.jpg)
ម៉ូតូ និងរថយន្តដែលខូចខាតក្រោយបុកគ្នាពីយប់ថ្ងៃ ២៥ ធ្នូ។ រូបថត ហ្វេសប៊ុក
កំពង់ស្ពឺៈ នគរបាលស្រុកឧដុង្គនៅថ្ងៃទី ២៦ ធ្នូ កំពុងបន្តស្រាវជ្រាវស្វែងរកចាប់ខ្លួនបុរសម្នាក់ បន្ទាប់ពីបើករថយន្តបុកបុរសជិះម៉ូតូ ២ នាក់ស្លាប់កាលពីរំលងអធ្រាត្រឈានចូលថ្ងៃទី ២៥ ធ្នូ នៅតាមផ្លូវជាតិលេខ ៥១ ស្ថិតក្នុងភូមិស្តុកស្លាត ឃុំភ្នំតូច ស្រុកឧដុង្គ ខេត្តកំពង់ស្ពឺ។
លោកវរសេនីយ៍ឯក ខឹម សាម៉ុន អធិការនគរបាលស្រុកឧដុង្គឱ្យដឹងនៅថ្ងៃទី ២៦ ធ្នូថា ជនបង្កឈ្មោះ ហង់ ចាន់ អាយុ ៤៨ ឆ្នាំ។ សមត្ថកិច្ចលោកបានកំណត់អត្តសញ្ញាណរបស់ជនសង្ស័យរួចហើយ។ ប៉ុន្តែជនម្នាក់នេះមិនមែនជាអ្នករស់នៅខេត្តកំពង់ស្ពឺទេ។
លោកថ្លែងថា៖ «ករណីនេះខ្ញុំមិនអាចប្រាប់ពីភូមិ-ឃុំដែលជនសង្ស័យរស់នៅជូនបានទេព្រោះវាជាកិច្ចការដែលសមត្ថកិច្ចរបស់ខ្ញុំកំពុងធ្វើការ។ អ៊ីចឹងយើងកំពុងមមាញឹកក្នុងការងារនេះហើយ»។
លោកបញ្ជាក់ថា ចំពោះជនរងគ្រោះវិញមានឈ្មោះ ធឿន ចុន ភេទប្រុស អាយុ ៣២ ឆ្នាំ និងឈ្មោះ ឈឺន សុខហួត ភេទ ប្រុស អាយុ ២៨ ឆ្នាំ រស់នៅភូមិឃុំជាមួយគ្នា។ ពួកគេជាកសិកររស់នៅក្នុងភូមិចម្ការដូង ឃុំចាន់សែន ស្រុកឧដុង្គ ខេត្តកំពង់ស្ពឺ។
លោក សាម៉ុន រំឭកតាមសម្តីសាក្សីនៅកន្លែងកើតហេតុថា ហេតុការណ៍នេះបានកើតឡើងកាលពីរំលងអធ្រាត្រឈានចូលថ្ងៃទី ២៥ ធ្នូ ឆ្នាំ ២០២១។ លោកថាមុនកើតហេតុ គេបានឃើញរថយន្ត ១ គ្រឿង ម៉ាកស្តារិក ពណ៌ស ពាក់ស្លាកលេខព្រះសីហនុ 2A.5943 បានបើកបរក្នុងល្បឿនយ៉ាងលឿននៅតាមបណ្តោយផ្លូវលេខ ៥១ ក្នុងភូមិសាស្ត្រស្រុកឧដុង្គក្នុងទិសដៅពីជើងទៅត្បូង។ ចំណែកឯភាគីម៉ូតូជិះឌុបគ្នា ២ នាក់ក្នុងទិសដៅបញ្ច្រាសគ្នា។ លុះមកដល់ចំណុចកើតហេតុនៅចន្លោះគីឡូម៉ែត្រលេខ ២៥-២៦ ស្ថិតក្នុងភូមិស្តុកស្លាត ឃុំភ្នំតូច ស្រុកឧដុង្គ ស្រាប់តែបុកគ្នាពេញទំហឹងតែម្តង។
លោកបានបន្តថា ភ្លាមៗ បន្ទាប់ពីកើតហេតុ ពលរដ្ឋដែលរស់នៅក្បែរនោះបានទូរស័ព្ទរាយការណ៍ទៅនគរបាលប៉ុស្តិ៍ឃុំភ្នំតូច ហើយនគរបាលប៉ុស្តិ៍ក៏បានរាយការណ៍បន្តមកលោក។
ក្រោយទទួលបានសេចក្តីរាយការណ៍ភ្លាម លោកបានដឹកនាំកម្លាំងចុះដល់ទីតាំងកើតហេតុ។
ប៉ុន្តែអ្នកបើករថយន្តបានរត់គេចខ្លួនបាត់ដោយបន្សល់ទុកតែជនរងគ្រោះទាំង ២ នាក់ស្លាប់នៅកន្លែងកើតហេតុ។
លោកបានឱ្យដឹងទៀតថាគ្រោះថ្នាក់នេះ បណ្ដាលឱ្យផ្នែកខាងមុខរថយន្តស្តារិកបានបាក់ខ្ទេចខ្លះ។ ចំណែកម៉ូតូម៉ាកសង់ ១២៥ មួយគ្រឿងរបស់ភាគីរងគ្រោះត្រូវបានរថយន្តបុកបាក់ខ្ទេចនៅផ្នែកខាងមុខទាំងស្រុង។ ប៉ុន្តែក្រោយការពិនិត្យរួចសមត្ថកិច្ចរបស់លោកបានយកទាំងរថយន្ត និងម៉ូតូទៅរក្សាទុកនៅអធិការដ្ឋាននគរបាល ស្រុកឧដុង្គ ដើម្បីរង់ចាំភាគីទាំងសងខាងចូលខ្លួនដោះស្រាយគ្នាតាមច្បាប់។
លោក សាម៉ុន បញ្ជាក់ថា៖ «សាកសពជនរងគ្រោះទាំង ២ នាក់ខ្ញុំបានប្រគល់ឱ្យសាច់ញាតិយកទៅធ្វើបុណ្យតាមប្រពៃណីហើយ។ ប៉ុន្តែជនរងគ្រោះក៏ផឹកគ្រឿងស្រវឹងដែរ»៕
