ភ្នំពេញៈ នៅក្នុងកិច្ចប្រជុំអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ «ក.ប.ប» នៅថ្ងៃទី ២៧ ធ្នូ មន្ត្រីមួយចំនួនបានលើកឡើងពីបញ្ហាប្រឈមមួយចំនួន ដូចជាខ្វះថវិកា និងឧបករណ៍ត្រួតពិនិត្យទំនិញ នៅពេលចុះបំពេញការងារ។
កិច្ចប្រជុំនេះធ្វើឡើងដើម្បីបូកសរុបលទ្ធផលការងារប្រចាំខែធ្នូ ឆ្នាំ ២០២១ និងដើម្បីស្ដាប់នូវរាល់បញ្ហាប្រឈមនានាដែលបានកើតមានឡើងក្នុងពេលអនុវត្តការងារកន្លងមក និងលើកទិសដៅដើម្បីដោះស្រាយ។
លោក ផាន អូន ប្រតិភូរាជរដ្ឋាភិបាល ទទួលបន្ទុកជាអគ្គនាយកនៃអគ្គនាយកដ្ឋាន ក.ប.ប ថ្លែងថា តាមរយៈកិច្ចប្រជុំនេះ មានមន្ត្រី សាខា ក.ប.ប មួយចំនួនបានលើកឡើងពីបញ្ហាប្រឈមខ្វះថវិកា និងឧបករណ៍ នៅពេលចុះអនុវត្តការងារ។
លោកថា៖ «ការពិតយើងមានសន្និបាតរួចហើយ ប៉ុន្តែខ្ញុំមានយន្តការមួយពិនិត្យឡើងវិញ នៅក្នុងសភាពការណ៍នៅចុងខែធ្នូ ថាការអនុវត្តច្បាប់មានបញ្ហាប្រឈមអ្វីខ្លះ ដូចជាកង្វះខាតនៃថវិកាសម្រាប់អាជ្ញាធរមូលដ្ឋាន ថាយើងត្រូវដោះស្រាយយ៉ាងម៉េច ខ្វះខាតសម្ភារ ជាឧបករណ៍ក្នុងការអនុវត្ត ដូចជា ឧបករណ៍រង្វាស់រង្វាល់នៅតាមបណ្តាស្ថានីយ និងបញ្ហាផ្សេងៗទៀត ទាំងការយល់ដឹង»។
លោកឱ្យដឹងថា បើផ្អែកតាមការរាយការណ៍ពីមន្ត្រីសាខា ក.ប.ប តាមបណ្តាខេត្ត ការរកស៊ីអំពើមិនសុចរិត ការអនុវត្តទុច្ចរិត ឃើញមានការកាត់បន្ថយបានច្រើន បន្ទាប់ពីមន្ត្រីជំនាញបានផ្សព្វផ្សាយ និងចុះត្រួតពិនិត្យគុណភាពទំនិញ។
លោកថា៖ «គាត់ (អ្នកប្រកបរបររកស៊ី) មានការចូលរួមច្រើន ទាំងផ្នែកសុវត្ថិភាពម្ហូបអាហារ ទាំងផ្នែកកិច្ចការពារអ្នកប្រើប្រាស់ និងការប្រកួតប្រជែងដោយស្មោះត្រង់»។
មន្ត្រីជំនាញ ក.ប.ប សាខាខេត្តព្រៃវែងលោក អ៊ុត សុភាព បានប្រាប់ភ្នំពេញប៉ុស្តិ៍ថា មុខព្រួញត្រូវទៅត្រួតពិនិត្យនៅតាមស្ថានីយប្រេងគឺពាក់ព័ន្ធតម្លៃ គុណភាពប្រេង ហើយនិងបរិមាណ។
លោកបញ្ជាក់ថា៖ «យើងបង្ក្រាបបាន ១៤៥ ស្ថានីយក្នុងរយៈពេល ២ ខែចុងក្រោយនេះ ក្នុងនោះផាកពិន័យអន្តរកាលបានជាង ១១០ ករណីដែលរកស៊ីមិនសុចរិតជាមួយប្រជាពលរដ្ឋ ព្រោះយើងធ្វើដើម្បីដាស់តឿនគាត់ ឱ្យទៅរកផ្លូវល្អជាមួយពលរដ្ឋ កុំឱ្យកិបកេងលីត្រប្រេង»។
លោកថា បញ្ហាប្រឈមរបស់មន្ត្រីជំនាញនាពេលបច្ចុប្បន្នគឺកង្វះឧបករណ៍ និងថវិកា នៅពេលចុះអនុវត្តការងារម្តងៗ។ «ឧបករណ៍ខ្វះស្រាប់ហើយសំខាន់ថវិកាខ្វះដែរព្រោះអីយើងចុះបេសកកម្មយើងស្រាក់គ្នាហូបបាយ ពេលខ្លះកន្លែងគេងអត់មាន ត្រូវជួលអូតែល វាមានផលវិបាកដែរ»៕