.jpg)
មន្ត្រីពិនិត្យកូនឈើនៅ ស្ថានីយ៍ស្រាវជ្រាវព្រៃឈើជីខលើស្ថិតនៅឃុំជីខលើ ស្រុកស្រែអំបិល។ រូបថត រដ្ឋបាលខេត្តកោះកុង
កោះកុងៈ អាជ្ញាធរខេត្តកោះកុងបានសម្ពោធដាក់ឲ្យប្រើប្រាស់អគារស្ថានីយ៍ស្រាវជ្រាវព្រៃឈើជីខលើស្ថិតនៅឃុំជីខលើ ស្រុកស្រែអំបិល ជាផ្លូវការនៅថ្ងៃទី ២៧ ខែធ្នូ ដែលការសាងសង់អគារនេះស្ថិតក្រោមជំនួយឧបត្ថម្ភឥតសំណងរបស់ធនាគាអភិវឌ្ឍន៍អាស៊ី តាមរយៈគម្រោងរបៀងអភិរក្សជីវៈចម្រុះមហាអនុតំបន់ទន្លេមេគង្គកម្ពុជា។
លោក អ៊ុក ភ័ក្ត្រា អភិបាលរងខេត្តកោះកុងថ្លែងនៅថ្ងៃទី ២៧ ខែធ្នូនេះថា ការសាងសង់ អគារស្ថានីយ៍ស្រាវជ្រាវព្រៃឈើជីខ គឺក្នុងគោលបំណងរៀបចំឲ្យមានប្រព័ន្ធ អេកូឡូស៊ីព្រៃឈើមួយដែលធន់ទៅនឹងការប្រែប្រួលអាកាសធាតុប្រកបដោយនិរន្តរភាព។លោកថា តាមរយៈ គម្រោងជំនួយរបស់ ADB នេះទៀតសោតក៏អាចផ្តល់ការងារ និងប្រាក់ចំណូលដល់ប្រជាសហគមន៍នៃរបៀងអភិរក្សជីវៈចម្រុះផងដែរ។
លោកថ្លែងថា៖«គម្រោងនេះបានអនុវត្តការដាំស្តារឡើងវិញក្នុងដែនជម្រកសត្វព្រៃ និងដីព្រៃរិចរិលតាមរយៈការដាំកូនឈើ និងការថែរក្សាដំណាំធម្មជាតិ ធ្វើឱ្យប្រសើរឡើងវិញនូវជីវភាពរស់នៅ និងបង្កើនប្រាក់ចំណូលតាមរយៈការផ្តល់ មូលនិធិអភិវឌ្ឍន៍ភូមិ និងការផ្តល់ហេដ្ឋារចនាសម្ព័ន្ធខ្នាតតូច និង បង្កើតការងាររយៈពេលខ្លីដល់គ្រួសារក្នុងសហគមន៍តាមរយៈការអនុវត្តសកម្មភាពគម្រោង»។
លោកអភិបាលរងខេត្តរូបនេះ បញ្ជាក់ថា គម្រោងនេះបានផ្ដោតជាសំខាន់ទៅលើ ការផ្ដល់សិទ្ធអំណាចដល់សហគមន៍ក្នុងការគ្រប់គ្រងធនធានព្រៃឈើ តាមរយៈការ កំណត់ព្រំប្រទល់ ការរៀបចំផែនការគ្រប់គ្រងព្រៃឈើ និងការទទួលស្គាល់ស្របច្បាប់អំពីដំណើរការបង្កើតសហគមន៍តំបន់ការពារធម្មជាតិ និងសហគមន៍ព្រៃឈើផងដែរ។
លោក ស៊ុន ឃាង មេឃុំជីខលើ ថ្លែងនៅថ្ងៃទី ២៧ ខែធ្នូថា ស្ថាននីយ៍ស្រាវជ្រាវព្រៃឈើនេះបង្កើតឡើងសម្រាប់សិស្សនិស្សិតមកធ្វើការសិក្សាស្រាវជ្រាវព្រៃឈើ ហើយអាជ្ញាធរបានត្រៀមដីចំនួនប្រមាណជាង ២ហិកតាសម្រាប់ជាកន្លែងដកពិសោធន៍ក្នុងការដាំដុះកូនឈើ។
