.jpg)
សិស្សត្រៀមប្រឡងបាក់ឌុប មកពិនិត្យសុខភាព។ រូបថត ក្រសួងអប់រំ
ភ្នំពេញៈ លោក ហង់ជួន ណារ៉ុន រដ្ឋមន្ត្រីក្រសួងអប់រំយុវជន និងកីឡា ផ្ដាំផ្ញើដល់បុគ្គលិកអប់រំ លោកគ្រូ អ្នកគ្រូ និងសិស្សានុសិស្សក្នុងឱកាសប្រឡងសញ្ញាបត្រមធ្យមសិក្សាទុតិយភូមិសម័យប្រឡង ២៧-២៨ ធ្នូនេះ គោរពឱ្យបានម៉ឺងម៉ាត់តាមបទប្បញ្ញត្តិក្រសួងដាក់ចេញ ខណៈដំណើរការពិនិត្យឈ្មោះលេខបន្ទប់ លេខតុ និងវាស់កម្ដៅសិស្សប្រព្រឹត្តទៅដោយរលូន។
តាមរយៈសារជាវីដេអូផ្ញើដល់បុគ្គលិកអប់រំ លោកគ្រូ-អ្នកគ្រូ និងសិស្សានុសិស្សនៅថ្ងៃទី ២៦ ខែធ្នូនេះ លោក ហង់ជួន ណារ៉ុន ថ្លែងថា នៅក្នុងឱកាសប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) សម័យប្រឡងថ្ងៃទី ២៧ ខែធ្នូ ឆ្នាំ ២០២១ នេះដោយបានជូនពរឱ្យបេក្ខជនទាំងអស់មានសុខភាពមាំមួន ហើយនឹងទទួលបានជោគជ័យនៅក្នុងការប្រឡង។
លោកថ្លែងថា៖ «ខ្ញុំសូមអំពាវនាវសូមឱ្យបេក្ខជនគោរពយ៉ាងម៉ឺងម៉ាត់តាមបទប្បញ្ញត្តិ ដែលក្រសួងអប់រំ យុវជន និងកីឡាបានដាក់ចេញ។ ជាពិសេសសូមទទួលទានអាហារឱ្យបានគ្រប់គ្រាន់ សម្រាក និងទទួលទានដំណេកឱ្យបានគ្រប់គ្រាន់ ក៏ដូចជាត្រៀមខ្លួនឱ្យបានល្អសម្រាប់ការប្រឡង ហើយគោរពទៅតាមបទប្បញ្ញត្តិរបស់ក្រសួងសុខាភិបាល និងក្រសួងអប់រំ ជាពិសេសគឺអនុវត្ដ ៣ កុំ និង ៣ ការពារ ដើម្បីប្រយុទ្ធប្រឆាំងនឹងជំងឺកូវីដ ១៩»។
លោក ហង់ជួន ណារ៉ុន ក៏បានជូនពរដល់លោកគ្រូ-អ្នកគ្រូទាំងអស់ដែលនឹងចូលរួមនៅក្នុងការប្រឡងសញ្ញាបត្រមធ្យមសិក្សាទុតិយភូមិ សម័យប្រឡងថ្ងៃទី ២៧ ខែធ្នូ ឆ្នាំ ២០២១ នេះ សូមឱ្យមានសុខភាពល្អ ជោគជ័យ និងគោរពតាមបទប្បញ្ញត្តិដែលក្រសួងបានដាក់ចេញ។
លោក រស់ សុវាចា អ្នកនាំពាក្យក្រសួងអប់រំបានឱ្យដឹងនៅថ្ងៃទី ២៦ ខែធ្នូដែរថា ជាទូទៅ ដំណើរការពិនិត្យឈ្មោះ លេខបន្ទប់ លេខតុ និងវាស់កម្ដៅ នៅថ្ងៃ ២៦ ធ្នូ ២០២១ បានប្រព្រឹត្តទៅដោយរលូនតាមការគ្រោងទុកសម្រាប់ការប្រឡងបាក់ឌុបនាថ្ងៃទី ២៧-២៨ ធ្នូ ២០២១។ បេក្ខជនប្រឡងបាក់ឌុបបានទៅកាន់មណ្ឌលប្រឡងរៀងៗខ្លួនកាលពីថ្ងៃទី ២៦ ធ្នូ ២០២១ ចាប់ពីម៉ោង ៩ ព្រឹក ដើម្បីពិនិត្យមើលឈ្មោះ លេខបន្ទប់ លេខតុ ស្ទង់កម្ដៅ និងទទួលស្ទីកឃ័រសុខភាពបញ្ជាក់ថា មានកម្ដៅធម្មតា។
