.jpg)
ទិដ្ឋភាពទីតាំងស្រែអំបិលក្នុងខេត្តកំពតកាលពីថ្ងៃ ២៦ ធ្នូ។ រូបថត FN
កំពតៈ ប្រជាពលរដ្ឋក្រុមសាមគ្គីផលិតអំបិលនៅមណ្ឌលបឹងទូក ស្ថិតក្នុងភូមិទទឹងថ្ងៃ ឃុំបឹងទូក ស្រុកទឹកឈូ ខេត្តកំពតចំនួន ៦ ក្រុម បានដាក់លិខិតជូនទៅលោកនាយករដ្ឋមន្ត្រី ហ៊ុន សែន សុំអន្តរាគមន៍ឱ្យអាជ្ញាធរខេត្តកំពតផ្តល់វិញ្ញាបនបត្រសម្គាល់ម្ចាស់អចលនវត្ថុដល់ក្រុមខ្លួនចំនួន ២៤ ហិកតា។
តាមលិខិតរបស់ប្រជាពលរដ្ឋដែលភ្នំពេញប៉ុស្តិ៍ទទួលបាននៅថ្ងៃទី ២៧ ខែធ្នូ បានឱ្យដឹងថា ប្រជាពលរដ្ឋ ២១ នាក់ ផ្តិតមេដៃធ្វើលិខិតជូនទៅលោកនាយករដ្ឋមន្ត្រី ដើម្បីស្នើសុំអន្តរាគមន៍ឱ្យអាជ្ញាធរខេត្តកំពតផ្តល់វិញ្ញាបនបត្រសម្គាល់អចលនវត្ថុឱ្យក្រុមសាមគ្គីផលិតអំបិលនៅមណ្ឌលបឹងទូកក្នុងឃុំបឹងទូក ស្រុកទឹកឈូ ខេត្តកំពតចំនួន ៦ ក្រុម មានផ្ទៃដី ២៤ ហិកតា ស្របតាម សជណ របស់ទីស្តីការគណៈរដ្ឋមន្ត្រី។
ក្នុងលិខិតសរសេរថា «មានតែសម្តេចទេ ដែលអាចរកយុត្តិធម៌ សម្រាប់ក្រុមសាមគ្គីផលិតអំបិលបាននិងធានាឱ្យបាននូវការគោរពអនុវត្តឱ្យបានត្រឹមត្រូវនូវលិខិតលេខៈ ១៤៣២ ស.ជ.ណ ចុះថ្ងៃទី ៨ ខែកញ្ញា ឆ្នាំ ២០០៦ របស់ទីស្ដីការគណៈរដ្ឋមន្ត្រី និងលិខិតបទដ្ឋានផ្សេងៗរបស់ក្រសួងពាក់ព័ន្ធ និងមិនឱ្យជនខិលខូចមានអំណាចហ៊ានប្រើឥទ្ធិពលរំលោភបំពានយកដី ស.ជ.ណ ដោយមិនខ្លាចញញើតច្បាប់បាន»។
ក្រុមប្រជាពលរដ្ឋបានលើកឡើងថា ទីស្តីការគណៈរដ្ឋមន្ត្រីបានចេញលិខិតលេខ ១៤៣២ សជណ ចុះថ្ងៃទី ៨ ខែកញ្ញា ឆ្នាំ ២០០៦ សម្រេចប្រគល់សិទ្ធិជូនប្រជាជនក្រុមសាមគ្គីផលិតអំបិលចំនួន ៧១ ក្រុម ក្នុងនោះមណ្ឌលបឹងទូកចំនួន ៦ ក្រុមទទួលបានមួយក្រុម ៤ ហិកតា សរុបទាំងអស់ ២៤ ហិកតា។
នៅឆ្នាំ ២០០៧ មន្ទីរឧស្សាហកម្ម រ៉ែ និងថាមពលខេត្តកំពត បានចុះវាស់វែង និងចេញប្លង់បង្ហាញទីតាំង និងទំហំដីឱ្យក្រុមសាមគ្គីផលិតអំបិលមណ្ឌលបឹងទូក ប៉ុន្តែពេលក្រុមការងាររបស់មន្ទីរឧស្សាហកម្ម រ៉ែ និងថាមពល ចុះវាស់វែងនោះ ស្របពេលដែលមានទឹកជោរឡើងខ្លាំងធ្វើឱ្យក្រុមការងារពិបាកដើរលុយទឹក និងមិនអាចចុះទៅវាស់ដល់ព្រំខាងចុងដីជាប់សមុទ្រ ដូច្នេះទំហំដីក្នុងប្លង់បង្ហាញទីតាំងដីបានត្រឹម ២២,០៩ ហិកតា ដែលផ្ទៃដីនេះខុសពីផ្ទៃដីតាម សជណ របស់ទីស្តីការគណៈរដ្ឋមន្ត្រីដែលបានប្រគល់មកឱ្យប្រជាពលរដ្ឋ។
ប្រជាពលរដ្ឋបញ្ជាក់ថា៖ «ពេលនោះក្រុមការងារបានបញ្ជាក់ថា មិនបាច់វាស់ដល់ចំណុចព្រំខាងចុងជាប់សមុទ្រទេ ព្រោះដីនោះជាដីដែលក្រុមសាមគ្គីបានកាន់កាប់ និងជាផ្លូវទឹកសម្រាប់បង្ហូរទឹកសមុទ្រចូលស្រែអំបិល ម្យ៉ាងដីនេះ រដ្ឋាភិបាលបានប្រគល់ឱ្យក្រុមសាមគ្គីហើយ មិនមានអ្នកណាមានសិទ្ធិយកនោះទេ»។