លោកបន្តថា ស្ថាននីយ៍ស្រាវជ្រាវព្រៃឈើជីខលើ បូករួមជាមួយនឹងគម្រោងរបៀងអភិរក្សជីវៈចម្រុះរបស់ធនាគារអភិវឌ្ឍន៍អាស៊ី បានគាំទ្រសហគមន៍គោលដៅចំនួនពីនៅក្នុងឃុំជីខលើ គឺសហគមនតំបន់ការពារធម្មជាតិ និងសហគមន៍ព្រៃឈើសាមគ្គីព្រែកជីក។ ប្រជាសហគមន៍ប្រមាណជាង ៥០០គ្រួសារក្នុងឃុំជីខលើ ទទួលបានប្រយោជន៍ជាច្រើនតាមរយៈគម្រោងរបៀងអភិរក្សជីវៈចម្រុះនេះ ។
លោកថ្លែងថា ៖«ផ្ទៃដីជាង២ហិកតាហ្នឹងពេលគាត់ទៅថែទាំកូនឈើហ្នឹងគឺយើងជួលគាត់គិតកម្រៃជាថ្ងៃ ឬម៉ោងឲ្យគាត់អ៊ីចឹងទៅ។ តាមរយៈគម្រោងហ្នឹងឥឡូវយើងដំណើរការបានច្រើន យើងទទួលបានស្នាក់ការសហគមន៍ចំនួន២ ទទួលបានបង្គន់អនាម័យ អណ្តូងស្នប់ អណ្តូងលូ បានប្រព័ន្ធសម្រាប់ស្រោចស្រប់ដំណាំជាដើមគឺមានច្រើនតាមរយៈគម្រោងហ្នឹង ហើយស្ថានីយ៍មួយហ្នឹងគឺផ្តល់ប្រយោជន៍ច្រើនមែនទែន» ។
លោក ស៊ុន ឃាង បន្តទៀតថា គម្រោងរបៀងអភិរក្សជីវៈចម្រុះនេះបានអនុវត្តរយៈពេល១០ឆ្នាំមកហើយ ដែលធ្វើឲ្យពលរដ្ឋទទួលបានសមិទ្ធិផលច្រើនក្នុងនោះក៏មានផ្ទៃដីសហគមន៍តំបន់ការពារធនធានធម្មជាតិ ៥៥០ហិកតា និងសហគមន៍សាមគ្គីព្រែកជីកជាង៣០០ហិកតាទៀត ដែលក្រុមបណ្តាញប្រជាសហគមន៍អាចដាំទទួលកូនឈើប្រណិត ឬឈើហូបផ្លែផ្សេងៗទៅដាំបាន។
លោកមេឃុំប្រាប់ថា គម្រោងនេះនឹងបញ្ចប់នៅថ្ងៃទី ៣០ ខែធ្នូ ឆ្នាំ ២០២១នេះ ហេតុនេះលោកមានការព្រួយបារម្ភខ្លាចមិនអាចគ្រប់គ្រងការងារបានល្អព្រោះ កន្លងមកតាមរយៈគម្រោងរបស់ ADB គឺមានការជួយជ្រោមជ្រែងទាំងលក្ខណៈបច្ចេកទេស ទាំងការគ្រប់គ្រង និងមានអង្គការផ្សេងៗចូលរួមសម្របសម្រួលក្នុងកិច្ចការងារបានរលូនល្អ។
លោកថ្លែងថា ៖«អ្វីដែលខ្ញុំបារម្ភហ្នឹងដោយសារតែគម្រោងរបៀងហ្នឹងគាត់បញ្ចប់ បើបញ្ចប់គម្រោងអ៊ីចឹងទៅការងារហ្នឹងវានៅលើឃុំទាំងស្រុង ខ្ញុំចេះតែបារម្ភខ្លាចគ្រប់គ្រងការងារហ្នឹងអត់បានល្អ ចង់ស្វែងរកដៃគូរទៀតដើម្បីជួយបច្ចេកទេសក្នុងការងារហ្នឹង» ៕