លោកបន្តណែនាំដល់បេក្ខជនត្រូវរៀបចំទឹក ម៉ាស់ អាល់កុលលាងដៃ យកទៅមណ្ឌលប្រឡង។ កុំយកដៃសើម ដោយសារអាល់កុលលាងដៃជាដើម ប៉ះពាល់សន្លឹកកិច្ចការប្រឡងដែលអាចបណ្ដាលឱ្យមានស្លាកស្នាមលើសន្លឹកកិច្ចការក្នុងដំណើរការសំណេរ។ បន្តអនុវត្តផែនការបុគ្គលត្រៀមប្រឡងបាក់ឌុបរៀងៗខ្លួន ដើម្បីទទួលបានលទ្ធផលសមតាមការខិតខំប្រឹងប្រែង។ តាំងចិត្តឱ្យស្ងប់តាមវិធីដែលខ្លួនចូលចិត្ត ដូចជាតាមការតាំងសមាធិជាដើម។ ញ៉ាំឱ្យគ្រប់ គេងឱ្យគ្រាន់ ទឹកឱ្យក្រែល។
លោកថ្លែងថា៖ «សូមបេក្ខជនប្រឡងបាក់ឌុបថ្ងៃ ២៧-២៨ ធ្នូនេះ បន្តចូលរួមអនុវត្តគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន។ ចូលរួមប្រតិបត្តិវិធានការសុវត្ថិភាពសុខភាពជាពិសេសអនុវត្ត ៣ ការពារ ៣ កុំ ក្នុងការរក្សាសុខសុវត្ថិភាពបុគ្គល និងគ្រួសារ។ បង្កើនការប្រុងប្រយ័ត្នពេលធ្វើដំណើរតាមដងផ្លូវដោយត្រូវបន្តគោរពច្បាប់ចរាចរណ៍»។
លោក ហង់ជួន ណារ៉ុន នៅថ្ងៃទី ២៥ ធ្នូ បានដឹកនាំកិច្ចប្រជុំណែនាំបច្ចេកទេសដល់គណៈកម្មការអប្បមាទទូទាំងប្រទេស និងប្រធាន អនុប្រធានមណ្ឌលទាំងអស់ សម្រាប់ត្រៀមដំណើរការសំណេរនៃការប្រឡងបាក់ឌុបនៅថ្ងៃទី ២៧ ធ្នូ ដើម្បីណែនាំបច្ចេកទេសក្នុងដំណើរការប្រឡងដោយគោរពតាមគោលការណ៍ច្បាប់ យុត្តិធម៌ តម្លាភាព និងលទ្ធផលទទួលបាន ព្រមទាំងបង្ហាញពីវិធានការសុខភាព និងសុវត្ថិភាពសម្រាប់ការប្រឡងសញ្ញាបត្រ មធ្យមសិក្សាទុតិយភូមិ ដើម្បីចូលរួមក្នុងការទប់ស្កាត់ការរីករាលដាលនៃជំងឺកូវីដ ១៩។
លោកថ្លែងថា គណៈមេប្រយោគប្រចាំការមានតួនាទីទំនាក់ទំនងជាមួយគណៈមេប្រយោគទូទាំងប្រទេសប្រចាំមណ្ឌល រាជធានី-ខេត្ត ដើម្បីប្រមូលព័ត៌មាន ឆ្លើយតបសំណួរ និងដោះស្រាយបញ្ហាបច្ចេកទេសព្រមទាំងផ្សព្វផ្សាយព័ត៌មាននានាអំពីដំណើរការប្រឡងឱ្យទាន់ពេលវេលាតាមរយៈគេហទំព័រ និងបណ្ដាញសង្គមផ្លូវការក្រសួងអប់រំ។
