ភ្នំពេញៈ រដ្ឋមន្ត្រីក្រសួងប្រៃសណីយ៍ និងទូរគមនាគមន៍ លោក ជា វ៉ាន់ដេត បានអះអាងថា ក្រសួងកំពុងបំពាក់ឧបករណ៍ចល័តវាស់ស្ទង់គុណភាពសេវាទូរស័ព្ទនៅរាជធានីភ្នំពេញពិសេសតាមបុរី ដើម្បីលើកកម្ពស់គុណភាពសេវាទូរគមនាគមន៍ឱ្យកាន់តែប្រសើរ ខណៈនៅតាមតំបន់ខ្លះកំពុងមានភាពរអាក់រអួល។
ការអះអាងដូចនេះធ្វើឡើងក្នុងពេលលោកជួបសំណេះសំណាលជាមួយពលរដ្ឋរស់នៅក្នុងបុរីប៉េងហួតបឹងស្នោ និងប្រតិបត្តិករផ្តល់សេវាទូរស័ព្ទចល័ត និងអ៊ីនធឺណិតនៅសង្កាត់និរោធ ខណ្ឌច្បារអំពៅ រាជធានីភ្នំពេញកាលពីថ្ងៃទី ២៥ ខែធ្នូ ដោយមានការចូលរួមពីផ្នែកពាក់ព័ន្ធ និងក្រុមការងារពង្រឹងគុណភាពនៅតាមបុរីទាំង ៨ ក្រុមរបស់ក្រសួងផងដែរ។
ក្នុងឱកាសនោះ លោក ជា វ៉ាន់ដេត បានថ្លែងថា ការជួបប្រទះបញ្ហាប្រឈមទាក់ទងនឹងសេវាទូរស័ព្ទចល័តបានធ្វើឱ្យប៉ះពាល់ដល់ការធ្វើការ ប្រកបអាជីវកម្ម ក៏ដូចជា ការសិក្សាក្នុងអំឡុងពេលកូវីដ ១៩។ លោកថា៖ «បញ្ហាគុណភាពសេវានេះមានជាច្រើនឆ្នាំមកហើយ ជាពិសេសនៅពេលមានកំណើនលំនៅឋាន និងប្រជាពលរដ្ឋ»។
លោកបន្តថា ក្រសួងប្រៃសណីយ៍ និងទូរគមនាគមន៍បាន និងកំពុងបំពាក់ឧបករណ៍ចល័តវាស់ស្ទង់គុណភាពសេវា ដោយបង្កើតក្រុមការងារដោះស្រាយបញ្ហាផ្ទាល់នៅតាមបុរី និងសហការជាមួយម្ចាស់បុរី ព្រមទាំងប្រតិបត្តិករទូរគមនាគមន៍ ដោយចុះដោះស្រាយបញ្ហាប្រឈមជាក់ស្ដែងនីមួយៗ ដើម្បីបង្កើនប្រសិទ្ធភាពឱ្យប្រសើរ។ ក្នុងនោះក្រុមការងារ នឹងសាងសង់បង្គោលអង់តែនបន្ថែម ហើយត្រូវមានប្រតិបត្តិករចំនួន ៣ ប្រើប្រាស់រួមគ្នាលើបង្គោលមួយដែលមានទម្រង់ជាដើមឈើប្រកបដោយសោភណភាព។
លោកបានបញ្ជាក់ថា៖ «ខ្ញុំសន្យាថានឹងត្រឡប់មកទីតាំងដដែលនេះវិញក្នុងរយៈពេល ៣ ខែក្រោយ ដើម្បីពិនិត្យមើលគុណភាពសេវាអ៊ីនធឺណិត និងសេវាទូរស័ព្ទទាំងអស់ហើយប្រសិនបើពុំមានការកែលម្អគុណភាពសេវាទាំងអស់នេះទេ ក្រសួងនឹងចាត់វិធានការតាមផ្លូវច្បាប់»។
ពលរដ្ឋម្នាក់នៅក្នុងបុរីប៉េងហួត បឹងស្នោ លោក សុធារ៉ា អាយុ ៣៥ ឆ្នាំ ជាបុគ្គលិកក្រុមហ៊ុនឯកជន និងបានមករស់នៅទីនោះតាំងពីឆ្នាំ ២០១៨ មក បានឱ្យដឹងថា បច្ចុប្បន្នលោកបានប្រើប្រាស់ប្រព័ន្ធទូរស័ព្ទ ២ ខ្សែ cellcard និង smart ក៏ប៉ុន្តែសេវាបច្ចុប្បន្នមានភាពរអាក់រអួល។
លោកបន្តថា៖ «សេវា និងអ៊ីនធឺណិតទូរស័ព្ទនៅតំបន់នេះ កាលពីមុនដំណើរការបានគួរសម តែក្រោយមកបែរជារអាក់រអួល និងមិនដំណើរការក្រោយពលរដ្ឋកាន់តែច្រើនផ្លាស់មករស់នៅតំបន់នេះ»។
