.jpg)
លោក ខឹម មុនីកុសល ត្រូវបានបណ្តេញចេញពីក្របខ័ណ្ឌមន្ត្រីសុខាភិបាល។ រូប ហ្វេសប៊ុក
ប៉ៃលិនៈ ក្រសួងមុខងារសាធារណៈ បានបង្កើតក្រុមការងារអន្តរក្រសួង ដើម្បីស៊ើបអង្កេតករណីបណ្តេញមន្ត្រីសុខាភិបាលខេត្តប៉ៃលិនម្នាក់ ចេញពីក្របខ័ណ្ឌការងារ ក្រោយទទួលពាក្យបណ្តឹងពីសាមីខ្លួន ដែលមិនសុខចិត្តនឹងសេចក្តីសម្រេចរបស់គណៈកម្មាធិការសម្រុះសម្រួលថ្នាក់ខេត្ត។
សេចក្តីសម្រេចចុះហត្ថលេខាដោយលោក ព្រុំ សុខា រដ្ឋមន្ត្រីក្រសួងមុខងារសាធារណៈចុះថ្ងៃទី ២៣ ធ្នូ បានសម្រេចបង្កើតក្រុមការងារអន្តរក្រសួង ដោយមានសមាសភាព ១៧ រូប មកពីក្រសួង ៣ គឺក្រសួងសុខាភិបាល ក្រសួងមហាផ្ទៃ និងក្រសួងមុខងារសាធារណៈ។ ក្រុមការងារអន្តរក្រសួងនេះនឹងមានភារកិច្ចស្រាវជ្រាវ និងលើកយោបល់ករណីបណ្តឹងតវ៉ារបស់លោក ខឹម មុនីកុសល អតីតមន្ត្រីមន្ទីរសុខាភិបាលនៃរដ្ឋបាលខេត្តប៉ៃលិន និងភារកិច្ចក្នុងការចុះអង្កេតស្រាវជ្រាវនៅមន្ទីរសុខាភិបាលរដ្ឋបាលខេត្តប៉ៃលិន និងអង្គភាពពាក់ព័ន្ធ។
សេចក្តីសម្រេចបញ្ជាក់ថា៖ «ក្រៅពីនេះក្រុមការងារ អន្តរក្រសួង ក៏មានសិទ្ធិអាចអញ្ជើញរដ្ឋបាលខេត្ត និងមន្ត្រីពាក់ព័ន្ធនៅក្នុងខេត្តប៉ៃលិនទាំងមូល ចូលរួមកិច្ចប្រជុំមកបំភ្លឺតាមការចាំបាច់ ដោយធ្វើរបាយការណ៍លទ្ធផល និងលើកយោបល់ជូនរដ្ឋមន្ត្រីក្រសួងមុខងារសាធារណៈពិនិត្យសម្រេចផងដែរ»។
បន្ថែមពីនេះ សេចក្តីសម្រេចក៏បានតម្រូវឱ្យសមាជិកក្រុមការងារអន្តរក្រសួងទាំងអស់ត្រូវចូលរួមប្រជុំតាមការអញ្ជើញរបស់ប្រធានក្រុមការងារ។
កាលពីខែឧសភា លោក ខឹម មុនីកុសល ជាគ្រូពេទ្យដែលត្រូវបានបណ្តេញចេញពីក្របខ័ណ្ឌ ក្រោមហេតុផលបានប្រព្រឹត្តកំហុសក្នុងពេលបំពេញការងារ បានដាក់ពាក្យបណ្តឹងទៅរដ្ឋមន្ត្រីក្រសួងមុខងារសាធារណៈ ដើម្បីស្នើឱ្យស្ថាប័នមួយនេះ ជួយរកយុត្តិធម៌ និងអន្តរាគមន៍ឱ្យលោកបានចូលបម្រើការងារក្នុងក្របខ័ណ្ឌមន្ត្រីសុខាភិបាលឡើងវិញ។
បើតាមពាក្យបណ្តឹងនេះ លោក ខឹម មុនីកុសល ថ្លែងថា លោកនៅតែមិនសុខចិត្ត នឹងការសម្រេចរបស់គណៈកម្មាធិការសម្រុះសម្រួលទំនាស់ពាក់ព័ន្ធនឹងកិច្ចការមុខងារសាធារណៈខេត្តប៉ៃលិន ដែលបានរក្សាសេចក្តីសម្រេចបញ្ឈប់រូបលោកចេញពីក្របខ័ណ្ឌ។