អង្គភាពប្រឆាំងអំពើពុករលួយ (អ.ប.ព.) បានឱ្យដឹងថា ក្រុមការងារចំហអង្គភាពប្រឆាំងអំពើពុករលួយដែលបានចូលរួមសង្កេតការណ៍ក្នុងការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ២៧ ធ្នូ ២០២១ បានចូលរួមសង្កេតការណ៍ ដំណើរការដឹកប្រធានវិញ្ញាសាទៅកាន់រាជធានី ខេត្តកាលពីថ្ងៃទី ២៤ ខែធ្នូនេះ។
ក្រុមការងារបានចូលរួមតាំងពីដំណាក់កាលរៀបចំដឹកជញ្ជូនចេញពីក្រសួងអប់រំ យុវជន និងកីឡា (វិទ្យាស្ថានជាតិអប់រំ) រហូតដល់សាលារាជធានី ខេត្ត ដែលជាទីតាំងរក្សាទុកប្រធានវិញ្ញាសាប្រឡង។
អង្គភាពនេះបានបន្តថា ក្នុងដំណើរការនៃការដឹកជញ្ជូនប្រធានវិញ្ញាសាសរុប ៨៧៣ ហឹប អ.ប.ព. កត់សម្គាល់ឃើញថា គ្រប់ភាគីពាក់ព័ន្ធ រួមមាន គណៈមេប្រយោគទូទាំងប្រទេសប្រចាំរាជធានីខេត្ត គណៈកម្មការអប្បមាទទូទាំងប្រទេសប្រចាំរាជធានីខេត្ត អាជ្ញាធរដែនដី (អភិបាលនៃគណៈអភិបាលរាជធានី ខេត្ត, កងកម្លាំងនគរបាល, កងរាជអាវុធហត្ថ) បានយកចិត្តទុកដាក់ខ្ពស់ អនុវត្តតួនាទី ភារកិច្ចរបស់ខ្លួនលើកិច្ចការនេះ ស្របទៅតាមបទប្បញ្ញត្តិពាក់ព័ន្ធ។
អ.ប.ព ថា៖ «នៅក្នុងដំណើរការនៃការរៀបចំប្រគល់ទទួល និងដឹកជញ្ជូនហឹបវិញ្ញាសាចេញពីវិទ្យាស្ថានជាតិអប់រំ គឺមានការចូលរួមពិនិត្យយ៉ាងហ្មត់ចត់លើស្រោមវិញ្ញាសាដែលបានបិទជិតយ៉ាងគត់មត់មិនមានការរហែក ផ្ទៀងផ្ទាត់ចំនួនយ៉ាងត្រឹមត្រូវ រួចទើបបញ្ចូលទៅក្នុងហឹបប្រធានវិញ្ញាសា និងចាក់សោដោយបិទភ្ជិតក្រដាស (Sceller) លើរន្ធសោទើបដាក់បញ្ចូលទៅក្នុងរថយន្ត ដឹកជញ្ជូនទៅកាន់គោលដៅ»។
បើតាមក្រសួងអប់រំ ការប្រឡងសញ្ញាបត្រមធ្យមសិក្សាទុតិយភូមិឆ្នាំ ២០២១ នេះមានមណ្ឌលប្រឡងសរុប ២០៤ មណ្ឌល ត្រូវជា ៤ ៦១៦ បន្ទប់ បេក្ខជនចុះឈ្មោះប្រឡងសរុប ១១៤ ១៨៣ នាក់ ស្រី ៦០ ៣៩៧ នាក់ គណៈមេប្រយោគ និងគណៈកម្មការនានាចូលរួមក្នុងដំណើរការប្រឡងមានចំនួន ៣១ ៤៣២ នាក់៕
