.jpg)
បុគ្គលិកក្រុមហ៊ុនណាហ្គាវើលដ៍ប្រមូលផ្តុំតវ៉ា ស្នើសុំលក្ខខណ្ឌការងារមួយចំនួន កាលពីថ្ងៃទី ២១ ធ្នូ។ រូបថត YOUSOS APDOULRASHIM
ភ្នំពេញៈ ក្រសួងការងារ និងបណ្តុះបណ្តាលវិជ្ជាជីវៈ ប្រកាសប្តេជ្ញាសម្របសម្រួលដោះស្រាយវិវាទការងាររវាងក្រុមហ៊ុនណាហ្គាវើលដ៍ និងបុគ្គលិកជាង៣៦០នាក់ រៀងរាល់ថ្ងៃ រហូតករណីវិវាទនេះត្រូវបានដោះស្រាយបញ្ចប់ស្របតាមច្បាប់នានាជាធរមាន ខណៈកម្មករប្រមាណ ១ ០០០ នាក់នៅតែបន្តការប្រមូលផ្តុំតវ៉ា។
សេចក្ដីប្រកាសព័ត៌មានស្តីពីលទ្ធផលនៃកិច្ចប្រជុំព្រឹកថ្ងៃទី២២ ខែធ្នូ ដើម្បីដោះស្រាយវិវាទការងារនៅក្រុមហ៊ុន ណាហ្គាវើលដ៍ លីមីធីតរបស់ក្រសួងការងារ ឱ្យដឹងថា ស្របតាមស្មារតីកិច្ចប្រជុំនៅសាលារាជធានីភ្នំពេញ កាលពីថ្ងៃទី២១ ខែធ្នូ ឆ្នាំ២០២១ អង្គប្រជុំបានឯកភាពគ្នាថា នឹងបន្តដោះស្រាយករណីទាមទាររបស់កម្មករនិយោជិតនៃក្រុមហ៊ុនណាហ្គាវើលដ៍ចំនួន៣៦០នាក់ ដែលមិនទាន់ឯកភាពក្នុងការទទួលយកការទូទាត់ប្រាក់បំណាច់ផ្តាច់កិច្ចសន្យា ការងារទៅតាមករណីនីមួយៗ។
ក្នុងន័យនេះ ដើម្បីបន្តដោះស្រាយករណីវិវាទនេះស្របតាមច្បាប់ និងនីតិវិធីជាធរមាន ក្រសួងការងារ និងបណ្តុះបណ្តាលវិជ្ជាជីវៈបានចេញលិខិតអញ្ជើញកម្មករនិយោជិតទាំង៣៦០នាក់ និងអ្នកតំណាងរបស់ខ្លួន មកធ្វើការដោះស្រាយ ចាប់ពីម៉ោង៩:០០នាទីព្រឹក ថ្ងៃទី២២ ខែធ្នូ ឆ្នាំ២០២១ តទៅនៅទីស្តីការក្រសួង។
ជាមួយគ្នានេះ ក្រសួងការងារ បានឱ្យដឹងថា គិតត្រឹមម៉ោង១រសៀលថ្ងៃទី២២ ធ្នូ មានកម្មករនិយោជិតម្នាក់បានមកចូលរួម និងបានជម្រាបក្រសួងថា ខ្លួនឯកភាពទទួលយកដំណោះស្រាយពីក្រុមហ៊ុន និងត្រៀមខ្លួនជូនដំណឹងទៅក្រុមហ៊ុននៅថ្ងៃស្អែក(ថ្ងៃទី២៣)។
បន្ថែមពីនេះក្រសួង ក៏បានប្តេជ្ញាបន្តការពារឱ្យបាននូវអ្វីដែលជាផលប្រយោជន៍ស្របច្បាប់របស់បងប្អូនកម្មករនិយោជិត ព្រមទាំងបន្តខិតខំសម្របសម្រួលដោះស្រាយវិវាទការងារនេះជូនបងប្អូនជារៀងរាល់ថ្ងៃ ចាប់ពីម៉ោង ៩:០០ព្រឹក តទៅ ស្របតាមតួនាទីភារកិច្ចរបស់ខ្លួន រហូតករណីវិវាទនេះត្រូវបានដោះស្រាយបញ្ចប់ស្របតាមច្បាប់នានា ជាធរមាន។
