាស់លាស់ ព្រមទាំងយុទ្ធសាស្ត្រ និងផែនការសកម្មភាពជាក់លាក់រួម យើងប្រាកដជាអាចឆ្លើយតប ឬរកដំណោះស្រាយបានសមស្របក្នុងពេលដ៏ឆាប់រហ័សចំពោះបញ្ហានេះជាក់ជាមិនខាន»។
បើតាមលោក បញ្ញា បើគិតជាមធ្យមក្នុង ១ ខែៗ មានករណីគ្រោះថ្នាក់ចរាចរណ៍លើរថយន្តដឹកកម្មកររួមបែបនេះយ៉ាងតិចណាស់ក៏ ១ ករណីដែរ និងបណ្តាលឱ្យកម្មករនិយោជិតរងរបួសធ្ងន់ស្រាលជាច្រើនសិបនាក់នៅក្នុងករណីនីមួយៗ និងករណីខ្លះរហូតដល់ស្លាប់ ឬពិការជាច្រើននាក់៕