លោកបន្តទៀតថា ដោយសារបញ្ហាសេវាទូរស័ព្ទមិនសូវល្អ មានម្ចាស់ផ្ទះមួយចំនួន ប្រើប្រាស់ប្រព័ន្ធស្រូបទាញសេវាទូរស័ព្ទដែលធ្វើឱ្យអ្នកមិនមានប្រើឧបករណ៍នេះប្រើ រឹតតែជួបការលំបាកហើយតម្រូវឱ្យភ្ជាប់សេវា wifi។
លោកបានឱ្យដឹងដែរថា ម្យ៉ាងទៀតទីតាំងដែលលោករស់នៅមានក្រុមហ៊ុនអ៊ីនធឺណិតមួយ ដែលកំពុងផ្តល់សេវាផ្តាច់មុខ ហើយមានតម្លៃថ្លៃ បើធៀបនឹងក្រុមហ៊ុនអ៊ីនធឺណិតដទៃទៀត ដែលធ្វើឱ្យការចំណាយកាន់តែច្រើន។
ក៏ប៉ុន្តែលោកថា ក្រោយទទួលបានដំណឹងពីការដំឡើងអង់តែនសេវាទូរស័ព្ទបន្ថែម ឬការពង្រឹងប្រព័ន្ធសេវាទូរស័ព្ទក្នុងបុរី លោកពិតជាសប្បាយចិត្ត ប៉ុន្តែក៏មិនមានជឿថាវានឹងប្រសើរឡើង ១០០% នោះទេ។
មិនខុសពីអ្នករស់នៅបុរីប៉េងហួតបឹងស្នោប៉ុន្មានទេ លោក ខេមរិន ដែលរស់នៅបុរីពិភពថ្មីកួរស្រូវ២ ខណ្ឌដង្កោ រាជធានីភ្នំពេញ ក៏បានលើកឡើងស្រដៀងគ្នាដែរ ទាក់ទងសេវាទូរស័ព្ទក្នុងបុរី។ លោកថា៖ «ស្ទើរគ្រប់សេវាទូរស័ព្ទគឺខ្សោយទាំងអស់ បើតេចូលបាន ចេញបាន ប៉ុន្តែថ្ងៃខ្លះអត់មានសេវាទេ រីឯអ៊ីនធឺណិតវិញ ប្រើអត់បានទេ នៅនេះបើអ្នកមានលុយគេភ្ជាប់ Wifi ប៉ុន្តែខ្ញុំអត់ទាន់ភ្ជាប់ទេ អ៊ីចឹងជួបការលំបាកខ្លះ ហើយអ្វីដែលកាន់តែលំបាកទៀតនោះនៅពេលរីករាលដាលនៃជំងឺកូវីដ ១៩ ខ្លាំង ខាងក្រុមហ៊ុនគេតម្រូវឱ្យធ្វើការពីផ្ទះ ដូច្នេះខ្ញុំទៅធ្វើការនៅហាងកាហ្វេក្បែរផ្ទះក្នុងបុរីទើបមាន wifi ប្រើ»។
អនុរដ្ឋលេខាធិការក្រសួងប្រៃសណីយ៍ និងទូរគមនាគមន៍លោក លីវ សុផាណារិទ្ធ បានប្រាប់ភ្នំពេញប៉ុស្តិ៍បន្ថែមថា មូលហេតុដែលក្នុងបុរីពុំសូវមានសេវា ដោយសារមានកត្តាមួយចំនួន និងផ្អែកតាមទីតាំងបុរីនីមួយៗ។
លោកថា៖ «ដោយសារបុរីមួយចំនួនឱ្យសិទ្ធិផ្តាច់មុខទៅក្រុមហ៊ុនអ៊ីនធឺណិតណាមួយផ្គត់ផ្គង់ក្នុងបុរីនោះ អ៊ីចឹងប្រជាពលរដ្ឋដែលរស់នៅក្នុងបុរីពុំសូវមានជម្រើសច្រើនក៏ដូចគ្នានេះដែរ ក្រុមហ៊ុនទូរស័ព្ទខ្លះមិនអាចរៀបចំឱ្យមានបង្គោលអង់តែននៅក្នុងទីតាំងបុរីបានទេមានតែដំឡើងនៅជិតៗនោះដែលធ្វើឱ្យគាត់មិនអាចផ្តល់សេវាទូរស័ព្ទ មិនមានគុណភាព»។
យ៉ាងណាក៏ដោយ លោកថា ដើម្បីដោះស្រាយបញ្ហាប្រឈមរបស់ពលរដ្ឋរស់នៅក្នុងបុរី បច្ចុប្បន្នក្រុមការងារជំនាញនៃក្រសួងប្រៃសណីយ៍កំពុងរៀបចំ និងបំពាក់ឧបករណ៍វាស់ស្ទង់គុណភាពសេវា នៅតាមបុរីក្នុងរាជធានីភ្នំពេញតាមដំណាក់កាល ដើម្បីលើកកម្ពស់គុណភាពសេវាទូរគមនាគមន៍៕
វីដេអូ៖