.jpg)
សាលាស្រុកកំពង់លែងស្ថិតក្នុងខេត្តកំពង់ឆ្នាំង។ រូបថត សហការី
កំពង់ឆ្នាំងៈ រាជរដ្ឋាភិបាលបានសម្រេចតែងតាំងអភិបាលស្រុកចំនួន ៣ នៅក្នុងខេត្តកំពង់ឆ្នាំងរួមមានស្រុកបរិបូណ៌ ស្រុកជលគិរី និងស្រុកកំពង់លែង ដើម្បីជំនួសកន្លែងអភិបាល ស្រុកចំនួន ២ រូបដែលផុតអាណត្តិ និង ១ រូបទៀតត្រូវចូលនិវត្តន៍ ក៏ប៉ុន្តែអភិបាលខេត្តអះអាងថា ការផ្លាស់ប្ដូរភារកិច្ចមន្ត្រីទាំងនេះ គឺមិនជាប់ពាក់ព័ន្ធនឹងការគ្រប់គ្រងតំបន់ទន្លេសាបទេ។
អនុក្រឹត្យដែលចុះហត្ថលេខាដោយលោកនាយករដ្ឋមន្ត្រី ហ៊ុន សែន ចុះថ្ងៃទី ២២ ធ្នូ បានឱ្យដឹងថា រដ្ឋាភិបាលសម្រេចផ្ទេរភារកិច្ចមន្ត្រីរាជការចំនួន ២ រូបនៅក្នុងខេត្តកំពង់ឆ្នាំង គឺលោក យឹម សារិន ជាអភិបាលស្រុកបរិបូណ៌ និងលោក ហៃ មនោរម្យ ជាអភិបាលស្រុកជលគិរីឱ្យទៅបម្រើការងារនៅរដ្ឋបាលខេត្តកំពង់ឆ្នាំងវិញ។
អនុក្រឹត្យដដែលនេះក៏បានប្រកាសតែងតាំងមន្ត្រីចំនួន ៣ រូបឱ្យកាន់មុខតំណែងជាអភិបាលស្រុកទាំង ៣ នោះ ដែលជាស្រុកនៅជាប់តំបន់បឹងទន្លេសាបជំនួសវិញផងដែរ ក៏ប៉ុន្តែអនុក្រឹត្យនេះមិនបានបញ្ជាក់ពីមូលហេតុនៃការផ្លាស់ប្តូរមន្ត្រីទាំងនេះទេ។
អនុក្រឹត្យបានបញ្ជាក់ថា «តែងតាំង លោក ចេង ចាន់ជូណា ឋានន្តរស័ក្តិវរមន្ត្រី ថ្នាក់លេខ ៣ ឱ្យកាន់មុខតំណែងជាអភិបាលនៃគណៈអភិបាលស្រុកបរិបូណ៌។ លោក យ៉ែម លក្ខិណា ឋានន្តរស័ក្តិអនុមន្ត្រីថ្នាក់លេខ ៣ ឱ្យកាន់មុខតំណែងជាអភិបាលនៃគណៈអភិបាលស្រុកកំពង់លែង និងលោក ជូវ គឹមស៊ីន ឋានន្តរស័ក្តិវរមន្ត្រី ថ្នាក់លេខ ២ ឱ្យកាន់មុខតំណែងជាអភិបាលនៃគណៈអភិបាលស្រុកជលគិរី»។
លោក ស៊ុន សុវណ្ណារិទ្ធិ អភិបាលខេត្តកំពង់ឆ្នាំងបានប្រាប់ភ្នំពេញប៉ុស្តិ៍នៅថ្ងៃទី ២៣ ធ្នូថា ការផ្ទេរភារកិច្ចមន្ត្រីទាំង ២ នេះគឺធ្វើឡើងតាមបែបបទរដ្ឋបាល ដោយសារតែពួកគេចប់អាណត្តិ ខណៈអភិបាលស្រុកកំពង់លែងដល់វ័យត្រូវចូលនិវត្តន៍។
លោកបានអះអាងថា៖ «មិនមានជាប់ពាក់ព័ន្ធអ្វីនឹងការគ្រប់គ្រងបឹងទន្លេសាបនោះទេ ព្រោះនេះដោយសារកម្មវិធីមានអ្នកខ្លះត្រូវចូលនិវត្តន៍ ហើយអ្នកខ្លះត្រូវដល់អាណត្តិគឺត្រូវតែផ្ទេរទៅផ្ទេរមកជាកិច្ចការរដ្ឋបាលធម្មតា។ តាមរយៈនេះ យើងមានការផ្លាស់ប្តូរនេះ ៣ រូបហ្នឹងឯង»។
បើតាមលោក ស៊ុន សុវណ្ណារិទ្ធិ គិតត្រឹមថ្ងៃទី ២៣ ធ្នូ ខេត្តកំពង់ឆ្នាំងបានដកហូតដីព្រៃលិចទឹកក្នុងតំបន់ ៣ បានជាង ៣ ម៉ឺនហិកតា ដោយក្នុងនោះមានពលរដ្ឋស្ម័គ្រចិត្តប្រគល់ដីទាំងនោះប្រមាណជាង ៧ ០០០ គ្រួសារ ដែលរដ្ឋបាលខេត្ត នឹងបន្តដាំដុះព្រៃលិចទឹកឡើងវិញ ខណៈកន្លងមកព្រៃលិចទឹកជាង ២ ម៉ឺនដើមបានដាំដុះរួច។
លោក គង់ ចាន់មុនី មន្ត្រីសម្របសម្រួលអង្គការការពារសិទ្ធិមនុស្សលីកាដូប្រចាំខេត្តកំពង់ឆ្នាំង មិនអាចធ្វើការសន្និដ្ឋានបានទេថា ការផ្លាស់ប្តូរមន្ត្រីដែលមានតំណែងជាអភិបាលស្រុកទាំង ៣ ស្ថិតក្នុងតំបន់បឹងទន្លេសាបនេះមានជាប់ពាក់ព័ន្ធរឿងអ្វី ប៉ុន្តែលោកមើលឃើញចំណាត់ការកន្លងមកក្នុងការដកហូតដីព្រៃលិចទឹកក្នុងបឹងទន្លេសាបរបស់រដ្ឋបាលខេត្តនេះ គឺបានធ្វើឡើងយ៉ាងមានប្រសិទ្ធភាព។
លោកបានបញ្ជាក់ថា៖ «ចំណាត់ការរបស់អាជ្ញាធរឥឡូវនេះ គឺបានចាត់វិធានការការពារនេះ គឺឃើញមានលក្ខណៈល្អប្រសើរដែរហើយ ដែលបានដកហូតយកដី សម្រាប់បម្រើប្រយោជន៍សាធារណៈ។ ការរក្សាព្រៃលិចទឹក គឺមានផលប្រយោជន៍ច្រើនជាង ដែលនឹងផ្តល់ចំណូលដល់ពលរដ្ឋច្រើនលើសលប់ ជាពិសេសគឺការផ្គត់ផ្គង់ស្បៀង»៕
