ភ្នំពេញៈ ក្រសួងការងារ និងបណ្តុះបណ្តាលវិជ្ជាជីវៈ កំពុងបន្តដោះស្រាយវិវាទរវាងបុគ្គលិក និងក្រុមហ៊ុនណាហ្គាវើលដ៍ ដោយការពិនិត្យទៅលើការគណនាសំណង របស់កម្មករនិយោជកកន្លងមក ខណៈកម្មករនិយោជកប្រមាណ១ ០០០ នាក់ នៅតែប្រមូលផ្តុំគ្នាតវ៉ា នៅថ្ងៃទី ២៣ ធ្នូ ដើម្បីទាមទារចូលធ្វើការវិញ។
បុគ្គលិកក្រុមហ៊ុនណាហ្គាវើលលដ៍ជាង ១ ០០០ នាក់ បានប្រមូលផ្តុំគ្នាតវ៉ា ចាប់តាំងពីថ្ងៃ១៨ ធ្នូ ឆ្នាំ ២០២១មក ដើម្បីទាមទារឱ្យក្រុមហ៊ុនទទួលយកពួកគេចូលធ្វើការ ក្រោយពីក្រុមហ៊ុន បានប្រកាសបញ្ឈប់បុគ្គលិកជាង ៣៦០ នាក់ ដោយសំអាងថា ដោយសារតែវិបត្តិជំងឺកូវី ១៩កាលពីឆ្នាំ ២០២០។
ក្រសួងការងារ បានឱ្យដឹងនៅក្នុងសេចក្តីប្រកាសព័ត៌មាននៅថ្ងៃទី ២២ ធ្នូថា ក្រោយពីមានកិច្ចសម្របសម្រួលជាបន្តបន្ទាប់ ក្រសួងការងារ បានទទួលជួបកម្មករម្នាក់ ដោយបានឯកភាពទទួលយកដំណោះស្រាយពីក្រុមហ៊ុន ហើយក្រសួង ក៏បានប្រជុំជាមួយតំណាងកម្មករ និយោជិត ដើម្បីពិនិត្យទៅលើការគណនាសំណងរបស់និយោជកកន្លងមកផងដែរ។
ជាមួយកិច្ចសម្របសម្រួលនេះ ក្រសួងការងារ ក៏បានអះអាងថា ក្រសួងនឹងបន្តទទួលបុគ្គលិកនិយោជិត ដែលយល់ព្រមទទួលលក្ខខណ្ឌដែលបានឯកភាពក្នុងកិច្ចប្រជុំនៅសាលារាជធានីភ្នំពេញកន្លងមក និងបន្តជួបជាមួយតំណាងកម្មករ ដើម្បីពិភាក្សាលើការងារផ្សេងៗបន្តទៀត។
ក្រសួងបានបញ្ជាក់ថា៖«សូមបងប្អូន និងអង្គការសហជីព ក៏ដូចជានិយោជក ចូលរួមសហការជាមួយក្រសួង និងអាជ្ញាធរមានសមត្ថកិច្ច ដើម្បីបញ្ជប់ករណីវិវាទនេះ ជាជាងការធ្វើកូដកម្ម ដែលនាំឱ្យប៉ះពាល់ដល់ផលប្រយោជន៍គ្រប់ភាគីពាក់ព័ន្ធ»។
កាលពីថ្ងៃទី ២១ ធ្នូ សហជីពបានធ្វើបញ្ជីឈ្មោះបុគ្គលិកនិយោជិតទាំង ៣៦៥នាក់ ដែលក្នុងនោះមានចំនួន ៤៨នាក់ លើចំនួន៣០០នាក់យល់ព្រមទទួលយកប្រាក់សំណង ដើម្បីឈប់ពីការងារ នៅពេលទូទាត់ត្រឹមត្រូវស្របតាមច្បាប់ស្តីពីការងារ ខណៈបុគ្គលិកដទៃ នៅតែប្រកាន់ជំហរក្នុងការតវ៉ា ដើម្បីឲ្យក្រុមហ៊ុន ទទួលយកពួកគេ ចូលធ្វើការវិញ។
លោក មឿន តុលា នាយកប្រតិបត្តិ មជ្ឈមណ្ឌលសម្ព័ន្ធភាពការងារ និងសិទ្ធិមនុស្ស បានលើកឡើងថា បើផ្អែកលើការប្រកាសរបស់ក្រសួងការងារ គឺបង្ហាញថា បុគ្គលិកដែលមានបំណងចង់ចូលធ្វើការវិញ គឺនៅតែមានចំនួនច្រើន ដែលទាមទារឱ្យស្ថាប័នពាក់ព័ន្ធ គួរតែពិនិត្យទៅលើការទាមទារនេះ ជាជាងផ្តល់នូវមធ្យោបាយផ្សេងៗ ដែលកម្មករមិនអាចទទួលយកបាន។
លោក បន្តថា៖«លទ្ធផលនៃការសម្របសម្រួលនេះ គឺមិនទាន់ឃើញមានជាដុំកំភួនអីទេ ដែលខាងភាគីអាជ្ញាធរ នៅតែចោទថា ការធ្វើកូដកម្មនេះ ខុសច្បាប់ អីហ្នឹង។ ចំពោះលទ្ធផលម្នាក់ ដែលគាត់សុខចិត្តទៅទទួលសំណង ដើម្បីឱ្យក្រុមហ៊ុនជំរុះអីហ្នឹង នេះ គឺជារឿងមួយ។ ប៉ុន្តែបើមើលបុគ្គលិកសរុបជាង ៣០០ នាក់ គឺហាក់ដូចជាចេតនា ចង់ចូលធ្វើការច្រើនជាង»។
លោក មឿន តុលា ក៏សង្ឃឹមថា ស្ថាប័នពាក់ព័ន្ធ នឹងពន្លឿដោះស្រាយបញ្ហាដែលបុគ្គលិកក្រុមហ៊ុននេះ ទាមទារបានឆាប់រហ័ស ចៀសវាងមានការបន្តការតវ៉ាបន្តទៀត ខណៈបុគ្គលិកប្រមូលផ្តុំគ្នាតវ៉ា គឺដើម្បីតែក្រពះ តែប៉ុណ្ណោះ៕