.jpg)
ជនជាប់ចោទក្រោយពេលសមត្ថកិច្ចចាប់ខ្លួនកាលពីថ្ងៃទី២០ ធ្នូ ។ រូបថត ប៉ូលិស
ឧត្តរមានជ័យៈ តុលាការខេត្តឧត្តរមានជ័យបានឃុំបុរសជាមេខ្យល់ម្នាក់នៅពន្ធនាគារខេត្តនៅថ្ងៃទី ២១ ធ្នូ បន្ទាប់ពីសមត្ថកិច្ចចាប់ខ្លួនតាមដីកាតុលាការ ពាក់ព័ន្ធនឹងករណីលួចនាំពលករឆ្លងដែនទៅប្រទេសថៃ ប្រព្រឹត្តកាលពីអំឡុងឆ្នាំ ២០២០។
លោក ឡុង គឹមសេង នាយការិយាល័យនគរបាលប្រឆាំងភេរវកម្ម និងឧក្រិដ្ឋកម្មឆ្លងដែននៃស្នងការដ្ឋាននគរបាលខេត្តឧត្តរមានជ័យបានឱ្យដឹងនៅថ្ងៃទី២២ ធ្នូថាជនត្រូវចោទឈ្មោះ ភោគ ណារិទ្ធ អាយុ ៥៤ ឆ្នាំ ត្រូវបានតុលាការឃុំខ្លួនហើយកាលពីថ្ងៃទី ២១ ធ្នូ ឆ្នាំ ២០២១។
លោកថ្លែងថា៖«លោកព្រះរាជអាជ្ញារង តេង សម៉ៃ ជាអ្នកចេញដីកាឱ្យចាប់ខ្លួន។ជនត្រូវចោទម្នាក់នេះបានប្រព្រឹត្តបទល្មើសយូរមកហើយ ហើយខ្លួនគាត់ផ្ទាល់ក៏មិនចាំពីចំនួនពលករដែលគាត់លួចនាំឆ្លងដែនទៅប្រទេស
ថៃដែរ»។
លោកបានបន្តថា ជនត្រូវចោទម្នាក់នេះរស់នៅភូមិអូរខ្លាឃ្មុំ សង្កាត់អូរស្មាច់ ក្រុងសំរោង ខេត្តឧត្តរមានជ័យហើយសមត្ថកិច្ចរបស់លោកចាប់ខ្លួននៅតាមផ្លូវក្នុងភូមិរបស់គាត់។ប៉ុន្តែក្នុងថ្ងៃដែលសមត្ថកិច្ចរបស់លោកចាប់ខ្លួននោះក៏មិនមែនជាពេលដែលកំពុងប្រព្រឹត្តបទល្មើសនាំពលករឆ្លងដែនដែរតែជាការចាប់តាមដីការបស់តុលាការ។
លោកបញ្ជាក់ថា ក្រោយចាប់ខ្លួន ជនសង្ស័យបាននិយាយប្រាប់សមត្ថកិច្ចលោកថា គាត់ធ្លាប់នាំពលករឆ្លងដែនចូលទៅប្រទេសថៃជាយូរមកហើយ គឺមុនមានមេរោគកូវីដ១៩ចូលមកប្រទេសកម្ពុជាទៅទៀត ហើយក៏មិនដែលមានសមត្ថកិច្ចណាចាប់គាត់បានឡើយ។គាត់ក៏មិនចាំថាពលករដែលគាត់ធ្លាប់នាំឆ្លងដែនទៅប្រទេសថៃនោះមានចំនួនប៉ុន្មាននាក់ដែរ ព្រោះច្រើនដងពេកគាត់ចាំមិនអស់ទេ។ជនត្រូវចោទក៏ត្រូវបានចៅក្រមស៊ើបសួរឃុំខ្លួនក្នុងពន្ធនាគារខេត្តឧត្តរមានជ័យដើម្បីស្រាវជ្រាវបន្តទៀត៕
