ភ្នំពេញៈ មន្ដ្រីចំណុះក្រសួងបរិស្ថានចំនួន ១២២ រូប ទទួលបានការបណ្ដុះបណ្ដាលជំនាញបច្ចេកទេសវិស័យបរិស្ថានរយៈពេល ១១ ថ្ងៃ ចាប់ពីថ្ងៃទី ២១ ដល់ថ្ងៃទី ៣១ ធ្នូ។
លោក នេត្រ ភក្ត្រា រដ្ឋលេខាធិការក្រសួងបរិស្ថានថ្លែងក្នុងពិធីបើកវគ្គបណ្ដុះបណ្ដាលនេះកាលពីថ្ងៃទី ២១ ធ្នូថា វគ្គបណ្តុះបណ្តាលនឹងក្លាយជាចលករក្នុងការកសាង និងអភិវឌ្ឍសមត្ថភាពមន្ត្រីរាជការវ័យក្មេងជាថ្នាលបណ្ដុះនូវធនធានមនុស្ស សម្រាប់អ្នកបន្តវេនក្នុងកិច្ចអភិវឌ្ឍន៍ និងវឌ្ឍនភាពសង្គមនៃប្រទេសជាតិ។ តាមរយៈវគ្គបណ្ដុះបណ្ដាលនេះក៏ជាមូលដ្ឋានគ្រឹះសម្រាប់សិក្ខាកាមឱ្យបានយល់ដឹងអំពីគោលនយោបាយ ផែនការយុទ្ធសាស្ត្រ រចនាសម្ព័ន្ធ និងការងារស្នូលរបស់ក្រសួងមន្ទីរឱ្យកាន់តែច្បាស់ និងស៊ីជម្រៅរួមនឹងចំណេះដឹងពាក់ព័ន្ធនឹងការអនុវត្តជាក់ស្តែង ពិសេសការកំណត់បញ្ហា និងដំណោះស្រាយ ផ្អែកទៅតាមបទដ្ឋានគតិយុត្ត។
លោកបានថ្លែងថា៖ «វគ្គបណ្តុះបណ្តាលរៀបចំឡើងដោយក្រសួងបរិស្ថាននេះ ត្រូវបានចាត់ទុកជាធាតុចូលយ៉ាងសំខាន់ក្នុងការធ្វើទំនើបកម្មស្ថាប័នរបស់ក្រសួង ដើម្បីប្រែក្លាយជារដ្ឋបាលទំនើប សំដៅឈានទៅសម្រេចគោលបំណងគោលនយោបាយនៃកិច្ចគាំពារបរិស្ថាន ការអភិរក្ស ជីវចម្រុះ និងការគ្រប់គ្រងធនធានធម្មជាតិឱ្យមាននិរន្តរភាព ក៏ដូចជា ចូលរួមអនុវត្តកម្មវិធីកំណែទម្រង់របស់រាជរដ្ឋាភិបាល»។
លោក ភក្ត្រា ថ្លែងថា វគ្គបណ្ដុះបណ្ដាលនេះ ត្រូវរៀបចំជារៀងរាល់ឆ្នាំ ហើយសិក្ខាកាមទាំងអស់ត្រូវយកចិត្តទុកដាក់ទទួលយកនូវចំណេះដឹង ជំនាញមូលដ្ឋានដែលទទួលបានពីវគ្គបណ្ដុះបណ្ដាលនេះទាំងគុណភាព និងបរិមាណ ដើម្បីបន្តឈានទៅពង្រឹងសមត្ថភាពខ្លួនឯងឱ្យគ្រប់គ្រាន់ សម្រាប់ឆ្លើយតបនូវតម្រូវការរបស់ប្រជាជនធ្វើយ៉ាងណា ដើម្បីធានាឱ្យបាននូវប្រសិទ្ធភាព និងស័ក្តិសិទ្ធិភាពនៃសេវាសាធារណៈ សំដៅបម្រើប្រជាជនឱ្យកាន់តែប្រសើរឡើង។
លោកបញ្ជាក់ថា៖ «ក្នុងនាមជាមន្ត្រីរាជការមួយរូប...ត្រូវបំពេញកាតព្វកិច្ចដោយមានការទទួលខុសត្រូវខ្ពស់ដើម្បីរួមចំណែកជួយដល់អង្គភាព និងថ្នាក់ដឹកនាំសម្រេចបាននូវគោលបំណង គោលនយោបាយរបស់ក្រសួងបរិស្ថានឱ្យទទួលបានជោគជ័យ»។
លោក សុខ គាង អនុរដ្ឋលេខាធិការ បញ្ជាក់ថា វគ្គបណ្តុះបណ្តាលនេះនឹងចែកជា ៤ វគ្គ ទៅតាមជំនាញបច្ចេកទេសផ្សេងគ្នា។ គ្រូឧទ្ទេសជំនាញបច្ចេកទេសវិស័យបរិស្ថានទាំង ៤ វគ្គនេះ បានចែករំលែកចំណេះដឹង និងការអនុវត្តការងារជាក់ស្ដែងក៏ដូចជាពិសោធដែលមាន៕