.jpg)
មន្ត្រីក្រសួងអប់រំពេលវៀបចំវេចខ្ចប់វិញ្ញាសាសម្រាប់ប្រឡងបាក់ឌុប កាលពីថ្ងៃទី២៣ ធ្នូ ។ រូបថត ក្រសួងអប់រំ
ភ្នំពេញៈ លោក ហ៊ុន សែន នាយករដ្ឋមន្រ្ដី កម្ពុជាបានផ្ដាំផ្ញើដល់បេក្ខជនត្រៀមប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) នាថ្ងៃទី ២៧-២៨ ខែធ្នូខាងមុខនេះ ត្រូវខិតខំប្រឡង ខណៈការកែវិញ្ញាសាប្រឡងក្រសួងអប់រំនៅប្រកាន់យកនីតិវិធីនិងបទប្បញ្ញត្តិដដែលដោយធ្វើនៅមណ្ឌលកំណែចំនួន ១០ មណ្ឌល នៅក្នុងរាជធានីភ្នំពេញ។
លោក ហ៊ុន សែន បានថ្លែងក្នុងពេលធ្វើអធិបតីពិធីសម្ពោធដាក់ឱ្យប្រើប្រាស់អគាររដ្ឋបាលអគ្គនាយកដ្ឋានគយនិងរដ្ឋាករកម្ពុជា នៅថ្ងៃទី២៣ខែធ្នូឆ្នាំ២០២១ ថា ការបើកសេដ្ឋកិច្ច និងការបើកប្រទេសឡើងវិញ គឹមិនដើរថយក្រោយឡើយ។ ចំណែកការត្រៀមប្រឡងបាក់ឌុបនៅតែប្រឡងដដែល។ លោកបានឱ្យដឹងថា ប្រហែលជាមានសាស្រ្ដាចារ្យម្នាក់បានផ្ញើសារចូលមកលោកដើម្បីសំណូមពរឱ្យកែកំណែវិញ្ញាសាប្រឡងបាក់ឌុបឆ្នាំនេះដោយធ្វើនៅតាមខេត្ដ។
លោកនាយករដ្ឋមន្រ្ដីបញ្ជាក់ថា៖ «ខ្ញុំបានឆ្លើយតបត្រឡប់ទៅវិញ សូមអនុវត្តទៅតាមការរៀបចំរបស់ក្រសួង (អប់រំ យុវជន និងកីឡា)»។
លោកនាយកដ្ឋមន្រ្ដីបានលើកឡើងថា បើឱ្យមានការកែវិញ្ញាសាប្រឡងបាក់ឌុបនៅតាមខេត្ដគឺអាចមានអ្នកដឹងនូវលេខកូដវិញ្ញាសាប្រឡងនិងអាចបង្កើតជាបញ្ហាលើការប្រឡងបាក់ឌុបនេះមិនខាន។
លោកបានបញ្ជាក់ថា៖ «ប៉ុន្ដែឱ្យតែមកដល់ភ្នំពេញអត់មានដឹងលេខកូដ មិនលេខកូដទេ លាយចម្រុះគ្នាទាំងអស់អត់មានដឹងលេខកូដមិនលេខកូដទេ។ នោះហើយដែលឯកឧត្ដម ហង់ជួន ណារ៉ុន បាននិយាយចេះបានជាប់។ អ៊ីចឹង ក្មួយៗដែលត្រៀមប្រឡងបាក់ឌុបនេះត្រូវខិតខំៗ»។
កាលពីពេលថ្មីៗនេះមានបុរសម្នាក់ដែលលោកនាយករដ្ឋមន្រ្ដីប៉ាន់ស្មានថាជាគ្រូបង្រៀនបានផ្ញើសារទៅលោកនាយករដ្ឋមន្រ្ដីតាមហ្វេសប៊ុកដោយស្នើសុំអនុញ្ញាតឱ្យគ្រូៗនៅតាមបណ្តាខេត្តជាអ្នកកែកិច្ចការប្រឡងរបស់បេក្ខជនប្រឡងបាក់ឌុបនៅតាមខេត្តតែម្ដង។
ក្នុងសាររបស់បុរស់ម្នាក់ឈ្មោះ Chum Mean ដែលសរសេរទៅកាន់លោកនាយករដ្ឋមន្រ្ដីបានស្នើថា៖«សូមគោរពសម្ដេចពុកជាទីគោរព! ដូចសម្ដេចពុកជ្រាបរួចហើយ ក្រោយប្រឡងបាក់ឌុប លោកគ្រូ អ្នកគ្រូតែងធ្វើដំណើរពីខេត្ដនានាមកភ្នំពេញ ដើម្បីកែកិច្ចការបេក្ខជន។ក្នុងនាមគ្រូម្នាក់ដែលត្រូវទៅកែដែរនោះសូមសំណូមពូរសម្ដេចពុកជួយសម្របសម្រួលយ៉ាងណាឱ្យកែកិច្ចការបេក្ខជននៅតាមខេត្ដរៀងៗខ្លួនវិញ ព្រោះអាចកាត់បន្ថយការប្រមូលផ្ដុំមនុស្សច្រើនផងកាត់បន្ថយថវិការដ្ឋផង និងបង្កលក្ខណៈងាយស្រួលដល់លោកគ្រូ អ្នកគ្រូផង»។
