ភ្នំពេញៈ គណៈកម្មការអន្តរក្រសួង អនុម័តរបាយការណ៍វឌ្ឍនភាពឆ្នាំ ២០២០ នៃគោលនយោបាយជាតិស្ដីពីមុខរបរ និងការងារ នៅក្នុងកិច្ចប្រជុំលើកទី ៦ ខណៈរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោក អ៊ិត សំហេង បានបញ្ជាក់ថា រាជរដ្ឋាភិបាលក៏ដូចជាក្រសួង ស្ថាប័នពាក់ព័ន្ធបានសម្រេចនូវសមិទ្ធផលជាច្រើន បើទោះបីជាស្ថិតនៅក្នុងបរិបទកូវីដ ១៩ ក្តី។
នៅថ្ងៃទី ២២ ធ្នូ គណៈកម្មការអន្តរក្រសួង សម្រាប់ដឹកនាំត្រួតពិនិត្យ និងវាយតម្លៃលើការអនុវត្ត គោលនយោបាយជាតិស្ដីពីមុខរបរ និងការងារឆ្នាំ ២០១៥-២០២៥ បានបើកកិច្ចប្រជុំលើកទី ៦ របស់ខ្លួន តាមប្រព័ន្ធវីដេអូ (Zoom) ដោយមានការចូលរួមពីតំណាងក្រសួង ស្ថាប័ន មន្ត្រីរាជធានី-ខេត្ត ព្រមទាំងតំណាងអង្គការអន្តរជាតិខាងការងារ (ILO)។ កិច្ចប្រជុំនេះ គឺមានគោលបំណងពិនិត្យ និងវាយតម្លៃពីវឌ្ឍនភាពនៃការអនុវត្តគោលនយោបាយជាតិស្តីពីមុខរបរ និងការងារឆ្នាំ ២០១៥-២០២៥ និងបញ្ហាប្រឈមនៅក្នុងបរិបទជំងឺកូវីដ ១៩។ នេះបើតាមការចុះផ្សាយរបស់ក្រសួងការងារ។
ក្នុងឱកាសនោះ លោក អ៊ិត សំហេង ដែលក៏ជាប្រធានគណៈកម្មការអន្តរក្រសួងសម្រាប់ដឹកនាំត្រួតពិនិត្យ និងវាយតម្លៃលើការអនុវត្តគោលនយោបាយនេះបានលើកឡើងថា ទោះបីជាកម្ពុជាបានរងការគំរាមកំហែងយ៉ាងធ្ងន់ធ្ងរពីវិបត្តិនៃជំងឺកូវីដដែលប៉ះពាល់ដល់សេដ្ឋកិច្ច និងសង្គម និងជាឧបសគ្គរារាំងក្នុងការអនុវត្តសកម្មភាពលើគ្រប់វិស័យក៏ដោយ ក៏ក្រសួង ស្ថាប័នពាក់ព័ន្ធនៅតែខិតខំបំពេញតួនាទីរបស់ខ្លួនប្រកបដោយស្មារតីទទួលខុសត្រូវ ដើម្បីសម្រេចបាននូវគោលបំណងជាសសរស្តម្ភទាំង ៣ នៃគោលនយោបាយ។
សសរស្តម្ភទាំង ៣ នៃគោលនយោបាយនោះ រួមមានការបង្កើនឱកាសការងារសមរម្យ និងមានផលិតភាពការងារខ្ពស់ ការលើកកម្ពស់ការអភិវឌ្ឍជំនាញ និងធនធានមនុស្ស និងការពង្រឹងអភិបាលកិច្ចទីផ្សារការងារដែលជាក់ស្ដែង នៅក្នុងកិច្ចប្រជុំលើកទី ៦ នេះ គណៈកម្មការអន្តរក្រសួងបានពិនិត្យ និងអនុម័តរបាយការណ៍ឆ្នាំ ២០២០ សម្រាប់ការអនុវត្តគោលនយោបាយជាតិស្តីពីមុខរបរ និងការងារឆ្នាំ ២០១៥-២០២៥ ផងដែរ។
