ភ្នំពេញៈ ម្ចាស់រថយន្តព្រុសដែលមានទំនាស់ជាមួយ VJ តាប៊ុយ ក្នុងរឿងគ្រោះថ្នាក់ចរាចរណ៍កាលពីរំលងអធ្រាត្រឈានចូលថ្ងៃទី ១៤ ធ្នូ ឆ្នាំ ២០២១ បានដាក់ពាក្យបណ្តឹងទៅសាលាដំបូងរាជធានីភ្នំពេញក្នុងសប្តាហ៍នេះ ដោយទាមទារសំណងជំងឺចិត្តចំនួន ១០ ម៉ឺនដុល្លារអាមេរិក ខណៈលោក ឃី ហុង ហៅ VJ តាប៊ុយ ជំរុញឱ្យប្តឹងបន្ថែម។
បុរសម្នាក់ដែលអះអាងថាជាម្ចាស់រថយន្តព្រុសរងគ្រោះបានប្រាប់ ភ្នំពេញ ប៉ុស្តិ៍ នៅថ្ងៃទី ២១ ធ្នូ ថា លោកបានពឹងពាក់មេធាវី ១ រូប និងបានដាក់ពាក្យបណ្តឹងទៅសាលាដំបូងរាជធានីភ្នំពេញរួចរាល់ហើយក្នុងសប្តាហ៍នេះ។ ការណ៍ដែលលោកដាក់ពាក្យបណ្តឹងនេះ ដោយសារតែលោក VJ តាប៊ុយមិនមានចេតនាក្នុងការទទួលខុសត្រូវចំពោះទង្វើរបស់ខ្លួនពាក់ព័ន្ធនឹងគ្រោះថ្នាក់ចរាចរណ៍កន្លងមក។
លោកបន្តថា VJ តាប៊ុយ មិនទទួលស្គាល់នូវកំហុសរបស់ខ្លួន ហើយប្រើប្រាស់សម្តីក៏ដូចជាមានការញុះញង់តាមបណ្តាញសង្គមហ្វេសប៊ុកក្នុងគោលបំណងដែលធ្វើឱ្យសាធារណជនស្អប់ខ្ពើមរើសអើងដល់លោកជាជនរងគ្រោះ និងជាម្ចាស់រថយន្តព្រុស «តាមពិតទៅគាត់ជាមនុស្សម្នាក់មិនទទួលកំហុស ហើយគាត់ថែមទាំងមើលងាយខ្ញុំទៀត។ គាត់មិនស័ក្តិសមជាបុគ្គលដែលមហាជនគាំទ្រ មិនមែនជាបុគ្គលដែលឱ្យយុវជនជំនាន់ក្រោយយកគំរូបានខ្ញុំមិនទទួលយកបានទេ»។
លោកបន្តថា៖ «អ្នកធំស្រុកខ្មែរស្គាល់ច្រើនណាស់ ប្រយ័ត្នអស់ទាំងឡាន ហើយរកកន្លែងជ្រកគ្មានទៀត។ ភាសាដែលគាត់និយាយមកខ្ញុំនេះមិនដឹងថាខ្ញុំអាចអស់ទាំងឡានហើយជាប់គុកទៀតក៏មិនដឹង ឬក៏យ៉ាងម៉េចខ្ញុំមិនដឹងដែរ»។
ម្ចាស់រថយន្តព្រុសបញ្ជាក់ថា មូលហេតុដែលជំរុញឱ្យលោកទទួលយកមិនបានទៀតនោះគឺការដែលមានបញ្ហារថយន្តបុកគ្នាភ្លាមៗគឺលោក VJ តាប៊ុយបាននិយាយនៅចំពោះមុខសមត្ថកិច្ច និងអ្នកសារព័ត៌មាននៅពេលនោះថា គាត់នឹងទទួលខុសត្រូវដោយគ្មានលក្ខខណ្ឌ និងសន្យាជួបគ្នានៅប៉ុស្តិ៍នគរបាលសង្កាត់ស្រះចកនៅវេលាម៉ោង ៨ ព្រឹក ថ្ងៃទី ១៤ ធ្នូ ឆ្នាំ ២០២១។ ប៉ុន្តែដល់ពេលវេលាណាត់ជួបគ្នាបែរជាលោកទាក់ទងតាមទូរស័ព្ទមិនចូលទៅវិញ។
ម្ចាស់រថយន្តព្រុសបន្ថែមថា លោកបានយករថយន្តទៅជួសជុល ហើយម្ចាស់ហ្គារ៉ាសជួសជុលរថយន្តបានសរសេរវិក្កយបត្រដែលថ្លៃជួសជុលសរុបមានតម្លៃចំនួន ២ ២៥០ ដុល្លារអាមេរិក។ លោកបានផ្ញើវិក្កយបត្រនោះទៅឱ្យ VJ តាប៊ុយតាមរយៈតេឡេក្រាម ប៉ុន្តែគាត់ប្រកែកមិនព្រមទទួលយកតម្លៃជួសជុលរថយន្ត ហើយប្រាប់ឱ្យលោកយករថយន្តព្រុសទៅជួសជុលនៅកន្លែងដែលលោក តាប៊ុយ រកឱ្យវិញ។
ម្ចាស់រថយន្តព្រុសបញ្ជាក់ទៀតថា៖ «ឱ្យខ្ញុំយកឡានទៅហ្គារ៉ាសជួសជុលផ្សេងម៉េចកើតបើខាងជាង គេទិញគ្រឿងបន្លាស់អស់ហើយហ្នឹង។ ម្យ៉ាងខ្ញុំទាក់ទងលោក តាប៊ុយ មិនបាន ព្រោះគាត់ឱ្យលេខទូរស័ព្ទអ្នកផ្សេងមកខ្ញុំ។ ពេលដែលខ្ញុំទាក់ទងបាន បែរជាគាត់មិនព្រមទទួលយកតម្លៃជួសជុលវិញ»។ ជុំវិញបញ្ហានេះ ភ្នំពេញ-ប៉ុស្តិ៍នៅថ្ងៃទី ២១ ខែធ្នូ បានទូរស័ព្ទទាក់ទងលោក VJ តាប៊ុយ ដើម្បីសុំការបកស្រាយរឿងនេះដែរតែទូរស័ព្ទគ្មានអ្នកទទួល។ ប៉ុន្តែបើតាមបណ្តាញទំនាក់ទំនងសង្គមហ្វេសប៊ុករបស់លោក VJ តាប៊ុយ បាននិយាយថា ម្ចាស់ឡានព្រុសបង្ហាញវិក្កយបត្រសរសេរដៃតម្លៃជួសជុលដល់ទៅ ២ ២៥០ ដុល្លារ។ លោកថា៖ «ខ្ញុំនិយាយឱ្យត្រង់ទៅខ្ញុំពិតជាខុស។ ឡានខ្ញុំ Range Rover ជួសជុលយ៉ាងច្រើនអស់ជាង ១ ពាន់ដុល្លារ ឯងអាព្រុសជួសជុលដល់ទៅ ២ ២៥០ ដុល្លារ»៕