.jpg)
សត្វដំរីនៅលើវាលស្មៅក្នុងតំបន់អភិរក្សសត្វដំរី នៅជើងភ្នំគូលែន ភូមិបុស្សធំ ស្រុកសូទ្រនិគម ខេត្តសៀមរាប។ រូបថត ដំរី
ភ្នំពេញៈ យ៉ាងហោចណាស់មានសប្បុរសជនប្រមាណជាង ១ ពាន់នាក់បានចូលរួមបរិច្ចាគសាច់ប្រាក់សរុបជាង ៣ ពាន់ដុល្លារ ទៅក្នុងយុទ្ធនាការ «១ ដុល្លារដើម្បីស្នាមញញឹមដំរី» ដែលបង្កើតឡើងកាលពីដើមខែធ្នូ ដោយក្រុមនិស្សិតមួយក្រុមក្នុងគោលបំណងប្រមូលថវិកាសម្រាប់ជួយជីវភាពខ្វះខាតរបស់អ្នកភូមិ និងសត្វដំរីនៅតំបន់ភ្នំគូលែន ក្រោយពីបាត់ចំណូលដោយគ្មានភ្ញៀវទេសចរទៅដល់តំបន់នោះ ព្រោះស្ថានភាពរីករាលដាលជំងឺកូវីដ ១៩។
កាលពីដើមខែធ្នូ មាននិស្សិត ១ ក្រុមបានបង្កើតយុទ្ធនាការមួយដែលមានឈ្មោះថា៖ «១ ដុល្លារ ដើម្បីស្នាមញញឹមដំរី» ជាយុទ្ធនាការរៃអង្គាសថវិកាពីសប្បុរសជន ក្នុងរយៈពេល ១ ខែ ដើម្បីជួយអភិរក្សសត្វដំរីនៅតំបន់ជើងភ្នំគូលែន និងសម្រាប់ដោះស្រាយបញ្ហាជីវភាពអ្នកភូមិក្នុងតំបន់នោះ បន្ទាប់ពីពួកគេរងផលប៉ះពាល់ដោយសារគ្មានភ្ញៀវទេសចរចូលទស្សនា។
តំបន់អភិរក្សសត្វដំរីនៅជើងភ្នំគូលែន មានទីតាំងនៅភូមិបុស្សធំ ឃុំខ្នារពោធិ៍ ស្រុកសូទ្រនិគម ខេត្តសៀមរាបត្រូវបានបង្កើតឡើងកាលពីចុងឆ្នាំ ២០១៩ ដោយប្រមូលសត្វដំរីចំនួន ១៣ ក្បាលពីប្រជាសហគមន៍ដែលប្រកបរបរដឹកភ្ញៀវទស្សនាកម្សាន្តតាមតំបន់អង្គរយកមករក្សាទុកក្នុងតំបន់នេះ។
យុវជន សាមរ៉ុង ហុកស្រ៊ុន ប្រធានក្រុមអ្នកផ្តួចផ្តើមក្នុងចំណោមនិស្សិតចំនួន ៧ នាក់បានប្រាប់ភ្នំពេញប៉ុស្តិ៍នាថ្ងៃទី ២៧ ធ្នូថា យុទ្ធនាការ ១ ដុល្លារ ដើម្បីស្នាមញញឹមដំរីនឹងត្រូវបញ្ចប់នៅដើមខែមករា ហើយថវិកាដែលប្រមូលបានទាំងអស់នឹងប្រមូលយកទៅប្រគល់ជូនដល់អ្នកអភិរក្សសត្វដំរីនៅជើងភ្នំគូលែនដោយផ្ទាល់ នៅថ្ងៃទី ១៩ មករា។
លោកបានបញ្ជាក់ថា ចាប់តាំងពីយុទ្ធនាការនេះត្រូវបានប្រកាសឡើងរហូតមកដល់បច្ចុប្បន្នគឺមានអ្នកចូលរួមឧបត្ថម្ភថវិកាជាង ១ ០០០ នាក់ ដែលប្រមូលបានប្រមាណជាង ៣ ០០០ ដុល្លារ ហើយយុវជនរូបនេះរំពឹងថាក្នុងពេលខាងមុខនឹងមានអ្នកចូលរួមបន្ថែមទៀត ដើម្បីជួយដល់សត្វដំរីនៅកម្ពុជា។
លោក ហុកស្រ៊ុន បានបញ្ជាក់ថា៖ «យុទ្ធនាការ ១ ដុល្លារ ដើម្បីស្នាមញញឹមដំរី គឺជាយុទ្ធនាការមួយដែលបានបង្កើតឡើងដោយក្រុមនិស្សិតបន្ទាប់មើលឃើញពីផលប៉ះពាល់ និងការខ្វះខាតរបស់ក្រុមអ្នកអភិរក្សសត្វដំរីក្នុងខេត្តសៀមរាប ជាពិសេសបញ្ហាប្រឈមនឹងការខ្វះខាតស្បៀងសម្រាប់សត្វដំរី។ យើងគិតថាថវិកាដែលប្រមូលបាននេះគឺជាចំណែកមួយជួយដល់សត្វដំរី»។
លោក ពីយ៉ូត ដាវីតហ្យាយ៉ា សហស្ថាបនិកតំបន់អភិរក្សសត្វដំរីនៅជើងភ្នំគូលែន បានប្រាប់ភ្នំពេញប៉ុស្តិ៍ថា គោលដៅនៃការប្រមូលសត្វដំរីទាំងនោះក្នុងគោលបំណង ដើម្បីកាត់បន្ថយការធ្វើអំពើឃោរឃៅលើសត្វដំរី និងផ្តល់ឱ្យពួកគេមានសេរីភាព និងការរស់នៅជាមួយនឹងធម្មជាតិវិញ។
លោកអះអាងថា ក្រោយគម្រោងដំណើរការ ស្ថានភាពនៃការផ្ទុះកូវីដ ១៩ ក៏បានផ្ទុះឡើង ដែលជាហេតុធ្វើឱ្យប៉ះពាល់ស្ថិរភាព និងការរស់នៅរបស់ប្រជាសហគមន៍ និងការរស់នៅរបស់សត្វដំរី ព្រោះតែចំណូលដែលរំពឹងពីភ្ញៀវទេសចរចូលមើលកម្សាន្តក្នុងតំបន់អភិរក្ស ត្រូវបានបាត់បង់ជាបណ្តើរៗ។
លោកបញ្ជាក់ថា សត្វដំរីក្នុងតំបន់អភិរក្សត្រូវស៊ីចំណី យ៉ាងហោចណាស់ប្រមាណជា ២០០ ទៅ ៣០០ គីឡូ ក្នុង ១ ថ្ងៃៗ ដោយត្រូវចំណាយថវិកាផ្គត់ផ្គង់ដំរីចំនួន ១៣ ក្បាល។
លោក ពីយ៉ូត ដាវីតហ្យាយ៉ា បានថ្លែងដោយ បង្ហាញក្តីសង្ឃឹមថា ការបង្កើតជាយុទ្ធនាការរបស់ក្រុមនិស្សិតក្នុងពេលនេះ គឺជាផ្នែកមួយ ដើម្បីចូលរួមជួយដល់សត្វដំរីក្នុងប្រទេសកម្ពុជា៕