លោក មុនី កុសល បញ្ជាក់ថា៖ «ខ្ញុំបានប្តឹងជំទាស់ជាយូរមកហើយ តែទើបតែឃើញពេលនេះ មានការបង្កើតក្រុមការងារនេះឡើង ដែលវាជារឿងចម្លែកដែរ។ តែទោះយ៉ាងណាក៏ដំណឹងនេះ ជារឿងល្អមួយចំពោះខ្ញុំដើម្បីទទួលបានដំណោះស្រាយមួយ។ ខ្ញុំមិនដឹងការដោះស្រាយទៅមុខរលូនកម្រិតណានោះទេ ប៉ុន្តែខ្ញុំ ចង់បានឱ្យមានការដោះស្រាយមួយដែលយើងគោរពទៅតាមលក្ខខណ្ឌច្បាប់ត្រឹមត្រូវ»។ លោក មុនីកុសល នៅតែចាត់ទុកការដកតំណែងរូបលោកនេះ គឺបានធ្វើឱ្យប៉ះពាល់ទៅដល់ទឹកចិត្តមន្ត្រីរាជការដទៃទៀត ដែលកំពុងបំពេញភារកិច្ច មិនឱ្យហ៊ាននិយាយពីអ្វីដែលជាការពិត និងធ្វើការបញ្ចេញមតិដើម្បីការរីកចម្រើនរបស់ស្ថាប័ន។
លោក អ៊ុន ប៊ុនលី នាយករដ្ឋបាល សាលាខេត្តប៉ៃលិន ប្រាប់ភ្នំពេញប៉ុស្តិ៍នៅទី ២៦ ធ្នូថា រដ្ឋបាលខេត្តមិនមានអ្វីបកស្រាយច្រើននោះទេ ព្រោះតែថ្នាក់ខេត្ត បានធ្វើទៅតាមនីតិវិធី និងបែបបទរួចអស់ហើយ។ ជាមួយនឹងការប្តឹងជំទាស់ និងចំណាត់ការបន្តរបស់ក្រសួងគឺជាតួនាទីរបស់ថ្នាក់ជាតិ។
លោកបញ្ជាក់ថា៖ «យើងបើកសិទ្ធិឱ្យគាត់ប្តឹងទៅក្រសួងមុខងារសាធារណៈ បើមិនពេញចិត្តនឹងសេចក្តីសម្រេចរបស់គណៈកម្មាធិការ។ ជារួម កំហុសរបស់គាត់ គឺមិនមែនមានទើបតែលើកហ្នឹងទេ គឺមានកំហុសជាយូរមកហើយ ដែលរដ្ឋបាលខេត្ត មានអំណះអំណាងពិតប្រាកដចំពោះកំហុសឆ្គងរបស់គាត់។ ដូច្នេះ ខ្ញុំ គ្មានអ្វីនិយាយច្រើនទៀតទេ»។
កាលពីថ្ងៃទី ១៩ មីនា លោកស្រី បាន ស្រីមុំ អភិបាលខេត្តប៉ៃលិនបានចេញលិខិតបណ្ដេញលោក ខឹម មុនីកុសល ចេញពីក្របខ័ណ្ឌរដ្ឋ ដោយសំអាងថា លោកបានប្រព្រឹត្តកំហុស និងការឆ្គាំឆ្គងក្នុងវិជ្ជាជីវៈ។ ការបណ្តេញនេះព្រោះតែលោកបានបង្ហោះសារលើហ្វេសប៊ុក រិះគន់មន្ត្រីស្ថាប័នពាក់ព័ន្ធដែលចុះប្រចាំការនៅមណ្ឌលចត្តាឡីស័ក នៅមន្ទីរបក្សខេត្តប៉ៃលិន មិនជួយធ្វើការងារគ្រូពេទ្យខ្លះនោះទេ ហើយគិតតែពីនាំគ្នាអង្គុយលេងតែ Facebook ក្នុងតង់ និងថតរូបបង្ហោះបង្អួតគេឯង៕
វីដេអូ៖
