ភ្នំពេញៈ តំណាងអយ្យការ សាលាដំបូងរាជធានីភ្នំពេញសម្រេចចោទប្រកាន់ទៅលើឈ្មោះ សុខសុវណ្ណ វឌ្ឍនាសាប៊ុង ហៅ William Guang ប្រធានគណបក្សខ្មែរក្រោក ជាច្រើនបទលើ្មសពាក់ព័ន្ធករណីប្លន់ដោយប្រដាប់អាវុធទៅលើអ្នកលក់ឡេតាមអនឡាញឈ្មោះ អ៊ាន សៀវម៉ី។
លោក William Guang និងបក្ខពួកមួយចំនួនត្រូវបានកម្លាំងសមត្ថកិច្ចបញ្ជូនទៅតុលាការ ដើម្បីសាកសួរតាមនីតិវិធីច្បាប់កាលពីថ្ងៃទី ២៥ ធ្នូ ឆ្នាំ ២០២១។
ក្រោយការសាកសួរជាច្រើនម៉ោង អ្នកនាំពាក្យសាលាដំបូងរាជធានីភ្នំពេញ លោក ប្លង់ សុផល បានថ្លែងថា ក្នុងសំណុំរឿងលោក William ត្រូវបានតំណាងអយ្យការ បើកការស៊ើបសួរពីបទលួចមានស្ថានទម្ងន់ទោសសមគំនិតក្នុងអំពើលួចមានស្ថានទម្ងន់ទោស បទកាន់កាប់អាវុធដោយគ្មានការអនុញ្ញាត និងបទក្លែងឯកសារសាធារណៈតាមមាត្រា ២៩ មាត្រា ៣៥៣ មាត្រា ៣៥៧ មាត្រា៤៩០ និងមាត្រា ៦២៩ នៃក្រមព្រហ្មទណ្ឌ។
លោក William បានឆ្លើយសារភាពនៅចំពោះមុខសមត្ថកិច្ច មុនពេលបញ្ជូនទៅតុលាការ ដោយរៀបរាប់ថា៖ «ក្នុងអំពើប្លន់ប្រដាប់ដោយអាវុធនោះ លោកជាអ្នកដឹកនាំដោយផ្ទាល់ និងបានចាត់តាំងក្រុមការងារផ្សេងៗគ្នាឱ្យយល់ពីតួនាទីរបស់ខ្លួន។ លោកថា៖ «យើងក្តាប់ចិត្តសាស្ត្រមនុស្សដែលពូកែនិយាយតែមាត់អួតអាង សម្ញែង បើសិនជាមនុស្សនោះជួបឧបសគ្គគិតច្របូកច្របល់»។
ក្នុងអំឡុងពេលសាកសួរនោះដែរ សមត្ថកិច្ចបានចោទសួរ លោក William ថា មានការព្រួយបារម្ភសមត្ថកិច្ចមកទាន់ ឬអ្នកជិតខាងឃើញដែរឬទេ? លោក William ឆ្លើយថា៖ «តាមចិត្តសាស្ត្រខ្ញុំដឹងថា ខ្មែរកម្រជួយគ្នា ភាគច្រើន គឺយកតែរួចខ្លួន។ នេះជាមេរៀនមួយ ថ្ងៃក្រោយខ្មែរឱ្យចេះជួយគ្នា»។
ទាក់ទងឯកសណ្ឋានប៉ូលិសវិញ លោកថា ទិញមកពីផ្សារទឹកថ្លា ក្រៅពីនោះសុទ្ធតែឯកសណ្ឋានដែលគ្នាលោកពាក់សម្រាប់ហាត់ប្រាណ និងដើរចូលព្រៃ។
ក្នុងអំពើប្លន់នោះ លោកបានចេញពីផ្ទះនៅវេលាម៉ោង ៧ និង ៥៤ ព្រឹក ហើយចាប់ផ្តើមធ្វើសកម្មភាពប្លន់នៅវេលាម៉ោងជាង ១០ ព្រឹកនៅថ្ងៃកើតហេតុកាលពីថ្ងៃទី ១៩ ធ្នូ ឆ្នាំ ២០២១។
លោកគូសបញ្ជាក់ថា មូលហេតុដែលលោកធ្វើសកម្មភាពប្លន់ ទៅដោយរលូននាពេលនោះ ដោយសារការធ្វេសប្រហែសរបស់អាជ្ញាធរមានសមត្ថកិច្ច ទោះបីលោកជិះឡានអត់ស្លាកលេខក៏ដោយ រីឯសន្តិសុខនៅបុរីនៅមានកម្រិតនៅឡើយ។ សមត្ថកិច្ចបានសួរទៀតថា លោកជិះឡានអត់ស្លាកលេខអ៊ីចឹង អត់ខ្លាចគេឆែកទេ? William ឆ្លើយថា៖ «ថ្ងៃនឹងខ្ញុំដឹងថា ថ្ងៃអាទិត្យ ប៉ូលិសយើងខ្ជិល (សន្តិសុខក្នុងបុរី) ខ្ញុំគិតថា នៅខ្សោយនៅឡើយ ទៅប្លន់រំភើយ មកវិញរំភើយ គ្រាន់តែថា ៣ ឬ ៤ ម៉ោងក្រោយ មានអាវុធហត្ថមកឃ្លាំមើល ខ្ញុំដឹងថា តម្រុយគេចាប់បានតាមកាមេរ៉ា»។ ទាក់ទងភាពឡូយឆាយ ហ៊ឺហា ផ្ទះវីឡា និងឡានទំនើបវិញ William បានឆ្លើយថា អ្វីៗដែលមានទាំងអស់នេះ លោកជួលគេ។ លោកថា៖«ផ្ទះជួលគេ ឡានបង់រំលស់គេ មុខរបរផ្សេងៗគ្មានចំណូល ក្ស័យធន បុគ្គលិកគ្មានបាយឱ្យស៊ីទេ»។
ជាចុងក្រោយ លោក William គូសបញ្ជាក់ថា ការប្លន់នេះជាការព្រមានទៅកាន់អ្នកមានមួយចំនួនកុំឱ្យអួត និងសម្ញែងមាសពេជ្រទៅថ្ងៃក្រោយ។
បើតាមការរៀបរាប់របស់ប្រធានបក្សខ្មែរក្រោករូបនេះ លោកធ្លាប់បានធ្វើសកម្មភាពប្លន់ពីមុនដែរ ប៉ុន្តែបរាជ័យ គឺប្លន់អ្នកមានល្បីឈ្មោះម្ចាស់គម្រោងសាងសង់លំនៅឋាន ឈ្មោះ ម៉ន ដានី ដោយធ្វើសកម្មភាពប្លន់នៅខេត្តកំពង់ស្ពឺ។
ជុំវិញករណីនេះ ម្ចាស់បុរី KP ម៉ន ដានី កាលពីថ្ងៃទី ២៥ ខែធ្នូ បានចេញមុខបំភ្លឺពាក់ព័ន្ធករណីប្លន់នេះ ដោយសម្តែងការហួសចិត្ត និងនឹកស្មានមិនដល់ថា ជាលោក William។ អ្នកស្រីថា៖ «គ្រាន់តែឮចម្លើយសារភាពលោក William មានបងប្អូនខ្លះ ខលមកសួរសុខទុក្ខខ្ញុំច្រើន។ ជាការពិតហេតុការណ៍នោះបានកើតឡើងនៅចំណុចផ្លូវជាតិលេខ ៣ ហើយខ្ញុំមិននឹកស្មានថា ជាគាត់ William។ ខ្ញុំស្គាល់គាត់ដែរថា ជាមនុស្សល្បីល្បាញនៅស្រុកយើង ខ្ញុំមិននឹកស្មានថាជាគាត់»។ អ្នកស្រីបានរៀបរាប់ថា៖ «ហេតុការណ៍នោះ កើតឡើងគួរឱ្យរន្ធត់ដែរ ដោយសារឡានខ្ញុំ បើកមុខក្រោយគ្នាពេលយប់ ឡានខ្ញុំជិះគ្នា ៤ នាក់ ខ្ញុំ និងប្តី និងជនជាតិថៃ ២ នាក់ និង ១ ឡានទៀតមានជនជាតិថៃ ៥ នាក់។ លុះដល់កន្លែងឆ្លងផ្លូវមានឡានមួយ មានចេតនាបុកឡានពួកខ្ញុំ ធ្វើឱ្យធ្លាក់កាងខាងមុខ និងកង់ឡានរួញចូលគ្នា»។
