.jpg)
សកម្មភាពមន្ត្រី CMAC បង្ហាត់សុនខហិតរកវីរុសកូវីដ ១៩ នាពេលកន្លងមក។ រូបថត ហេង រតនា
ភ្នំពេញៈ អគ្គនាយកអង្គភាពស៊ីម៉ាក់បានបង្ហាញពីភាពជោគជ័យក្នុងការបង្វឹកសុនខឱ្យមានសមត្ថភាពស្វែងរកអ្នកជំងឺកូវីដ ១៩ ក្រោយពីបានសាកល្បងដោយក្រុមជំនាញ ដែលបានយកសុនខ និងឧបករណ៍តេស្តិ៍ សាកល្បងរកអ្នកសង្ស័យ និងអ្នកជំងឺកូវីដ ១៩ បាន «រកឃើញ» លទ្ធផលដូចគ្នា។
លោក ហេង រតនា អគ្គនាយកអង្គភាពស៊ីម៉ាក់បានសរសេរនៅលើទំព័រហ្វេសប៊ុករបស់លោកកាលពីថ្ងៃទី ២២ ខែធ្នូ ឆ្នាំ ២០២១ បានសម្តែងមោទនភាពចំពោះការរីកចម្រើនរបស់សុនខ ហើយនេះក៏ជាដំណាក់កាលចុងក្រោយក្នុងជំហាននៃការងារស្រាវជ្រាវ ដោយត្រូវធ្វើការបញ្ជាក់ជាក់ស្តែងចំពោះអ្នកសង្ស័យ និងអ្នកជំងឺ នៅមណ្ឌលកោះពេជ្រ និងនៅស្ទឹងមានជ័យ រាជធានីភ្នំពេញ។
លោកថ្លែងថា៖ «លទ្ធផលបានល្អប្រសើរ ដោយប្រៀបធៀបជាមួយឧបករណ៍តេស្តតែម្តងគឺ «រកឃើញ» ដូចគ្នា!»។
ភ្នំពេញប៉ុស្តិ៍ មិនអាចទាក់ទងលោក ហេង រតនា សុំធ្វើអត្ថាធិប្បាយបន្ថែមបានទេ នៅថ្ងៃទី ២៣ ខែធ្នូនេះ។ ប៉ុន្តែ លោកបានប្រាប់ភ្នំពេញប៉ុស្តិ៍កាលពីថ្ងៃទី ២៧ ខែតុលា ឆ្នាំ ២០២១ ឱ្យដឹងថា អ្នកជំនាញសុនខខែ្មរ អាចស្រាវជ្រាវ អាចហ្វឹកហ្វឺនសុនខហិតអ្នកជំងឺកូវីដ ១៩ បានដោយជោគជ័យក្នុងជំហានដ៏សំខាន់នេះ។ សុនខកម្ពុជាមានសមត្ថភាព និងអាចចូលរួមសកម្មភាពប្រយុទ្ធប្រឆាំងកូវីដ ១៩ បានដោយប្រើពេលប្រមាណ ពី ១០-១៥ វិនាទី អាចហិតស្វែងរកមុខសញ្ញាអ្នកមានជំងឺកូវីដ ១៩ ក្នុងចំណោមមនុស្សច្រើន (ហ្វូងមនុស្ស)។
លោកពន្យល់ថា សុនខគឺជាឧបករណ៍អាចប្រើជាជំនួយក្នុងការស្វែងរកអ្នកជំងឺកូវីដ នៅតាមកន្លែងមួយចំនួនដូចជា តាមច្រកទ្វារអន្តរជាតិ ព្រលានយន្តហោះ ព្រឹតិ្តការណ៍ធំៗ ដូចជាការប្រកួតកីឡា កម្មវិធីមហាជនជាដើម។ ល។ ដែលនេះជាយុទ្ធសាស្ត្ររើសក្រួសចេញពីអង្ករ! ចំពោះមុខសញ្ញាសង្ស័យអាចចាត់វិធានការសុខាភិបាល!។
លោកថ្លែងថា៖ «សុនខ ក៏មិនខុសពីឧបករណ៍ប្រភេទតេស្ត CPR ឬ តេស្ត រហ័សដែរ។ ដូច្នេះ សុនខ គឺជាឧបករណ៍មួយផ្តល់សញ្ញាឱ្យដឹងថា មុខសញ្ញាណា ជាមុខសញ្ញាសង្ស័យថា មានផ្ទុកវីរុសកូវីដ ១៩ ក្រោយពីការសង្ស័យហើយត្រូវយកទៅវិភាគបន្ថែមទៀត ឬ យ៉ាងណា គឺជានីតិវិធីរបស់ក្រសួងសុខាភិបាល។ សុនខគ្រាន់តែជាឧបករណ៍ជួយ សម្រាប់អ្នកជំនាញសុខាភិបាលបន្តធ្វើកិច្ចការ បន្តទៀត»។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាលនៅថ្ងៃទី ២៣ ខែធ្នូ ឆ្នាំ ២០២១ ស្នើសុំមិនធ្វើអត្ថាធិប្បាយ ពាក់ព័ន្ធនឹងករណីខាងលើនេះទេ ដោយលោកស្រីបានថ្លែងយ៉ាងខ្លីថា «មិនទទួលបានព័ត៌មាន»។
លោក កែរ រដ្ឋា ប្រធានមន្ទីរសុខាភិបាល ខេត្តស្វាយរៀង បានថ្លែងសម្តែងការស្វាគមន៍ចំពោះសុនខ ដែលមានសមត្ថភាពចូលរួមហិតក្លិនស្វែងរកអ្នកផ្ទុកនូវជំងឺកូវីដ ១៩។ លោកថ្លែងបន្តថា ការប្រើប្រាស់សុនខ មិនបានចំណាយថវិកាច្រើន និងរួមចំណែកយ៉ាងសំខាន់ក្នុងការកាត់បន្ថយការឆ្លងរីករាលដាលនៃជំងឺកូវីដ ១៩ នៅក្នុងប្រទេសកម្ពុជា៕
វីដេអូ៖