ក្រសួងបញ្ជាក់ថា៖«បងប្អូនកម្មករនិយោជិត ដែលនៅមានបញ្ហា នឹងចូលរួមដោះស្រាយបញ្ចប់ករណី វិវាទរបស់ខ្លួនតាមករណីនីមួយៗជាបន្តទៀត។ សូមបងប្អូនគោរពនូវសិទ្ធិស្វ័យសម្រេចរបស់បុគ្គលនីមួយៗ»។
ក្រសួងបន្តថា៖«ហើយក្រសួងក៏សូមជម្រាបជូនដល់បងប្អូនកម្មករនិយោជិតឱ្យបានជ្រាបថា បើទោះបីជាបងប្អូនធ្លាប់បានប្រគល់សិទ្ធិដល់បុគ្គលណាមួយធ្វើជាតំណាងរបស់ខ្លួនក៏ដោយ ក៏បងប្អូននៅតែមានសិទ្ធិស្វ័យសម្រេចលើករណីរបស់ខ្លួនដដែល។ មិនមានបុគ្គលណាមួយអាចដកសិទ្ធិស្វ័យសម្រេចរបស់បងប្អូនបានឡើយ»។
កាលពីថ្ងៃទី២១ ធ្នូ សាលារាជធានីភ្នំពេញ កោះហៅភាគីពាក់ព័ន្ធ ឱ្យចូលរួមកិច្ចប្រជុំរកដំណោះស្រាយ បន្ទាប់ពីកម្មករជាង១ ០០០នាក់ បានប្រមូលផ្តុំគ្នាតវ៉ា ទាមទារលក្ខខណ្ឌចំនួន ៩ តាំងពីថ្ងៃទី១៨ ធ្នូមក។ ក្រោយជួបពិភាក្សា សាលារាជធានីភ្នំពេញ ក៏បានសម្រេចឱ្យតំណាងសហជីពទ្រទ្រង់សិទ្ធិការងារបុគ្គលិកកម្មករខ្មែរ និងតំណាងក្រុមហ៊ុនណាហ្គាវើលដ៍ បន្តជួបប្រជុំរកដំណោះស្រាយ និងរៀបចំឯកសារ ដើម្បីឱ្យក្រសួងការងារ ធ្វើការសម្របសម្រួលបន្ត។
សេចក្តីប្រកាសរបស់សារាជធានី បានឱ្យដឹងថា អង្គប្រជុំ ក៏បានស្នើក្រុមហ៊ុនណាហ្គាវើលដ៍ ក្រោយពីទទួលបានបញ្ជីឈ្មោះអ្នកដែលទទួលសំណងឈប់ពីការងារ និងអ្នកដែលស្នើសុំចូលបម្រើធ្វើការងារវិញ ត្រូវយកបញ្ហានេះទៅប្រជុំជាមួយក្រុមប្រឹក្សាភិបាល របស់ក្រុមហ៊ុន ដើម្បីពិនិត្យសម្រេចលើការស្នើសុំនេះ និងរាយការណ៍លទ្ធផលប្រជុំមកសាលា រាជធានីភ្នំពេញ និងក្រសួងការងារ និងបណ្តុះបណ្តាលវិជ្ជាជីវៈ ដើម្បីដោះស្រាយតាមនីតិវិធីបន្ត។
បើតាមសាលារាជធានីភ្នំពេញ សហជីពបានធ្វើបញ្ជីឈ្មោះកម្មករនិយោជិតទាំង ៣៦៥នាក់ ដែលក្នុងនោះមានចំនួន ៤៨នាក់ លើចំនួន៣០០នាក់យល់ព្រមទទួលយកប្រាក់សំណង ដើម្បីឈប់ពីការងារនៅពេលទូទាត់ត្រឹមត្រូវស្របតាមច្បាប់ស្តីពីការងារ។ សហជីពត្រូវទំនាក់ទំនងទៅអ្នកនៅសេសសល់ចំនួន៦៥នាក់ ដើម្បីបញ្ជាក់ពីជំហរថាព្រមទទួល ប្រាក់សំណងឈប់ពីការងារ ឬចង់បន្តចូលបម្រើការងារវិញ ហើយរៀបចំបញ្ជីឈ្មោះឱ្យបានច្បាស់លាស់។
