បន្ទាយមានជ័យៈ តុលាការខេត្តបន្ទាយមានជ័យនៅរសៀលថ្ងៃទី ២២ ធ្នូ បានសម្រេចឃុំខ្លួន មេឃុំម្នាក់ក្នុងស្រុកព្រះនេត្រព្រះ និងអ្នកកាសែតម្នាក់នៃអង្គភាពសារព័ត៌មាននិស្សិតខ្មែរ ដោយចោទប្រកាន់ពីបទកាប់រានទន្ទ្រានកាន់កាប់ និងលក់ដីរដ្ឋនៅក្នុងតំបន់ព្រៃលិចទឹកក្នុងបឹងទន្លេសាបដោយខុសច្បាប់។
លោក សំរិទ្ធ សុខុន អ្នកនាំពាក្យអយ្យការអមសាលាដំបូងខេត្តបន្ទាយមានជ័យ ប្រាប់ភ្នំពេញ-ប៉ុស្តិ៍នៅរសៀលថ្ងៃទី ២២ ធ្នូថា លោក អែម ណុយ អាយុ ៦០ ឆ្នាំ មានតួនាទីជាមេឃុំភ្នំលៀបត្រូវបានកម្លាំងសមត្ថកិច្ចចម្រុះខេត្តបន្ទាយមានជ័យ ចាប់ឃាត់ខ្លួននៅថ្ងៃទី ១៨ ធ្នូបន្ទាប់ពីគណៈកម្មការជំនាញនៃរដ្ឋបាលខេត្តបានធ្វើការស្រាវជ្រាវ និងរកឃើញថា គាត់មានជាប់ពាក់ព័ន្ធករណីទន្ទ្រានកាន់កាប់ដីព្រៃលិចទឹក ក្នុងតំបន់ ៣ នៃបឹងទន្លេសាបដោយខុសច្បាប់ក្នុងទំហំសរុប ១១០ ហិកតា។ នៅក្នុងឆ្នាំ ២០១៨ និង ឆ្នាំ ២០១៩ គាត់បានលក់ដីនោះទៅឱ្យប្រជាពលរដ្ឋចំនួន ៦ គ្រួសារក្នុងតម្លៃសរុប ៣៩ ៧០០ ដុល្លារ និង ១១ ម៉ឺនបាត។
ចំណែកលោក ឈួម ធូ អាយុ ៥៧ ឆ្នាំ មានតួនាទីជាអ្នកយកព័ត៌មានឱ្យកាសែតនិស្សិតខ្មែរ មានលំនៅក្នុងភូមិពាមកំពង់ក្រសាំង ឃុំភ្នំលៀប ស្រុកព្រះនេត្រព្រះ ក៏ត្រូវបានកម្លាំងសមត្ថកិច្ចចម្រុះឃាត់ខ្លួននៅថ្ងៃទី ១៨ ខែធ្នូ ឆ្នាំ ២០២១ ផងដែរ ក្រោយស្រាវជ្រាវរកឃើញថា គាត់ពាក់ព័ន្ធករណីឈូសឆាយកាប់ឆ្ការគាស់រាន និងកាន់កាប់ដីព្រៃលិចទឹកក្នុងតំបន់ ៣ ខុសច្បាប់នៅចំណុចអាងលីសំអាន និងនៅភូមិក្របៅ ឃុំភ្នំលៀប ស្រុកព្រះនេត្រព្រះ សរុប ២០០ ហិកតា ក្នុងឆ្នាំ ២០១៨ និង ២០១៩។
លោក សុខុន បានបញ្ជាក់ថា៖ «ជនសង្ស័យទាំង ២ ត្រូវបានចៅក្រមស៊ើបសួរនៃសាលាដំបូងខេត្តបន្ទាយមានជ័យសម្រេចឱ្យនាំយកទៅឃុំខ្លួនជាបណ្ដោះអាសន្ននៅពន្ធនាគារខេត្តបន្ទាយមានជ័យដោយចោទប្រកាន់ពីបទកាប់រានទន្ទ្រានកាន់កាប់ និងលក់ដូរដីព្រៃលិចទឹករបស់រដ្ឋដោយខុសច្បាប់តាមមាត្រា ៩៨ នៃច្បាប់ស្ដីពីជលផល»។
