ស្វាយរៀងៈ នគរបាលព្រហ្មទណ្ឌ ខេត្តស្វាយរៀង នៅថ្ងៃទី ២៧ ធ្នូ បានបញ្ជូនបុរសម្នាក់ទៅតុលាការ បន្ទាប់ពីចាប់ខ្លួនបាន ២ ថ្ងៃ ករណីវាយសម្លាប់ឪពុកបង្កើតរបស់ខ្លួន ប្រព្រឹត្តនៅភូមិ អង្គសាលា ឃុំ ចំបក់ ស្រុកស្វាយជ្រំ ខេត្តស្វាយរៀង។
លោក គឹម ឡៃ នាយការិយាល័យនគរបាលព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តស្វាយរៀង ឱ្យដឹងនៅថ្ងៃទី ២៧ ធ្នូថា ជនសង្ស័យឈ្មោះ ប្រាក់ ចិត្ត ភេទប្រុស អាយុ ៣០ ឆ្នាំ។ ចំណែកជនរងគ្រោះជាឪពុកឈ្មោះ ប្រាក់ ទិត្យ អាយុ ៥៤ ឆ្នាំ។ ទាំង ២ នាក់រស់នៅភូមិ អង្គសាលា ឃុំចំបក់ ស្រុកស្វាយជ្រំ។
ក្រុមគ្រួសារបានប្រាប់សមត្ថកិច្ចថា កន្លងមកជនសង្ស័យធ្លាប់ប្រើប្រាស់គ្រឿងញៀនយ៉ាងសកម្ម។ ប៉ុន្តែក្រោយពីធ្វើសកម្មភាពសម្លាប់ឪពុកខ្លួនមក គឺមន្ត្រីជំនាញបានយកទៅពិនិត្យរកសារធាតុញៀនក្នុងទឹកនោមមិនឃើញមានផ្ទុកសារធាតុញៀនទេ។ ការវាយសម្លាប់ជនរងគ្រោះនេះសមត្ថកិច្ចសង្ស័យថា ជារឿងគំនុំច្រើនជាងញៀនថ្នាំ ព្រោះជនរងគ្រោះតែងតែស្តីបន្ទោសជនសង្ស័យ។ លោកប្រាប់ថា៖ «ករណីជនសង្ស័យ យើងបានបញ្ជូនទៅតុលាការរួចរាល់ហើយនៅថ្ងៃនេះ (ថ្ងៃទី ២៧ ធ្នូ) តាមរយៈនគរបាលស្រុកស្វាយជ្រំ»។
លោក ព្រំ សំអុល នាយប៉ុស្តិ៍នគរបាលរដ្ឋបាលចំបក់ ថ្លែងតាមសម្តីម្តាយរបស់ជនសង្ស័យថា កន្លងមកកូនរបស់គាត់ធ្លាប់ប្រើប្រាស់គ្រឿងញៀនមែន និងតែងតែបង្កជម្លោះជាមួយឪពុកម្តាយស្ទើររាល់ថ្ងៃនៅពេលណាដែលពួកគាត់និយាយដាស់តឿនមិនឱ្យជក់គ្រឿងញៀន។ ប៉ុន្តែដោយសារមិនមានការកែប្រែ ឪពុកម្តាយ បានយកជនសង្ស័យទៅកន្លែងបន្សាបគ្រឿងញៀននៅមណ្ឌលបន្សាបគ្រឿងញៀនមួយនៅរាជធានីភ្នំពេញ។ ដោយត្រូវចំណាយលុយអស់ពី ២ ទៅ ៣ ពាន់ដុល្លារទៀតផង សម្រាប់ចេញថ្លៃសេវាព្យាបាល។ លុះនៅវេលាម៉ោងជាង ៧ យប់ថ្ងៃទី ២៥ ធ្នូ នៅពេលជនរងគ្រោះបានត្រឡប់មកពីធ្វើការសំណង់វិញក៏ដេកនៅលើគ្រែមុខផ្ទះ ស្រាប់តែជនសង្ស័យលើកដុំថ្មជាប្រភេទថ្មភ្នំទៅអុកក្បាលជនរងគ្រោះរហូតដល់ស្លាប់ហើយអូសជនរងគ្រោះបំណងយកទៅទម្លាក់ក្នុងទឹកស្រះក្បែរផ្ទះ។ ដោយឃើញសភាពបែបនេះស្ត្រីជាម្តាយបានរត់ទៅប្រាប់អ្នកជិតខាងឱ្យមកជួយ។ ពេលនោះ ជនសង្ស័យបានរត់ទៅសំងំក្នុងផ្ទះ (ផ្ទះតៀមថ្មផ្ទាល់ដី) ហើយដាក់គន្លឹះទ្វារពីខាងក្នុង។
លោកបានថ្លែងថា៖ «ដោយសារកម្លាំងយើងមានគ្នាច្រើន មានទាំងកម្លាំងប្រជាពលរដ្ឋ មានទាំងសមត្ថកិច្ចនគរបាល យើងក៏ចាប់ជនសង្ស័យបានក្នុងពេលនោះដែរ។ រឿងនេះដំណើររឿងគឺមកពីវាមានគំនុំជាមួយឪពុកវា ទើបបានជាវាធ្វើបែបនេះ»៕