លោកបញ្ជាក់ថា៖ «ជាការកត់សម្គាល់ រាជរដ្ឋាភិបាល ក៏ដូចជាក្រសួង ស្ថាប័នពាក់ព័ន្ធ បានសម្រេចនូវសមិទ្ធផលជាច្រើន ជាពិសេសក្នុងការបង្ការទប់ស្កាត់ការរីករាលដាលជំងឺកូវីដ ១៩ ក្រោមការដឹកនាំប្រកបដោយគតិបណ្ឌិត និងភាពឈ្លាសវៃរបស់សម្តេចនាយករដ្ឋមន្ត្រី ហ៊ុន សែន ដែលបានឆ្លើយតបនឹងវិបត្តិនេះដោយភាពស្វាហាប់ និងយុទ្ធសាស្ត្រគ្រប់ជ្រុងជ្រោយ ប្រកបដោយស្មារតីបុរេសកម្ម សំដៅកាត់បន្ថយផលប៉ះពាល់ និងគាំទ្រដល់សកម្មភាពសង្គម-សេដ្ឋកិច្ច ដោយរក្សាបាននូវការងារលំនឹងជីវភាពប្រជាជន និងធុរកិច្ច»។
តាមការផ្សព្វផ្សាយរបស់ក្រសួងការងារកាលពីថ្ងៃទី ២២ ធ្នូ បានឱ្យដឹងថា វឌ្ឍនភាពសំខាន់ៗនៃការអនុវត្តគោលនយោបាយក្នុងឆ្នាំ ២០២០ ដែលរាជរដ្ឋាភិបាល ក៏ដូចជាក្រសួង ស្ថាប័នខិតខំសម្រេចបានរួមមានការរក្សាបាននូវស្ថិរភាពម៉ាក្រូសេដ្ឋកិច្ច ការអនុម័តគម្រោងវិនិយោគ មានលក្ខណសម្បត្តិគ្រប់គ្រាន់ថ្មីចំនួន ១៩៥ គម្រោង និងគម្រោងពង្រីកផលិតកម្មចំនួន ៤៣ គម្រោង ដែលអាចបង្កើតការងារបានប្រមាណ ១៥១ ០០០ កន្លែង។
ក្រៅពីនេះរាជរដ្ឋាភិបាលក៏បានរៀបចំផែនការ និងយុទ្ធសាស្ត្រស្តីពីការទាក់ទាញវិនិយោគចំគោលដៅ ដោយបានដាក់ចេញនូវគោលនយោបាយលើកទឹកចិត្តពន្ធ និងអនុគ្រោះពន្ធ ដើម្បីជួយសម្រួលដល់វិស័យអាទិភាពដែលរងគ្រោះដោយសារការរីករាលដាលនៃជំងឺកូវីដ ១៩ និងការធ្វើកំណែទម្រង់ទំនើបកម្មពីការចុះបញ្ជីអាជីវកម្ម ការទូទាត់សេវាសាធារណៈ ព្រមទាំងការទទួលវិញ្ញាបនបត្រចុះបញ្ជី តាមប្រព័ន្ធស្វ័យប្រវត្តិកម្មទាំងស្រុងតាមរយៈថ្នាលបច្ចេកវិទ្យាព័ត៌មាន (CamDx) ផងដែរ។
លោក មឿន តុលា នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស បានបង្ហាញនូវការមើលឃើញរបស់លោកថា ក្នុងឆ្នាំ ២០២០ និង ២០២១ នេះ បញ្ហាជំងឺកូវីដ ១៩ បានធ្វើឱ្យប៉ះពាល់យ៉ាងខ្លាំងដល់ប្រទេសដែលកំពុងអភិវឌ្ឍន៍ និងក្រីក្រដូចជាកម្ពុជា។ លោកបានរៀបរាប់ថា៖ «ស្ថានភាពមុខរបរ និងការងារអីផ្សេងៗ ខ្ញុំមើលឃើញថា យើងលំបាក ព្រោះបើថា ឱ្យយើងលើកស្ទួយមុខរបរសមរម្យអីហ្នឹង ខ្ញុំមើលមិនឃើញទេ ដោយសារតែយើងជួបវិបត្តិនេះ។ យើងប្រឹងទប់ធ្វើយ៉ាងម៉េច កុំឱ្យប្រជាពលរដ្ឋយើងធ្លាក់ខ្លួនជាប់ផុងនឹងវិបត្តិសុខភាពសាធារណៈនេះ។ រឿងមួយដែលខ្ញុំមើលឃើញ និងទទួលបាន គឺកម្ពុជាយើងជាប្រទេសមួយ ក្នុងចំណោមប្រទេសក្នុងតំបន់ឈានមុខគេក្នុងការជំរុញឱ្យពលរដ្ឋទទួលបានវ៉ាក់សាំង»។ ជាមួយនឹងការលើកឡើងដូច្នេះ លោក មឿន តុលា និយាយថា ដើម្បីឱ្យកម្ពុជាធ្វើការផ្លាស់ប្តូរ និងលើកស្ទួយរចនាសម្ព័នឧស្សាកម្ម ពីឧស្សាហកម្មអតិពលកម្ម ទៅជាឧស្សាហកម្មពលកម្មផ្អែកលើជំនាញនៅឆ្នាំ ២០២៥ រដ្ឋាភិបាលត្រូវតែផ្តោតទៅលើវិស័យនេះ និងដាក់ចេញនូវគោលនយោបាយសំខាន់ឱ្យបានត្រឹមត្រូវ ពាក់ព័ន្ធនឹងការពង្រីងវិស័យកសិកម្ម ពង្រីកទីផ្សារកែច្នៃ ដើម្បីបង្កើតកម្លាំងពលកម្មក្នុងស្រុក និងរៀបចំផែនការឱ្យបានច្បាស់លាស់ក្នុងការទទួលយកពលករចំណាកស្រុកដែលត្រឡប់មកពីក្រៅប្រទេសវិញ។
បើតាមរបាយការណ៍វឌ្ឍនភាពឆ្នាំ ២០២០ នៃគោលនយោបាយជាតិស្ដីពីមុខរបរ និងការងារ បានឱ្យដឹងថា ក្នុងឆ្នាំ ២០២០ កម្ពុជាបានបណ្តុះបណ្តាលបច្ចេកទេស និងវិជ្ជាជីវៈដល់សិស្ស និស្សិតក្នុងប្រព័ន្ធសរុបចំនួន ១៨ ៤៩៤ នាក់ (ស្រី ៦ ៧០៨ នាក់) និងក្រៅប្រព័ន្ធចំនួន ១៩ ៧២៧ នាក់ (ស្រី ៩ ៣២០ នាក់) និងអនុវត្តកម្មវិធីបណ្តុះបណ្តាលស្ពានចម្លងបន្តជំនាញដែលមានសិស្សសរុបចំនួន ៣ ៤០០ នាក់ (ស្រី ១ ៥៥០ នាក់) ខណៈបានប្រមូល និងផ្សព្វផ្សាយព័ត៌មានស្តីពីការជ្រើសរើសកម្លាំងពលកម្មពីគ្រប់ប្រភពចំនួន ១៨៤ ៨០៨ កន្លែង។ របាយការណ៍ដដែលបន្តថា ក្រៅពីនោះ រដ្ឋាភិបាលក៏បានរៀបចំរបាយការណ៍ស្តីពីបច្ចុប្បន្នភាពទីផ្សារការងារបានផ្តល់សេវាប្រឹក្សាយោបល់អំពីអាជីពការងារ និងវិជ្ជាជីវៈដល់អ្នកស្វែងរកការងារចំនួន ៦ ២៣៨ នាក់ បានចុះឈ្មោះអ្នកស្វែងរកការងារធ្វើចំនួន ១៧ ២០២ នាក់ និងអ្នកស្វែងរកការងារធ្វើបានទទួលការងារធ្វើចំនួន ៤៧៥៣ នាក់ រួមជាមួយនឹងការធ្វើកំណែទម្រង់ប្រព័ន្ធអធិការកិច្ចការងារ ព្រមទាំងបានរៀបចំប្រព័ន្ធគ្រប់គ្រងទិន្នន័យរួមពាក់ព័ន្ធនឹងវិស័យការងារជាដើម។
ជាមួយនឹងសមិទ្ធផលទាំងនេះ លោក អ៊ិត សំហេង នៅតែអំពាវនាវដល់ថ្នាក់ដឹកនាំក្រសួង ស្ថាប័នរដ្ឋបាលរាជធានី-ខេត្ត វិស័យឯកជន និងអង្គភាពពាក់ព័ន្ធត្រូវបង្កើនការយកចិត្តទុកដាក់បន្ថែមទៀត ក្នុងការចូលរួមអនុវត្តគោលនយោបាយនេះ ដើម្បីធ្វើការផ្លាស់ប្តូរ និងលើកស្ទួយរចនាសម្ព័ន្ធឧស្សាហកម្មពីឧស្សាហកម្មអតិពលកម្មទៅជាឧស្សាហកម្មពលកម្មផ្អែកលើជំនាញនៅឆ្នាំ ២០២៥៕