លោក ងោ ម៉េងជ្រួន អភិបាលរងខេត្តបន្ទាយមានជ័យបានប្រាប់ភ្នំពេញប៉ុស្តិ៍ថា ក្រុមការងារថ្នាក់ខេត្ត នៅតែបន្តសហការចូលរួមជាមួយក្រុមគណៈកម្មការថ្នាក់ជាតិនៅក្នុងការស្រាវជ្រាវ និងបង្ក្រាបចាប់រឹបអូសមកវិញនូវដីព្រៃលិចទឹក។
លោកបញ្ជាក់ថា៖ «សមត្ថកិច្ចយើងនឹងមិនលើកលែងឡើយ យើងនឹងឃាត់ខ្លួនបញ្ជូនទៅតុលាការក្នុងករណីរកឃើញថា ជនណាម្នាក់មានជាប់ពាក់ព័ន្ធទៅនឹងបទល្មើសកាប់រានទន្ទ្រានឈូសឆាយដីព្រៃលិចទឹករបស់រដ្ឋ យកមកធ្វើជាកម្មសិទ្ធិឯកជនរបស់ខ្លួន ឬលក់ដូរដោយខុសច្បាប់»។
ដោយឡែករដ្ឋបាលខេត្តត្បូងឃ្មុំកាលពីថ្ងៃទី ២១ ខែធ្នូ ឆ្នាំ ២០២១ បានចេញសេចក្ដីណែនាំដល់មន្ទីរអង្គភាព និង រដ្ឋបាលក្រុង-ស្រុកក្រោមឱវាទឱ្យពង្រឹងយន្តការតាមដាន ត្រួតពិនិត្យ លើកិច្ចការសណ្ដាប់ធ្នាប់ របៀបរៀបរយសាធារណៈ ដូចជាការត្រួតពិនិត្យការសាងសង់អគារ សំណង់លំនៅឋាន ការដឹកជញ្ជូន ការចាក់បំពេញអាចម៍ដី ការពុះដីឡូត៍ ការគ្រប់គ្រងទប់ស្កាត់ បង្ក្រាបការទន្ទ្រានដីព្រៃលិចទឹក និងព្រៃក្នុងតំបន់អភិរក្សនានា ក្នុងភូមិសាស្ត្រខេត្តត្បូងឃ្មុំ។
ក្នុងសេចក្ដីណែនាំនោះ លោក ជាម ច័ន្ទសោភ័ណ អភិបាលខេត្តត្បូងឃ្មុំបានគូសបញ្ជាក់ថា ដើម្បីពង្រឹងយន្តការលើកកម្ពស់ប្រសិទ្ធភាព និងបង្កើនការទទួលខុសត្រូវលើកិច្ចការងារមួយចំនួនបន្ថែមទៀត ឱ្យស្របតាមច្បាប់អនុក្រឹត្យ និងលិខិតបទដ្ឋានគតិយុត្តពេញលេញ រដ្ឋបាលខេត្តសូមធ្វើការណែនាំក្រើនរំឭក ដល់មន្ទីរ អង្គភាព និងរដ្ឋបាលក្រុង-ស្រុក ត្រូវចាត់វិធានការចាំបាច់នានា ទៅតាមមុខជំនាញ និងតួនាទីភារកិច្ចរបស់ខ្លួនឱ្យបានម៉ឺងម៉ាត់បំផុត ទាំងការងារផ្ដល់សេវាសាធារណៈ និងការងារស្រាវជ្រាវ បង្ក្រាបបទល្មើសគ្រប់ប្រភេទ ក្នុងនោះរួមទាំងបទល្មើសកាប់ទន្ទ្រានដីព្រៃលិចទឹក និងព្រៃក្នុងតំបន់អភិរក្សនានា៕