បាត់ដំបងៈ រដ្ឋបាលសាលាស្រុកបាណន់នៃខេត្ដបាត់ដំបងបានចេញលិខិតសម្រេចឱ្យលោក ជឹម ភើយ ជាអតីតមន្ត្រីយោធាដែលចូលនិវត្តន៍ផ្អាកចាក់ដី និងសាងសង់ជាបណ្ដោះអាសន្ននៅក្នុងភូមិសំរោង ឃុំស្ទឹង ក្រោយពីអាជ្ញាធរបានរកឃើញទីតាំងនេះមិនមានច្បាប់អនុញ្ញាត និងមានពាក់ព័ន្ធនឹងការយកដីរដ្ឋមកធ្វើជាកម្មសិទ្ធិ។
យោងតាមលិខិតរបស់រដ្ឋបាលស្រុកបាណន់ ដែលចុះហត្ថលេខាដោយលោក ស្រេង សុខា អភិបាលស្រុកបាណន់ថ្ងៃទី ២០ ខែធ្នូ ឆ្នាំ ២០២១ ឱ្យដឹងថា រដ្ឋបាលស្រុកសម្រេចឱ្យ ឈ្មោះ ជឹម ភើយ ជាម្ចាស់ការដ្ឋានសំណង់ដែលមានទីតាំងស្ថិតនៅចំណុចបឹងត្រាវ ភូមិសំរោង ឃុំស្ទឹង ស្រុកបាណន់ ត្រូវបញ្ឈប់ការចាក់ដីបំពេញ និងត្រូវផ្អាកការសាងសង់ជាបណ្ដោះអាសន្នចាប់ពីពេលបានទទួលលិខិតនេះ។
លិខិតដដែលបានបញ្ជាក់ថា «បុគ្គលខាងលើត្រូវបញ្ឈប់ការចាក់ដីបំពេញនៅជាប់មាត់បឹង និងបណ្ដោយផ្លូវលេខ ៥៧ និងត្រូវផ្អាកការសាងសង់សំណង់គ្រប់ប្រភេទជាបណ្ដោះអាសន្ន រហូតលុះត្រាតែមានលិខិតអនុញ្ញាតពីក្រសួងរៀបចំដែនដី នគរូបនីយកម្ម និងសំណង់ទើបអាចបន្តការសាងសង់នេះឡើងវិញ»។
រដ្ឋបាលស្រុកបានបញ្ជាក់ទៀតថា បើបុគ្គលម្ចាស់ការដ្ឋានមិនអនុវត្ដតាមខ្លឹមសារលិខិតទេ នឹងមានទោសប្រឈមមុខតាមផ្លូវច្បាប់ជាធរមាន។
លោក មីត ស៊ុននី ប្រធានរដ្ឋបាលស្រុកបាណន់បានប្រាប់ភ្នំពេញប៉ុស្ដិ៍នៅថ្ងៃទី ២៣ ធ្នូថា ដោយមើលឃើញពីការចាក់បំពេញដីជាប់មាត់បឹង និងសាងសង់សំណង់រឹង ដោយខុសច្បាប់ ទើបរដ្ឋបាលស្រុកសម្រេចឱ្យបុគ្គល ជឹម ភើយ បញ្ឈប់សកម្មភាពរបស់ខ្លួនជាបន្ទាន់។
លោកបានបន្តថា លោក ជឹម ភើយ មានដីនៅជាប់បឹងនោះបានកំណត់ព្រំប្រទល់រួចហើយ និងមានអាជ្ញាធរភូមិ ឃុំ ទទួលស្គាល់ និងភូមិបាលក៏បានចុះទៅវាស់វែងរួចហើយដែរ។ ប៉ុន្តែអ្វីដែលសំខាន់គឺលោក ជឹម ភើយ នេះបានចាក់ដី និងសាងសង់សំណង់មិនមានច្បាប់អនុញ្ញាតត្រឹមត្រូវ។
លោកថ្លែងថា៖ «ដីបឹងនៅតែដីបឹងធម្មតាទេ ។ នៅពេលដែលខ្ញុំចុះទៅ អត់មានឃើញប៉ះពាល់ដល់ប្រជាពលរដ្ឋ និងប៉ះពាល់តែផ្លូវទេ គឺចាក់ខ្ពស់ជាងផ្លូវ។ គាត់ឥឡូវហ្នឹងកំពុងរត់ច្បាប់ពីក្រោមឡើងទៅលើហើយ។ តែសម្រេចយ៉ាងណាទៀត ខ្ញុំអត់ដឹងទេ សម្រេចលើលោកអភិបាល»។
ភ្នំពេញប៉ុស្តិ៍មិនអាចទាក់ទងលោក ជឹម ភើយ សុំធ្វើអត្ថាធិប្បាយបានទេ នៅថ្ងៃទី ២៣ ខែធ្នូ ឆ្នាំ ២០២១។
យោងតាមការផ្សព្វផ្សាយរបស់រដ្ឋបាលស្រុកបាណន់ពីថ្ងៃទី ២២ ធ្នូបានឱ្យដឹងថា ដីដែល លោក ជឹម ភើយ ចាក់ដីបំពេញនេះជាដីរបស់រដ្ឋ និងនៅជាប់មាត់បឹងត្រាវ។ កាលពីសម័យរដ្ឋកម្ពុជាធ្លាប់ជាបន្ទាយទាហានរបស់ គ.១៣២ ដែលគ្រប់គ្រងដោយលោក ជឹម ភើយ ដែលបច្ចុប្បន្នបានចូលនិវត្តន៍។
ប្រភពដដែលបន្តថា លុះក្រោយមកក៏មានការផ្លាស់ប្តូរបន្ទាយទៅកាន់ទីតាំងផ្សេង ក៏ដីនេះបន្តគ្រប់គ្រងដោយ លោក ជឹម ភើយ រហូតមក។
ក្នុងពិធីចែកវិញ្ញាបនបត្រសម្គាល់ម្ចាស់អចលនវត្ថុជូនប្រជាពលរដ្ឋនៅក្នុងខេត្តបាត់ដំបងកាលពីដើមខែធ្នូ លោក សុខ លូ អភិបាលខេត្តបាត់ដំបងបានព្រមានដល់អ្នកដែលរំលោភបំពានដល់ដីព្រៃ ឬដីដែលជាសម្បត្តិរដ្ឋ ដោយអះអាងថារដ្ឋបាលខេត្តនឹងចាត់វិធានការទៅតាមផ្លូវច្បាប់ដោយមិនមានការលើកលែងឡើយ៕