លោករស់សុវាចា អ្នកនាំពាក្យក្រសួងអប់រំយុវជននិងកីឡាបានថ្លែងថា ចំពោះការកែកិច្ចការបេក្ខជនប្រឡងសញ្ញាបត្រទុតិយភូមិសម័យប្រឡងថ្ងៃទី២៧ខែធ្នូឆ្នាំ២០២១នេះគឺរក្សានិងអនុវត្តទៅតាមនីតិវិធីនិងបទប្បញ្ញត្តិរបស់ក្រសួងដែលមានជាធរមានដោយមិនមានការកែប្រែឱ្យកែនៅតាមបណ្ដាខេត្តវិញនោះឡើយ។ លោកបញ្ជាក់ថាដំណើការកំណែនឹងប្រព្រឹត្តទៅចាប់ពីថ្ងៃទី៣០ ខែធ្នូឆ្នាំ២០២១ ដល់ថ្ងៃទី៥ ខែមករាឆ្នាំ២០២២។
បើតាមលោក សុវាចា មណ្ឌលកំណែវិញ្ញាសាប្រឡងឆ្នាំនេះ មានចំនួន១០មណ្ឌល ដែលត្រូវបានប្រមូលផ្ដុំវិញ្ញាសាមកកែនៅរាជធានីភ្នំពេញតាមមណ្ឌលកំណែសម្រាប់មុខវិជ្ជានីមួយៗ។
មណ្ឌលទាំងនោះមាននៅ ១-មណ្ឌលកំណែវិទ្យាល័យព្រះស៊ីសុវត្ថិសម្រាប់មុខវិជ្ជាអក្សរសាស្ត្រខ្មែរ។២-មណ្ឌលកំណែវិទ្យាល័យបាក់ទូកសម្រាប់មុខវិជ្ជាគណិតវិទ្យា។៣-មណ្ឌលកំណែអនុវិទ្យាល័យចតុមុខសម្រាប់មុខវិជ្ជាភាសាបរទេស។៤-មណ្ឌលកំណែវិទ្យាល័យវត្តកោះសម្រាប់មុខវិជ្ជារូបវិទ្យា។៥-មណ្ឌលកំណែវិទ្យាល័យព្រះយុគន្ធរសម្រាប់មុខវិជ្ជាភូមិវិទ្យា។៦-មណ្ឌលកំណែវិទ្យាល័យទួលទំពូងសម្រាប់មុខវិជ្ជាផែនដីនិងបរិស្ថានវិទ្យា។៧-មណ្ឌលកំណែវិទ្យាល័យជាស៊ីមបឹងកេងកងសម្រាប់មុខវិជ្ជាគីមីវិទ្យា។៨-មណ្ឌលកំណែវិទ្យាល័យហ៊ុនសែនប៊ុនរ៉ានីវត្តភ្នំសម្រាប់មុខវិជ្ជាប្រវត្តិវិទ្យា។៩-មណ្ឌលកំណែវិទ្យាល័យជាស៊ីមសន្ធរម៉ុក សម្រាប់មុខវិជ្ជាសីលធម៌-ពលរដ្ឋវិជ្ជា។១០-មណ្ឌលកំណែវិទ្យាល័យបឹងត្របែកសម្រាប់មុខវិជ្ជាជីវវិទ្យា។
លោកបានបញ្ជាក់ថា ការប្រកាសលទ្ធផលប្រឡងបាក់ឌុបនឹងធ្វើឡើងនៅថ្ងៃទី១៨ ខែមករាឆ្នាំ២០២២ សម្រាប់មណ្ឌលប្រឡងរាជធានីភ្នំពេញនិងខេត្តកណ្ដាលនិងនៅថ្ងៃទី១៩ ខែមករាឆ្នាំ២០២២ សម្រាប់មណ្ឌលប្រឡងនៅខេត្តដទៃទៀត។
បើតាមក្រសួងអប់រំ ក្នុងឆ្នាំសិក្សា២០២០-២០២១ បេក្ខជនបានចុះឈ្មោះប្រឡងសរុបមាន ១១៤១៨៣នាក់ស្រី ៦០ ៣៩៧នាក់។បេក្ខជនត្រូវបានរៀបចំចំនួន ២៥ នាក់ក្នុង១បន្ទប់ លើកលែងតែបន្ទប់ចុងក្រោយនិងបន្ទប់ដែលមានបេក្ខជនមកពីវិទ្យាល័យអប់រំពិសេស។ចំណែកមណ្ឌលសំណេរមានចំនួនសរុប២០៤មណ្ឌល ត្រូវជា ៤ ៦១៦បន្ទប់។ចំពោះការរៀបចំការប្រឡងបាក់ឌុប ក្រសួងនឹងគោរពទៅតាមគោលការណ៍ទាំង៤គឺ គោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន៕
វីដេអូ៖
