បន្ទាយមានជ័យៈ យោងតាមមន្ត្រីសាខា កាំកុងត្រូល ខេត្ត បន្ទាយមានជ័យបានឱ្យដឹងថា សមត្ថកិច្ចជំនាញបានបំផ្លាញទំនិញខូចគុណភាពចម្រុះ ជាបន្តបន្ទាប់ ប្រមាណជាង៨តោន ក្រោយពីការបង្ក្រាបនិងរឹបអូសបានពី ឈ្មួញលួចនាំចូលពីប្រទេសថៃ តាមច្រកព្រំដែន ខេត្តបន្ទាយមានជ័យ និងពីតំបន់ផ្សេងៗក្នុងឆ្នាំ២០២១។
លោក សាន វិជ្ជាសារ៉ាវុធ ប្រធានសាខាការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំ ខេត្ត បន្ទាយមានជ័យ ឱ្យដឹងនៅថ្ងៃទី២៣ ធ្នូ ថា ទំនិញដែលត្រូវដុតបំផ្លាញចោលទាំងនោះមានដូចជា កាកសំណល់កម្ទេចមី ស្រាបៀរសឹង្ហនិងស្រាបៀរប៊ូឌូស័រ ភេសជ្ជៈអាដេ អាល់កុលក្លែងក្លាយ និងទំនិញភេសជ្ជៈទឹកក្រូចចម្រុះ។
លោកបន្តថា ទំនិញខូចគុណភាពទាំងនោះ ឈ្មួញបានលួចនាំចូលពីប្រទេសថៃ នៅចំណុចច្រករបៀងបឹងត្រកួន និងតាមច្រកអូរបីជាន់។
លោក វិជ្ជាសារ៉ាវុធ ថ្លែងថា៖ «ទំនិញខូចគុណភាពនៅឆ្នាំ២០២១នេះគឺមានការកើនឡើងជាងឆ្នាំមុនជាងពាក់កណ្តាលមូលហេតុអំឡុងពេលកូវីដផ្ទុះខ្លាំងនោះគឺមន្ត្រីជំនាញរបស់យើងមិនសូវមានសកម្មភាព អ៊ីចឹងទៅឈ្មួញចេះតែលួចនាំចូល។ ម្យ៉ាងទៀតឈ្មួញយល់ឃើញថាពួកខ្ញុំអត់មានតួនាទីអីនៅព្រំដែន អ៊ីចឹងគាត់គិតថាពួកខ្ញុំអត់មានសមត្ថកិច្ចអីចាប់គាត់ទេ រឿងនេះគាត់អត់យល់ដល់ពេលយើងឆ្មក់យើងដាក់បណ្តាញនៅតាមគោលដៅក៏ចាប់បានច្រើន យើងខកខានសកម្មភាពខ្លះៗដោយសារកូវីដផ្ទុះខ្លាំងពេក»។
បើតាមលោកវិជ្ជាសារ៉ាវុធ ថ្លែងថា នៅពេលដែលសមត្ថកិច្ចរបស់លោកចាប់ឃាត់ទំនិញណាមួយគឺមន្ត្រីជំនាញលោកតែងតែធ្វើការអប់រំ និងលើកពីមូលដ្ឋានច្បាប់ពន្យល់ដល់ឈ្មួញហើយបើគាត់មិនព្រមចូលរួមសហការ គឺចាត់ទុកថាជាការបំពានច្បាប់។បើដូចនេះត្រូវតែមានកំហុសហើយឈានដល់ការធ្វើសំណុំរឿងបញ្ជូនទៅតុលាការដែលបែបនេះមាន៣ទៅ៤ករណីហើយដែលលោកបានបញ្ជូនសំណុំរឿងទៅតុលាការ។
លោកថ្លែងថា៖«យើងតែងតែធ្វើការផ្សព្វផ្សាយច្បាប់នៅតាមទីតាំងលក់ទំនិញ និងដល់ពលរដ្ឋគឺអ្វីដែលយើងចង់បាននោះគឺឱ្យប្រជាពលរដ្ឋចូលរួម។ពិសេសអាជីវក និងពាណិជ្ជក បើពួកគាត់លក់ទំនិញត្រូវយល់ដឹងអំពីច្បាប់គឺត្រូវលក់ទំនិញណាដែលល្អៗ និងបំរើដល់សុខភាពរាងកាយ។ ពិសេសទំនិញផ្តល់អាហាររូបត្ថម»៕