.jpg)
ក្រុមជនសង្ស័យពីបទប្លន់ឧកញ៉ា អ៊ាន សៀវម៉ី ត្រូវបានបង្ក្រាបកាលពីថ្ងៃទី ២០ ធ្នូ នៅខណ្ឌមានជ័យ រាជធានីភ្នំពេញ។ រូបថត ប៉ូលិស
ភ្នំពេញៈ សមត្ថកិច្ចនគរបាលជំនាញនៅថ្ងៃទី ២២ ធ្នូ បានតម្រូវឱ្យជនសង្ស័យប្រុស-ស្រី ២ នាក់ ដែលជាប់ពាក់ព័ន្ធក្នុងបទល្មើសប្លន់ប្រដាប់អាវុធ ក្នុងផ្ទះឧកញ៉ា អ៊ាន សៀវម៉ី កាលពីថ្ងៃទី ១៩ ខែធ្នូ នាំសមត្ថកិច្ចទៅបង្ហាញទីតាំងប្រមូលទិញគ្រឿងអលង្ការពីពួកគេក្នុងផ្សារកណ្ដាល និងផ្សារចាស់។ នេះបើតាមមន្ត្រីនាំពាក្យស្នងការដ្ឋាននគរបាលរាជធានីភ្នំពេញ។
លោក សាន សុខសីហា អ្នកនាំពាក្យស្នងការដ្ឋាននគរបាលរាជធានីភ្នំពេញបានប្រាប់ភ្នំពេញប៉ុស្តិ៍ថា ជនសង្ស័យប្រុស-ស្រី ២ នាក់ដែលកម្លាំងសមត្ថកិច្ចនគរបាលព្រហ្មទណ្ឌចាប់ឃាត់ខ្លួន កាលពីម៉ោងជាង ១០ យប់ ថ្ងៃទី ២០ ធ្នូ និងម៉ោង ៣ ទៀបភ្លឺចូលថ្ងៃទី ២១ ធ្នូ ឆ្នាំ ២០២១ បានសារភាពថា ក្រោយពីបានចូលរួមក្នុងសកម្មភាពប្លន់ប្រដាប់អាវុធ នៅផ្ទះឧកញ៉ា អ៊ាន សៀវម៉ី រួចហើយនោះ ១ ថ្ងៃក្រោយមក ពួកគេត្រូវបានបញ្ជាឱ្យនាំយកគ្រឿងអលង្ការទៅលក់នៅផ្សារចាស់ និងផ្សារកណ្ដាល ដើម្បីយកលុយមកចែកគ្នា។
លោកបញ្ជាក់ថា៖ «ឥឡូវនេះ គ្រឿងអលង្ការទាំងនោះត្រូវបានកម្លាំងសមត្ថកិច្ចយើងប្រមូលបានត្រឡប់មកវិញអស់ហើយ ក្រោយពីពួកគេបានសហការនាំសមត្ថកិច្ចយើងទៅចង្អុលបង្ហាញទីតាំង ដែលបានប្រមូលទិញគ្រឿងអលង្ការពីពួកគេកាលពីព្រឹកមិញនេះ [ព្រឹកថ្ងៃ ២២ ធ្នូ ២០២១]»។
ទោះយ៉ាងណា លោក សុខសីហា មិនបានប្រាប់ឱ្យដឹងអំពីអត្តសញ្ញាណជនសង្ស័យប្រុស-ស្រីទាំង ២ និងម្ចាស់ទីតាំងលក់គ្រឿងអលង្ការ ដែលបានប្រមូលទិញគ្រឿងអលង្ការពីក្រុមជនសង្ស័យទាំង ២ នាក់នោះឡើយ។
លោកអះអាងថា នៅពេលនេះសមត្ថកិច្ចកំពុងបន្តនីតិវិធីស៊ើបអង្កេតនៅឡើយ ហើយថា ជនសង្ស័យទាំង ២ កំពុងស្ថិតក្នុងការឃុំខ្លួននៅក្នុងបន្ទប់មួយ នៅនាយកដ្ឋានព្រហ្មទណ្ឌនៃក្រសួងមហាផ្ទៃ។ ដោយឡែកក្រុមជនសង្ស័យ ១២ នាក់ រួមបញ្ចូលទាំងមេគណបក្សខ្មែរក្រោក ដែលគេស្គាល់ជាទូទៅថា William Guang និងដែលកម្លាំងកងរាជអាវុធហត្ថអះអាងថា ជាមេខ្លោងធំរៀបចំផែនការ និងដឹកនាំសកម្មភាពប្លន់ដោយផ្ទាល់នោះ នៅពេលនេះគេនៅមិនទាន់ដឹងថា តើសមត្ថកិច្ចកងរាជអាវុធហត្ថមានចំណាត់ការនីតិវិធី បែបណានោះទេ។
អ្នកនាំពាក្យកងរាជអាវុធហត្ថលើផ្ទៃប្រទេស លោក អេង ហ៊ី ប្រាប់ ភ្នំពេញ ប៉ុស្តិ៍ នៅល្ងាចថ្ងៃទី ២២ ខែធ្នូ ក្នុងភាពស្រពេចស្រពិលថា លោកមិនដឹងថា ពួកគេ [ក្រុមជនសង្ស័យ] ត្រូវបានបញ្ជូនឡើងទៅតុលាការ ឬនៅនោះទេ នៅពេលនេះ ខណៈលោក រ័ត្ន ស្រ៊ាង មេបញ្ជាការកងរាជអាវុធហត្ថរាជធានី-ភ្នំពេញបានបដិសេធក្នុងការផ្ដល់អត្ថាធិប្បាយ៕
វីដេអូ៖