យ៉ាងណាក្ដី ស្រាប់តែនៅឆ្នាំ ២០២០ មានបុគ្គលឈ្មោះ គង់ សំណាង និងបក្ខពួកដែលមានអំណាច និងឥទ្ធិពលបានយកសាឡង់មកបូមខ្សាច់លុបអាងស្តុកទឹកសម្រាប់ផលិតអំបិលរបស់ក្រុមសាមគ្គីដែលកំពុងធ្វើរាល់ថ្ងៃ ក្នុងគោលបំណងបំពានយកដែលធ្វើឱ្យមានការរាំងស្ទះ និងប៉ះពាល់ធ្ងន់ធ្ងរដល់ការផលិតអំបិលយ៉ាងខ្លាំង ព្រោះគ្មានទឹកសមុទ្រយកមកផលិតអំបិល។ ការបូមនោះបានបិទ និងលុបអាងស្តុកទឹក ទោះបីជាក្រុមសាមគ្គីបានទៅឃាត់ និងរាយការណ៍ជូនអាជ្ញាធរមូលដ្ឋាន ក៏ឈ្មោះ គង់ សំណាង និងបក្ខពួកមិនព្រមឈប់។
ក្រុមពលរដ្ឋបានឱ្យដឹងទៀតថា ក្រោយពីបានស្នើសុំអន្តរាគមន៍ជាបន្តបន្ទាប់ តាំងពីមន្ទីរ រហូតដល់ក្រសួង ឧស្សាហកម្ម វិទ្យាសាស្ត្រ បច្ចេកទេស និងនវានុវត្តន៍ ទីបំផុតក្រសួងបានវាស់វែងបំពេញបន្ថែមទំហំដីគ្រប់ចំនួន ២៤ ហិកតា ស្របតាម សជណ ចុះថ្ងៃទី ៨ ខែកញ្ញា ឆ្នាំ ២០០៦ របស់ទីស្តីការគណៈរដ្ឋមន្ត្រី។ បន្ទាប់ពីទទួលបានប្លង់បង្ហាញទីតាំងទំហំដី ២៤ ហិកតា ក្រុមសាមគ្គី បានស្នើសុំចេញវិញ្ញាបនបត្រសម្គាល់ម្ចាស់អចលនវត្ថុ ស្របតាមនីតិវិធី ប៉ុន្តែត្រូវបានឈ្មោះ គង់ ម៉ាល័យ ដែលជាកូនស្រី គង់ សំណាង និងបក្ខពួកប្តឹងជំទាស់ចំពោះការស្នើសុំនេះដោយប្រឆាំងនឹងមិនគោរព សជណ របស់ទីស្តីការគណៈរដ្ឋមន្ត្រី។
ក្រុមពលរដ្ឋបញ្ជាក់ទៀតថា៖ «ចំពោះរឿងនេះ ក្រសួងឧស្សាហកម្មបានចេញលិខិតចុះថ្ងៃទី ៣ ខែវិច្ឆិកា ឆ្នាំ ២០២១ ទៅសាលាខេត្តកំពត សំណើសុំផ្តល់បណ្ណកម្មសិទ្ធិម្ចាស់អចលនវត្ថុជូនក្រុមសាមគ្គីផលិតអំបិលយើងខ្ញុំ ប៉ុន្តែរហូតមកទល់ពេលនេះនៅមិនទាន់មានចំណាត់ការពីខេត្តកំពតនៅឡើយ»។
ជាការឆ្លើយតបក្នុងរឿងនេះ លោក អ៊ឹង ឆាយ អភិបាលរង និងជាអ្នកនាំពាក្យរដ្ឋបាលខេត្តកំពតថ្លែងនៅថ្ងៃទី ២៧ ខែធ្នូថា យន្តការក្នុងរដ្ឋបាលខេត្តលោកមិនទាន់ដឹងព័ត៌មានថា ដំណើរការយ៉ាងណាទេ ប៉ុន្តែក្រោយទទួលបានព័ត៌មាននេះលោកនឹងស្នើសុំគោលការណ៍ពីអភិបាលខេត្តក្នុងការជំរុញកិច្ចការងារនេះធ្វើយ៉ាងណាឱ្យស្របតាមនីតិវិធីច្បាប់។
លោកស្រី មូល សុខុម មេឃុំបឹងទូក ថ្លែងនៅថ្ងៃទី ២៧ ខែធ្នូថា ពលរដ្ឋពិតជាបានផលិតអំបិលនៅទីតាំងនោះមែន ហើយកន្លងមកពិតជាមានអ្នកទៅបូមខ្សាច់បិទមិនឱ្យពលរដ្ឋយកទឹកសមុទ្រទៅផលិតអំបិលបានពិតមែន ប៉ុន្តែករណីនេះបានដោះស្រាយរួចហើយ ពោលគឺអ្នកបូមខ្សាច់ចាក់លុបបិទផ្លូវទឹកនោះបានបញ្ឈប់សកម្មភាពហើយ ប៉ុន្តែមិនដឹងមូលហេតុអ្វីនៅមានការប្តឹងគ្នាទៀត៕