សាលារាជធានីភ្នំពេញ ក៏បានអំពាវនាវដល់កម្មករ យោជិត ដែលមានវិវាទការងារ ឱ្យបន្តភាពអត់ធ្មត់ ដោយបញ្ឈប់ការសម្តែងមតិដោយខុសច្បាប់ ដើម្បីទុកពេលឱ្យក្រសួង ស្ថាប័នមានសមត្ថកិច្ចបន្តធ្វើការសម្របសម្រួលដោះស្រាយ រីវាទការងារនេះជួយភាគីទាំង២ដោយឈរលើស្មារតីយោគយល់ អធ្យាស្រ័យគ្នា។ សាលារាជធានី ក៏បានព្រមានថា ក្នុងករណីកម្មករនិយោជិត និងសហជីពនៅតែបន្តសកម្មភាពធ្វើបាតុកម្មដោយខុសច្បាប់នៅតាមទីតាំងសាធារណៈ ធ្វើឱ្យប៉ះពាល់ដល់សន្តិសុខ សុវត្ថិភាព សណ្តាប់ធ្នាប់ និងរបៀបរៀបរយសាធារណៈ ត្រូវទទួលខុសត្រូវចំពោះមុខច្បាប់។
ប៉ុន្តែអ្នកស្រីសុន ស្រីពេជ្យ តំណាងកម្មករបានប្រាប់ភ្នំពេញប៉ុស្តិ៍ ថា នៅថ្ងៃទី២២ ធ្នូ នេះ កម្មករទាំងអស់នៅតែប្រមូលផ្តុំគ្នាតវ៉ា បើទោះជាមានសេចក្តីសម្រេចនិងការកោះហៅចូលរួមកិច្ចប្រជុំរកដំណោះស្រាយជាបន្តបន្ទាប់ក៏ដោយ។ អ្នកស្រី អះអាងថា ការបន្តការប្រមូលផ្តុំនេះ ក៏ព្រោះតែកម្មករមិនទាន់មើលឃើញពីដំណោះស្រាយដែលកម្មករបានទាមទារ។ រីឯ ការចរចា គឺគ្រាន់តែធ្វើឡើងដើម្បីបញ្ឈប់សកម្មភាពនៃការតវ៉ារបស់ខ្លួនតែប៉ុណ្ណោះ។ អ្នកស្រីបញ្ជាក់ថា កម្មករនឹងបញ្ឈប់ការតវ៉ាភ្លាម បើផ្តល់ដំណោះស្រាយដែលអាចទទួលយកបាន។
អ្នកស្រីប្រាប់ថា៖«យើងនៅតែប្រមូលផ្តុំគ្នាតវ៉ាដដែល ព្រោះការចរចានេះ មិនទាន់មានដំណោះស្រាយអ្វីផង។ យើងស្នើសុំឱ្យក្រុមហ៊ុនទទួលយកពួកយើងចូលធ្វើការវិញ និងទាមទារលក្ខខណ្ខការងារមួយចំនួនផងដែរ។ ប៉ុន្តែមិនទាន់បានសូម្បីតែមួយចំណុច។ អ៊ីចឹង កម្មករនៅតែបន្តទាមទារដដែល»។
សូមជម្រាបថា កូដកម្មរបស់កម្មករក្រុមហ៊ុនកាស៊ីណូណាហ្គាវើលដ៍ ធ្វើឡើងបន្ទាប់ពីវិវាទការងារនៅក្នុងក្រុមហ៊ុនមួយនេះ បានកើតឡើងអស់រយៈពេល៨ខែមកហើយ ក្រោយពីក្រុមហ៊ុនបានប្រកាសបញ្ឈប់បុគ្គលិក ១ ៣២៩នាក់ ក្នុងចំណោមបុគ្គលិកសរុបជាង៨ ០០០នាក់ ដោយលើកហេតុផលថា ក្រុមហ៊ុនជួបវិបត្តិហិរញ្ញវត្ថុដោយសារតែវិបត្តិជំងឺកូវីដ១៩៕
វីដេអូ៖