អ្នកស្រីបានរៀបរាប់ពីរបៀបប្លន់នោះថា ស្រដៀងគ្នាទៅនឹងហេតុការណ៍ដែលកើតឡើងលើករណីប្លន់នៅផ្ទះអ្នកលក់ផលិតផលឡេតាម Online ឈ្មោះ អ៊ាន សៀវម៉ី ដែរ។
អ្នកស្រីថ្លែងថា៖ «កម្លាំងគេ ៥ នាក់ មានកាំភ្លើងគ្រប់ដៃ ភ្ជង់មកលើសន្តិសុខខ្ញុំ។ គាត់បុកឡានខ្ញុំជ្រុះកាងហើយយកក្រដាស ១ សន្លឹកមកបង្ហាញទៅសន្តិសុខថា មិនឱ្យចូលទេបើអ្នកណាចូលគាត់បាញ់។ អ្នកនោះ គាត់ថា គាត់មានដីកា សំបុត្របេសកកម្ម»។
ក្នុងនាមជាអ្នកវិនិយោគក្នុងស្រុក និងមានស្វាមីជាអាណិកជនជាតិថៃ និងមានសញ្ជាតិខ្មែរ អ្នកស្រី ម៉ន ដានី បានសម្តែងអារម្មណ៍ទាំងក្តុកក្តួលថា ទង្វើនោះពិតជាធ្វើឱ្យប៉ះពាល់ដល់អារម្មណ៍អ្នកវិនិយោគបរទេសណាស់។ អ្នកស្រីថា៖ «អ្វីដែលខ្ញុំនិយាយជាមួយអ្នកវិនិយោគជនជាតិថៃ ព្យាយាមឱ្យត្រជាក់ចិត្ត កុំឱ្យភ័យខ្លាច ឱ្យគាត់គិតថា ស្រុកយើង មានសន្តិភាពទេ អ៊ីចឹងមកវិនិយោគនៅស្រុកខ្ញុំបាន ប៉ុន្តែផ្ទុយមកវិញគេមិនគិតអ៊ីចឹងទេ»។
សូមជម្រាបថា លោក សុខសុវណ្ណ វឌ្ឍនាសាប៊ុង និងមនុស្ស ១៤ នាក់ ត្រូវបានសមត្ថកិច្ចចាប់ខ្លួនជាបន្តបន្ទាប់ តាមគោលដៅដោយឡែកពីគ្នា។
នៅក្នុងប្រតិបត្តិការបង្ក្រាបករណីចោរប្លន់ប្រដាប់អាវុធនេះកម្លាំងជំនាញកងរាជអាវុធហត្ថរាជធានីភ្នំពេញ ដឹកនាំផ្ទាល់ដោយលោក រ័ត្ន ស្រ៊ាង មេបញ្ជាការកងរាជអាវុធហត្ថរាជធានី-ភ្នំពេញ ដែលបានដឹកនាំកងកម្លាំងក្នុងការស្រាវជ្រាវនេះក៏បានរកឃើញទីតាំងសម្បុកចោរប្រដាប់អាវុធដែលជាភូមិគ្រឹះដ៏ធំមួយ ស្ថិតក្នុងបុរីប៉េងហួតក្នុងសង្កាត់ចាក់អង្រែក្រោម ខណ្ឌមានជ័យក្បែរផ្លូវ ៦០ ម៉ែត្រ ព្រមទាំងរឹបអូសវត្ថុតាងគ្រឿងអលង្ការមួយចំនួន និងរឹបអូសអាវុធខ្លី ៤ ដើម និង វែង ១ ដើម។ ចំណែកជនសង្ស័យម្នាក់ទៀតត្រូវបានចាប់ខ្លួននៅខេត្តបាត់ដំបងនៅថ្ងៃទី ២៣ ខែធ្នូ៕
វីដេអូ៖