ភ្នំពេញៈ ក្រសួងធនធានទឹក និងឧតុនិយម និងក្រសួងសេដ្ឋកិច្ច និងហិរញ្ញវត្ថុបាននិងកំពុងតែធ្វើការបង្កើត ជួសជុលស្តារឡើងវិញ និងពង្រីកអាងទឹកជាច្រើនក្នុងខេត្តមណ្ឌលគិរីនេះ ដោយសារតែនាពេលនេះខេត្តជាយដែនមួយនេះគឺជាកន្លែងទេសចរណ៍មួយដ៏សំខាន់ និងជាភូមិសាស្ត្រសេដ្ឋកិច្ចនយោបាយដ៏ល្អប្រសើរសម្រាប់ប្រទេសកម្ពុជា។ នេះបើយោងតាមក្រសួងធនធានទឹកនៅថ្ងៃសុក្រទី២៤ខែធ្នូនេះ។
ការគូសបញ្ជាក់នេះត្រូវបានធ្វើឡើងក្រោយពេលដែលក្រុមការងាររបស់ក្រសួងទាំងពីរបានចុះទៅធ្វើការពិនិត្យមើលលើវឌ្ឍនភាពនៃបណ្តាការដ្ឋានរបស់ក្រសួងធនធានទឹក និងឧតុនិយម ក្នុងក្រុងសែនមនោរម្យ និងស្រុកអូរាំង របស់ខេត្តមណ្ឌលគិរីកាលពីថ្ងៃទី២៣ ខែធ្នូ ឆ្នាំ២០២១នេះ។
ការដ្ឋានទាំងនោះមានដូចជាការដ្ឋានជួសជុលស្តារឡើងវិញនៃទំនប់អាងលើ និងទំនប់អាងក្រោម និងការដ្ឋានសាងសង់ទំនប់អូរតេដ៏មានសារៈសំខាន់ និងមានសក្តានុពលខ្ពស់ក្នុងវិស័យសេដ្ឋកិច្ច ដែលអាងទឹកនេះនឹងប្រែក្លាយខេត្តនៅភូមិភាគឦសានមួយនេះឱ្យកាន់តែនៅកៀកនឹងអ្នកទេសចរទាំងអស់ក្នុង និងក្រៅប្រទេស។
វឌ្ឍនភាពការងារស្ដារ និងសាងសង់ទំនប់លើ និងទំនប់ក្រោមនាពេលបច្ចុប្បន្ននេះសម្រេចបានប្រមាណជា៣០%ហើយ។ទំបន់នេះគឺសម្រាប់ជាប្រភពទឹកដ៏សំខាន់មួយ សម្រាប់ផលិតទឹកស្អាតជូនបងប្អូនប្រជាពលរដ្ឋនៅក្នុងក្រុងសែនមនោរម្យ និងជាកន្លែងលំហែកម្សាន្តរបស់ភ្ញៀវជាតិ និងអន្តរជាតិផងដែរ។ នេះបើយោងតាមរដ្ឋបាលខេត្តមណ្ឌលគិរី។
ក្រសួងធនធានទឹកបានឱ្យដឹងថា លោកនាយករដ្ឋមន្ត្រី ហ៊ុន សែនបានសម្រេចបង្កើតឡើងនូវក្រសួងធនធានទឹក និងឧតុនិយម ដ៏មានសារៈសំខាន់ និងនយោបាយទឹកដ៏រឹងមាំដែលពេញទៅដោយសក្តានុពលខ្ពស់ក្នុងការបម្រើឱ្យផលប្រយោជន៍ជាតិ និងមាតុភូមិប្រកបដោយប្រសិទ្ធភាពខ្ពស់ មានស័ក្តិសិទ្ធភាព និងធានាបាននូវនិរន្តរភាព។
ព្រមពេលជាមួយគ្នានេះដើម្បីគោរពតាមមាគ៌ាដ៏ត្រឹមត្រូវរាជរដ្ឋាភិបាល និងស័ក្តិសមជាសសរទ្រូងដ៏រឹងមាំក្នុងវិស័យទឹករបស់កម្ពុជា ក្រសួងធនធានទឹកបាននិងកំពុងតែដឹកនាំធ្វើការសហការជាប្រចាំគ្រប់ជ្រុងជ្រោយជាមួយនឹងក្រសួងសេដ្ឋកិច្ច និងហិរញ្ញវត្ថុ និងដៃគូរអភិវឌ្ឍន៍ទាំងអស់ក្នុងពិភពលោក។ ដឹកនាំធ្វើការសហការទាំនោះគឺដើម្បីធ្វើការកសាងបាននូវផែនការវិនិយោគរយៈពេលវែងក្នុងការគ្រប់គ្រងវិស័យធនធានទឹក និងឧតុនិយម ក្នុងក្របខ័ណ្ឌទូទាំងប្រទេសកម្ពុជា ក្នុងនិយាមឈានជាបណ្តើរៗធ្វើទំនើបកម្មវិស្វកម្មលើការគ្រប់គ្រងវិស័យហេដ្ឋារចនាសម្ព័ន្ធធនធានទឹក និងឌីជីថលវិស័យឧតុនិយម ជម្នះបានលើបម្រែបម្រួលអាកាសធាតុ និងម្ចាស់ការបានលើការគ្រប់គ្រងគ្រប់គ្រោះមហន្តរាយធានាបានជាបន្តបន្ទាប់លើសុវត្ថិភាពទឹកសម្រាប់ផ្ទៃប្រទេស៕